Куыстмызд, техникон ифтонгад æмæ æндæр фарстатæ

Информацион агентад Sputnik-мæ хуынд æрцыд Мидхъуыддæгты министр Гæззаты Валери. Æмæ дзуаппытæ радта журналистты фарстатæн.

Ӕрæджы Гæззаты Валери æрцыд Мæскуыйæ кусæгон балцæй. Уым министр фембæлд УФ-йы мидхъуыддæгты министры хæдивæг Игорь Зубовимæ æмæ иумæ скъуыддзаг кодтой бирæ ахсджиаг фарстатæ.

«Хуссар Ирыстон æмæ Уæрæсейы ‘хсæн цы бадзырд бафыст æрцыд 2017 азы, уый фæлгæтты фарон декабры мæйы æмгъуыдмæ Мидхъуыддæгты министрады кусджыты нымæц 200 бæрц хъуамæ фæкъаддæр уыдаид. Мах нæ уæрæсейаг коллегæтæм бахатыдыстæм, цæмæй кусджыты фæкъаддæр кæныны хъуыддаг аргъæвой фæстæдæрмæ. Фыццаг аргумент сын ахæм æрхастам, ома нæм социалон-экономикон уавæр мæгуырау у, куыст ссарын нæм зын у æмæ уыцы 200 æгуыст адæймагæн та ис 200 бинонтæ. Нæ уавæры бацыдысты æмæ бафыстам ног бадзырд, раст зæгъ-гæйæ та, пролонгаци сарæзтам зæрондæн», – загъта министр.

Бадзырды фæлгæтты цадæггай фылдæр кæндзысты милицийы кусджыты материалон æмæ техникон ифтонгад, куыстмызд æмæ социалон гарантитæ. Адард æй кодтой 3 азы æмгъуыдмæ æмæ цалынмæ йæ рæстæг фæуа, уæдмæ рæнхъон сконды нымæц фæкъаддæр кæныны фарстыл дзырд нал цæудзæнис.

«2022 азы та нæ министрад радон хатт Уæрæсейæ æххуысы хуызы райста 37 хæдтулæджы. Ныридæгæн ифтонг стæм автотранспортæй 95% бæрц. Абон нын иттæг хорз уавæртæ ис, 20 азы уавæртимæ куы абарæм, уæд зæгъæн ис, 2000-æм азты нын кæй нæ уыд элементарон фæрæзтæ нæ службæйон хæстæ гъæдджы-нæй æххæст кæнынæн. Дарддæр дæр нæ материалон ифтонгад хуыздæр кæндзæнис – æнхъæлмæ кæсæм ног æхсæнгæрзтæм, уæлæдарæсмæ, алыгъуызон фæ-лындæнтæм, компьютерон техникæмæ», – банысан кодта Гæззаты лæппу.

Куыстмызд астæуккаг нымадæй фæфылдæр уыдзæнис 5 мин сомы бæрц – рæнхъон кусджытæн къаддæр, бæрнон кусджытæн та фылдæр. Гæззаты Валери куыд зæгъы, афтæмæй Мидхъуыддæгты министрады къухдариуæгадæн, ома министр æмæ йæ хæдивджытæн куыстмызд нæ фæфылдæр уыдзæнис – ацы фæндон принципиалон уыд. Милицийы кусджытæ ‘ввахс рæстæджы сæ куыстмызд райсдзысты фæфылдæргондæй æмæ ма сын бафиддзысты фæлхыгъд дæр 2023 азы 1 январæй.

Тагъд рæстæджы ма нæ рес-публикæйы скусдзæнис æвдисæйнæгты базæйы управленийы системæ «CronosPRO». Министры ныхæстæм гæсгæ ацы системæ стыр ахъаз фæуыдзæнис не мбæстæгтæн паддзахадон лæггæдтæ тагъддæр бакæнынæн.

«Ног системæйæн йæ нысан у, цæмæй гæххæттыл фыст информаци раконд æрцæуа цифрон информацимæ. Цифрон æвдисæйнæгтæ бæрæг фæтагъддæр кæндзысты бирæ куыстуæтты архайды процесстæ. Пайда дзы кæндзысты фæндагон змæлды æдасдзинады инспекцийы, паспортон-визæйон службæйы, миграцийы фæдыл фарстаты управлениты, информацион центры, лицензи æмæ куысты фæдыл бары гæххæттытæ дæттыны хайады æмæ ма æн-дæр службæты. Йæ фæрцы бабæстонгæнæн уыдзæнис егъау гуырахст информацийæн æмæ ма уыцы информацийæн саразæн уыдзæнис анализ дæр. Ацы системæ цыбыртæй рахонæн ис архив, картотекæ – æрмæст цифрон форматы», – бамбарын кодта ведомствойы сæргълæууæг.

Нæ республикæйæн Абхазимæ æнгом ахастытæ кæй ис, уый, кæй зæгъын æй хъæуы, хорзæрдæм бандæвта дыууæ бæстæйы Мидхъуыддæгты органты æмахастытыл дæр. Ӕрæджы Абхазы Мидхъуыддæгты министрады къухдариуæгад сæ министр Вальтер Бут-байы сæргълæудæй кусæгон балцы æрцыдысты нæ республикæмæ.

«Абхазы дæр махмæйау арæзт æрцыд Информацион-координацион центр, фæлæ йæ функцитæ нырма кæронмæ не ‘ххæст кæны, сæ куысты процессы къуылымпыдзинæдтæ нырма бирæ ис. Уымæ гæсгæ сæ делегацийы тынг цымыдис кодта нæ ИКЦ – саразгæ уавæртæ, техникон ифтонгад, куысты процесс. Мах та нæхирдыгæй цымыдис кодтам, нæ абхазаг коллегæтæ куыд скъуыддзаг кæнынц сæ республикæмæ ныццæугæ туристты æдасдзинады фарстатæ, уымæн æмæ сæм уыцы хъуыддаджы ис егъау фæлтæрдзинад. Ацы кусæгон фембæлд нæ ноджы бангом кодта æмæ мæ фидарæй уырны, дарддæр дæр не мгуыст-кæнынад кæй арфдæр кæндзæнис», – загъта Гæззаты Валери.

Гуырдзыстоны митингтæ кæй кæнынц æмæ се ‘хсæнады æндыгъддзинад кæй ис, уый фæдыл бæстæйы президент Гаглойты Аланы хъæппæрисæй республикæйы тыхон структурæтæ раконд æрцыдысты фæтыхджындæргонд режимы куыстмæ. Гæззаты Валери дæр пресс-конференцийы бамбарын кодта, зæгъгæ Ӕдасдзинады советы рабадты фæндон рахастой фæтыхджындæргонд режимы куыстмæ рахизыны тыххæй, фæлæ дзы ныридæгæн тæссагæй ницы ис – у превентивон мадзал.

ДЖИОТЫ Алыксандр