Ирон литературæйы бындурæвæрæг Хетæгкаты Къостайы райгуырæн бон – 15 октябрмæ Дзæуджыхъæуы уынгты фæзындзæн «Къостайы трамвай». Трамвайыл сныв кæндзысты Хетæгкаты Къостайы портреттæ йæ цитатæтæ æмæ æмдзæвгæтимæ. Мидæгæй дзы æрцауындздзысты йæ нывты репродукцитæ, уыцы нымæцы йæ музæ – Цæлыккаты Аннæйы портрет дæр. Тæрхджытыл æвæрд æрцæудзысты ирон поэтты æмæ фысджыты чингуытæ æмæ æмбырдгæндтæ. Бæлццæттæн сæ бон суыдзæн куыд сæ чингуытæ æрбахæссын, афтæ сæ зæрдæмæ цы чиныг фæцæуа, уый ахæссын дæр. Сæвæрдзысты дзы бандæттæ æмæ чысыл стъолтæ, сорганизаци дзы кæндзысты цай, кофе кæм баназой, ахæм зонæ. Куыстытæм æрæвналдзысты сæрды æмбисы, сæххæст сæ кæндзысты бынæттон нывгæнджытæ æмæ дизайнертæ. Вагоны иу фарс уыдзæн Къостайы портрет ирон æвзагыл цитатæимæ, уырыссагау тæлмацæй – «Весь мир – мой храм, любовь – моя святыня, вселенная – Отечество мое».
Царыл уыдзæн ирон фæндыры силуэт, кæцы конд у «Ирон фæндыр»-ы æмбырдгонды æмдзæвгæтæй æмæ дизайнерон фигурæтæй.
Амалиуæггæнæг Хетæгкаты Таир куыд радзырдта, афтæмæй проект среализаци кæнынæн бахъæудзæн 4 милуан сомы бæрц. Проект реализаци кæны амалиуæггæнджыты уыцы къорд, кæцы сæххæст кодта «Сывæллæтты трамвай»-ы проект.
