Нæ республикæйы культурон царды зынгæ цау – 22-æм январы паддзахадон драмон театры сценæйыл æвдыст цæудзæн фыццаг ирон балет “Фатимæ”, кæцы æвæрд æрцыд Хетæгкаты Къостайы поэмæмæ гæсгæ. Йæ равдисын æрæмных кодтой зындгонд ирон композитор, балеты музыкæйы автор Плиты Жаннæйы мысæн бонмæ.
Проектыл кусын райдыдтой Плиты Жаннæйы амæлæты фæстæ. Балет «Фатимæ» сæвæрын композитор йæхæдæг фæнд кодта ацæугæ æнусы 80-æм азты, фæлæ бæрæг аххосæгтæм гæсгæ, йæ фæнд нæ сæххæст. Ацæугæ азы Мариианаг театры аивадон къухдариуæггæнæг Гергиты Валерийы хъæппæрисмæ гæсгæ Плиты Жаннæйы рухс ном ссарыны нысанæн сфæнд кодтой балет сæвæрын.
Классикон ирон драмæ æнахуыр хуызы равдисын – сценæмæкæсджытæм æнхъæлмæ кæсы ирд цау. Профессионалты къорд, кæцыйы сконды сты Дзуццаты Тамерлан, Суанты Валери, Албегаты Георгий æмæ Найфонты Давид, бацæттæ кодтой бæрзонд æмвæзадыл балет. Сæйраг ролтæ дзы æххæст кæнынц Мариинаг театры филиалы балетон труппайы артисттæ.
Театры аивадон къухдариуæггæнæг, балеты режиссер-æвæрæг Дзуццаты Тамерланы ныхæстæм гæсгæ символикон у, йæ мæлæтыл афæдз сæххæсты бон балет æвдыст кæй æрцæудзæн Цхинвалы.
Фыццаг ирон балет «Фатимæ»-йы премьерæ уыд ацæугæ аз ноябры мæйы Дзæуджыхъæуы æмæ сценæмæкæсджытыл ныууагъта ирд тæлмæнтæ. Дзуццаты Тамерланы ныхæстæм гæсгæ йын стыр æнтыст уыдзæн Хуссар Ирыстоны дæр.
