Знауыры районы милицийы фæндагон змæлды æдасдзинады æмæ фадыгон инспектортæ зилынц сæ административон территоритыл æмæ бæрæг кæнынц цæрджыты. Ацы аз сын бантыст 800 хисæрмагонд хæдзарæй фылдæр басгарын. Ныридæгæн бабæрæг кодтой 4 административон территорийы цæрджыты æмæ ма сын баззад дыууæ – Знауыры поселок æмæ Бехъмары хъæу. Уыдоныл дæр æввахс рæстæджы азилдзысты.
Басгæрстыты рæстæджы фадыгон инспектортæ сног кæнынц сæ информаци – базонынц бинонты, хæдзарон фосы, мæргъты, автомашинæты нымæц. Уымæй уæлдай ма фæткхалынмæ æмхиц чи у, карз нозт арæх чи кæны, наркотиктæй чи пайда кæны, уыдоны номхыгъдтæ ногæй саразынц. Стæй ма сæхимæ фæнысан кæнынц, йæ уагахаст кæмæн нæ фæбæззы æмæ антиæхсæнадон цард чи кæны, уыдоны, цæмæй семæ профилактикон куыст бакæной. Бынæттон цæрджытæм ныууагътой сæ телефоны номыртæ æмæ ма районы милицийы управленийы радгæсы службæйон номыртæ.
Фæндагон змæлды æдасдзинады инспектортæ та сæхирдыгæй фæдзæхстой тракторскъæрджытæ æмæ ма æндæр ахæм хъæууонхæдзарадон техникæйы хицæутты, цæмæй фæндагон фæткойтæ ма халой, ма скъæрой нозтджынтæй. Ахæм техникæйæн вæййы йæхи эксплуатацион домæнтæ æмæ сæ фæхъæуы æнæмæнг æххæст кæнын. Зæгъæм, кæцыдæртæн дзы иумæйаг фæндагыл скъæрыны бар нæй, егъау кæй сты, уымæ гæсгæ – æнæмæнг семæ хъуамæ уой фæндагон инспектортæ æмæ сæ бахизой аваритæй. Стæй ма сын нæй æхсæвыгон скъæрæн дæр – аварийæ тæссаг у. Фæстаг рæстæджы цалдæр аварийы æрцыд сæрмагонд техникæйы хайадистæй æмæ ныр карз æфхæрд цæудзысты сæ шофыртæ.
Ахæм профилактикон азылдтытæ фадыгон инспектортæ арæх фæкæнынц. Уый тыххæй сын вæййы сæрмагонд куысты график. Куы бахъæуы, уæд оперативон информацийы фæдыл афонæй раздæр азилынц цæрджытыл æмæ райсынц хъæугæ информаци, кæцыйæ спайда кæнынц сæ службæйон хæстæ æмбæлонæй сæххæст кæныны хъуыддаджы.
Фадыгон инспекторæн йæ куысты æнæмæнг у, цæмæй йыл адæм æууæндой, ныфс дзы æвæрой. Фембæлдтыты рæстæджы цæрджытæм вæййы проблемон фарстатæ дæр æмæ сын инспектортæ сдзуапп кæнынц. Сæ бон куы нæ вæййы проблемæ аскъуыддзаг кæнын, уæд та сын бацамонынц, цы сæ хъæуы дарддæр саразын.
ДЖИОТЫ Алыксандр
