РЦИ-Аланимæ кусæгон балцы æрцæуæг УФ-йы спорты министр Олег Матыцин æмæ РЦИ-Аланийы Сæргълæууæг Сергей Меняйло Дзæуджыхъæуы бабæрæг кодтой къорд егъау спортивон объекты. Фыццаджыдæр уал бацыдысты республикон стадион «Спартак»-ы арæзтадон фæзуатмæ. Уым ныртæккæ активон темптæй цæуы реконструкцийы дыккаг этап.
Арæзт æрцыд æмæ байгом кæнынмæ цæттæ у ихын аренæ «Тагбан», кæцы ис Джызæлы фæндагыл. Сергей Меняйло æмæ Олег Матыцин бацыдысты уырдæм дæр. Масштабон инвестицион проект арæзт æрцыд Цæгат Ирыстоны спорты ихын хуызты рæзты нысанæн. Аренæйы ис дыууæ ихын фæзы, 500 спортуарзæджы бынатæн трибунæ, 60 адæймагæн хостел, 3 спортзалы, кафе, хæрæндон. Йæ цуры бауромæн уыдзæн 200 автомашинæйы.
Цæгат Ирыстоны Сæргълæууæг æмæ Уæрæсейы спорты министр ма уыдысты Цоколайы фырты уынджы уæвæг спортивон хъæбысхæсты тренировкæгæнæн центры. Уым ма фембæлдысты æхсæнады минæвæрттимæ.
УÆГЪДИБАР ХЪÆБЫСХÆСТ
Ирон богалтæ хайад райсдзысты Красноярскы уæгъдибар хъæбысхæстæй дунеон турнир – Иван Ярыгины Кубокы. Ерыстæ уагъд цæудзысты 25-28 январы. Хайад сæ райсдзысты 10 бæстæйæ фылдæры минæвæрттæ. Уыдон ‘хсæн сты Иран, Инди, Китай æмæ Монголи. Турниры Ирыстоны спортивон кад хъахъхъæндзысты 34 спортсмены: 61 кг – Сабанты Алик; 65 кг – Уалыты Эльбрус; 70 кг – Бугуылты Зауырбег, Сечъынаты Георги, Зиггойты Зауыр, Куыдзойты Алан; 74 кг – Байты Давид, Дзукъаты Роберт; 79 кг – Уалыты Радик, Цоколаты Алан, Хапсаты Аслан, Бетанты Дэвид, Хъарданты Магомет, Хуыбиаты Ибрагим; 86 кг – Найфонты Артур, Багаты Арслан, Найфонты Алан, Мæхъиты Зауыр, Чертхъоты Ренат; 92 кг – Уалыты Владислав, Багаты Аслан, Чертхъоты Гурам, Тæпсиаты Тамерлан, Суанты Хъазбег, 97 кг -Козырты Сергей, Коцойты Алан, Дзæгъиаты Сослан, Гæззаты Аслан, Таугазты Ирбег; 125 кг – Коцты Знауыр, Джыгкайты Тамерлан, Бестауты Андрей, Джиоты Георги æмæ Джиоты Эрик.
БОКС
Боксæй сербаг горæт Сомборы уагъдцæуæг дунеон турнир «Кубок Нации»-йы уæлахиздзау ссис ирон спортсменкæ Хъуылаты Софья. 57 кг уæзы категорийы финалы уый фæуæлахиз бынæттон спортсменкæ Мария Лукичыл.
ХУРИТЫ Батрадз
