Фарон марты мæйы АИШ æмæ Евроцæдис Уæрæсейы егъау банкты ахицæн кодтой финансон системæ SWIFT-æй. Ахæм къахдзæф саразынæй æнхъæл уыдысты, ома Уæрæсейæн нал уыдзæнис бастдзинад йæ фæсарæйнаг финансон партнертимæ, баййафдзæнис стыр зиæнттæ æмæ уый фæстиуæгæн Украинæйы цæуæг сæрмагонд æфсæддон операци уадзын сæ бон нал уыдзæнис. Фæлæ фыдæнхъæл фесты.
Уæрæсейы къухдариуæгад ацы хъуыддагмæ цæттæ уыдысты æмæ SWIFT-ы ахицæн цъус бандæвта уæрæсейаг финансон бастдзинæдтыл. Хурныгуылæйнаг бæстæтæ рагæй æртхъирæнтæ кодтой SWIFT-æй – афтæ æнхъæлдтой, æнæ уый цæрæн нæй, кæнæ ахæм æнгæс системæ саразын сæ бон нæ баудзæн Уæрæсейæн. 2014 азы йæ куыст райдыдта Уæрæсейы банкы финансон бастдзинæдты системæ (СПФС). 2018 азы ацы системæйæ пайда кæнын райдыдтой 400 организацийæ фылдæр. Банысан кæнын хъæуы уый æмæ СПФС-йæ пайда кæнын райдыдтой æппæт уæрæсейаг организацитæ, кæцыты нымæц цыбыр рæстæгмæ SWIFT-æй пайдагæнджытæй бæрæг фæфылдæр. СПФС-йы бындурыл арæзт æрцыдис карта «МИР» дæр – ныридæгæн Уæрæсейы у иунæг ахæм финансон системæ, кæцы у хæдбар, автономон æмæ йыл нæй фæсарæйнаг системæты æндæвдад.
Фæсарæйнаг партнертимæ та Уæрæсейæн ис æндæр хуызы финансон бастдзинæдтæ, кæцытæ не сты къаддæр SWIFT-ы авналæнтæй. Дунейы бæстæтæ радыгай хизынц националон валютæтæм сæ товар ауæй кæныны æмæ исты балхæныны рæстæджы. Уый та стыр тæссагдзинад æвзæрын кæны доллары гегемонийæн – ныридæгæн дæр АИШ-ы зиæнттæ ахызтысты миллиардгай доллартæй. АИШ-ы къухдариуæгадæн комкоммæ йæ бон нæу сæвзæргæ уавæрыл бандавын, уымæн æмæ экономикон санкцитæ дæр йæхæдæг рахаста. Бахатыдысты ИНО-мæ, цæмæй ацы организаци фæндон бахæсса SWIFT Уæрæсейы территорийыл скусын кæнынын тыххæй.
Куыд фæнды ма уа – Уæрæсе абоны бон алы вариантмæ дæр цæттæ у. SWIFT-ы скусынæй уæлдай ницыуал фæивдзæнис – националон валютæтæм чи рахызтис, уыдон доллармæ нал аздæхдзысты.
ДЖИОТЫ Алыксандр
