Киноконцертон зал «Чермен»-ы ауагъдӕуыд ирон национ кафты фестиваль, кӕцы ссис традицион ӕмӕ ӕрвылаз дӕр ӕхцондзинад ӕрхӕссы ирон национ кафтӕн табугӕнджытӕн. Ардӕм фӕуазӕг сты РХИ-йы Ахуырад ӕмӕ зонады министр Гасситы Натали, ахуыргӕнджытӕ, скъоладзаутӕ, ныййарджытӕ ӕмӕ ма хицауады бӕрнон кусджытӕ. Фестиваль цыдис дыууӕ боны дӕргъы ӕмӕ дзы хайад райстой нӕ республикӕйы скъолаты хореографион къордтӕ. Ацы фестивалы хайадисджытӕ азӕй-азмӕ кӕнынц фылдӕр, алкӕцы скъолайы къухдариуӕгады дӕр фӕнды, цӕмӕй йӕ ахуыргӕнинӕгтӕ базонгӕ уой сӕхи цахъхъӕн скъоладзауты арæхстдзинадимæ ӕмӕ уымӕ гӕсгӕ сӕ кафты аивад бӕрзонддӕр ӕмвӕзадмӕ хиза. Ноджы ма стыр ахъаз у сывӕллӕтты монон рӕзтӕн, зонгӕ кӕнынц ирон кафты традицитимӕ, историимӕ.
Фестивалы алкӕцы хореографион къорд дӕр тырныдта йӕ арӕхстдзинад ирдӕй равдисынмӕ, сӕ дӕсныйад нӕ бахӕлӕг кодтой сценӕмӕкӕсджытӕн. Залы бадджытӕ стыр ӕхцондзинад райстой чызджыты аив къухты айстӕй, лӕппуты рог фезмӕлдӕй. Жюрийы уӕнгтӕн зын уыд хуыздӕрты равзарын, уымӕн ӕмӕ алкӕцы коллектив дӕр йӕхи равдыста тынг хорз. Фæлæ уæддæр фыццаг бынат радтой Цхинвалы 11-ӕм скъолайӕн, кӕцы сӕххӕст кодта «Хонгӕ» кафт. Фыццаг къӕпхӕны дипломимӕ ма фӕуӕлахизуӕвӕг коллективы къухдариуӕггӕнӕг Плиты Зӕринӕйӕн Гасситы Натали цытджын ӕгъдауӕй радта арфӕйы фыстӕг дӕр.
Гасситы Натали бузныг загъта фестивалы хайадисджытӕн, мадзал ӕмбӕлон ӕмвӕзадыл чи ауагъта, уыдонӕн, ӕмӕ ма жюрийы уӕнгӕтӕн дӕр.
«Кӕронмӕ та бахӕццӕ нӕ диссаджы фестиваль, кӕцы азӕй-азмӕ кӕны рӕсугъддӕр ӕмӕ аивдӕр. Кӕд раздӕры фестивалты рӕстӕджы мӕ хъус дардтон ӕрмӕстдӕр кафтӕн йе ддаг бакастмӕ, уӕд ныр та лӕмбынӕг кӕсын ӕмӕ ӕхцондзинад исын чызджыты рӕсугъд уæнгты айстӕй, – цыма кафты рӕстӕджы ленк фӕкӕныц, уыйау рӕсугъд вӕййы сӕ фезмӕлд. Лӕппутӕ та сӕ тагъд ӕмӕ диссаджы змӕлдӕй равдыстой ӕмӕ сценӕмӕкӕсджытӕн бауырнын кодтой, ирон кафт ӕцӕгӕйдӕр кӕй у нӕ нацийы стыр хӕзна. Махӕн ис тынг рӕсугъд ӕмӕ курдиатджын фӕсивӕд ӕмӕ мӕ фидарӕй уырны, сомбон кӕй уыдзысты аккаг гоймӕгтӕ нӕ бӕстӕйӕн. Хореграфӕн йӕ куыст разыны ахӕм мадзӕлтты ӕмӕ уын дзурын стыр бузныг, – абон уын федтам уӕ куыст ӕмӕ мæ уырны, дарддӕр дӕр кӕй архайдзыстут нӕ сывӕллӕтты размӕцыдыл. Жюрийы уӕнгтӕм акӕсгӕйӕ, зӕгъӕн ис, ӕмӕ дзы ныры онг алкӕцы дӕр егъау хайбавӕрд бахаста Ирыстоны культурӕмӕ, сывӕллӕтты хъомыладмӕ, ӕмӕ абоны бон та объективонӕй ракастысты фестивалы коллективтӕм ӕмӕ ӕмбӕлон аргъ скодтой алкӕмӕн дӕр», – банысан кодта Гасситы Натали.
Хореографион къордтӕ иууылдӕр иттӕг хорз кӕй сӕххӕст кодтой сӕ кӕфтытӕ, уымӕ гӕсгӕ жюрийы уӕнгтӕ аскъуыддзаг кодтой, цӕмӕй дыккаг бынат дӕр ӕмӕ ӕртыккаг бынат дӕр радтой дыгай командӕтӕн. Уымӕ гӕсгӕ, дыккаг къӕпхӕны дипломтӕй хорзӕхджын ӕрцыдысты Цъинагары астӕуккаг скъолайы ӕмӕ Цхинвалы скъола-интернаты хореграфион коллективтӕ, ӕмӕ сӕ цытджын ӕгъдауӕй схор-зӕхджын кодта РХИ-йы Парламенты ахуырад ӕмӕ зонады комитеты сӕргълӕууӕг Уырыгаты Инал.
Ӕртыккаг къӕпхӕны дипломты хицӕуттӕ та баисты Цхинвалы 1-ӕм ӕмӕ 12-ӕм астӕуккаг скъолаты хореографион коллективтӕ. Уы-мӕй уӕлдай ма фӕуӕлахизуӕвджытӕ ӕмӕ призертӕ райстой зӕрдылдарӕн лӕвӕрттӕ. Фестивалы хайадисӕджы дипломтӕ дӕр радтой цалдӕр командӕйӕн, кӕцытӕ не систы призертӕ, фӕлӕ сӕхи иттӕг хорз бацӕттӕ кодтой.
Ахуырад ӕмӕ зонады министр ма арфӕйы ныхӕстӕ загъта министрады кусджытӕн, кӕцытӕ активон хайад райстой ацы мадзал ауадзыны рӕстӕджы.
«Кӕд ӕмӕ алчидӕр тынг бафӕлладис, уӕддӕр фестивалæн ис тынг хорз фӕстиуджытӕ, иууылдӕр райстам ӕхцондзинад, ӕмӕ абон мах цы эмоцитӕ банкъардтам, уымӕн та аргъ дӕр нӕй», – загъта кӕронбӕттӕны Гасситы Натали.
ДЖИОТЫ Александр
Comments are closed, but trackbacks and pingbacks are open.