Милицийы фадыгон инспектортæ 17-æм ноябры банысан кодтой сæ профессионалон бæрæгбон. Мидхъуыддæгты министры хæстæ æххæстгæнæг Пухаты Мераб зæрдиагæй раарфæ кодта фадыгон инспектортæн æмæ банысан кодта, зæгъгæ, æхсæнадон фæтк æрæвæрыны хъуыддагмæ милицийы ацы хайады кусджытæ хæссынц егъау хайбавæрд.
«Сымах æппынæдзух вæййут цæрджыты уæлхъус, иууыл фыццаг балæуут сæ фарсмæ сæ зындзинæдты рæстæджы, æмæ зæгъæн ис, кæй стут адæмы фыццаг фæдисонтæ. Мæ зæрдæ уын зæгъы, цæмæй уæ фыццаджыдæр уа адæмы хорзæх, стæй та уат æнтыстджын куысты дæр æмæ бинонтимæ царды дæр», – загъта йæ арфæйы Пухаты Мераб.
Ведомствойы сæргълæууæг ма видеобастдзинад сарæзта горæт Цхинвалы фадыгон инспектортимæ æмæ сын афтæмæй дæр раарфæ кодта. Районты милицийы хайадтимæ нырма ахæм бастдзинад зын саразæн у, фæлæ уыдон дæр рохуаты нæ баззадысты. Йæхимæ фæдзырдта, йæ службæйон хæстæ иттæг хорз чи æххæст кæны, уыцы фадыгон инспектортæм æмæ сæ схорзæхджын кодта ведомствойон хорзæхтæй. Се ‘хсæн уыдис, куыд фæлтæрд кусджытæ, афтæ æрыгон инспектортæ дæр, кæцытæ каст фесты Уæрæсейы уæлдæр ахуыргæнæндæттæ милицийы хаххыл æмæ ныридæгæн службæ хæссынц сæ райгуырæн бæстæйы.
«Уæ бакæнгæ куысты фæстиуæгæн адæм аргъ кæнынц æгас Мидхъуыддæгты министрадæн æмæ уæ уыцы хъуыддаг рох макуы хъуамæ уа. Сымах дарут пъагæттæ æмæ уыл уый тыххæй стыр хæстæ ис закъоны раз. Ныфс мæ ис, дарддæр дæр кæй уыдзыстут цæвиттон иннæ кусджытæн æмæ кæй архайдзыстут адæмы хæрзæбонæн», – банысан кодта Пухаты Мераб.
Милицийы фадыгон инспектортæ æцæгæйдæр ахсынц сæрмагонд бынат Мидхъуыддæгты министрады, уымæн æмæ иууыл æввахсдæр лæууынц адæммæ, сæ службæйон хæстæ комкоммæ баст сты цæрджыты цардуагон проблемæтæ скъуыддзаг кæнынимæ. Горæты фадыгон инспектортæ æдæппæт сты 12 æмæ сæм астæуккаг нымадæй хауы фæйнæ 3-5 мин адæймаджы бæрц, уымæн æмæ нæ республикæйы цæрджытæн сæ фылдæр хай цæрынц Цхинвалы. Фæлæ афтæ зæгъæн нæй, æмæ районты фадыгон инспектортыл къаддæр уæз цæуы, – уыдонæн та сæ территориты цы хъæутæ ис, уыдон сæ кæрæдзимæ сты дæрддзæф æмæ алкæцы цæрæгмæ дæр хъæуы сæрмагонд хъусдард здахын. Цæмæй фадыгон инспектор йæ куысты æнтыстджын уа, уый тыххæй иттæг хорз хъуамæ æмбара адæмы психологи, йæ зæрдæмæ сын æввахс иса сæ тыхстдзинад æмæ сын, гæнæн уæвгæйæ, хъуамæ æххуыс кæна сæ проблемæтæ аиуварс кæнынæн.
ДЖИОТЫ Алыксандр
Comments are closed, but trackbacks and pingbacks are open.