«Абайты Васо – Фыдыбæстæйон æвзагзонынады историйы уникалон хъуыдыгӕнӕг»

УФ ЗА академик В.М.Алпатов

XIX æнусы нын не сфæлдисæг радта Къостайы, ХХ æнусы та – Васойы. Къоста нын сарæзта ирон аив дзырды хæзнадон, Васо нын сбæлвырд кодта уыцы хæзнадоны дзырды райрæзты фæндаг. Мæ ныхас бафидар кæндзынæн поэт Харебаты Леониды æмдзæвгæ Абайты Васойæн.

Бацыд Иры фарн лæджы хуызы

Æмæ ирон дзырдтæ

Иры згъæлæнты,

Налгъуыт дуртау уидзы…

Уидзы, уидзы, уидзы æмæ

Йæ къухы ирон дзырд

Æндидзы, æндидзы, æндидзы…

Мин азты Ир цæмæ куывта,

Уый йын йе стыр фарн радта…

Афтæ, урс хæхтау, фарны лæг

Ирон дзырдтæ фатдзæф,

Нæмыгдзæфтæй уидзы…

Цинæй йæ уарзон уд сризы

Æмæ уидзы…

Ирон дзырдтæ

Пырхгонд Иры уидзы

Æмæ сæ кæрæдзийыл

Æмпъузы,

Æмпъузы…

Æмæ уый æцæгæйдæр афтæ уыд. Уыцы дзырдтæ цы ‘взӕгты агуырдта, уыдон абон не ‘взонгадӕн зындгонд хъуамæ уой, уымæн æмæ, дзæвгар æнусты дæргъы, кæмдæрты згæ кæуыл схæцыд, уыцы алæмæты дзырдты фæкъахта æрзæткъахæгау, ӕмӕ сӕ, зæрин-гуырдау налхъуыт-налмасау цæхæртæ скалын кодта: фарн, æгъдау, æфсарм æмæ дзӕвгар, дзӕвгар æнд. ах. дзырдтæ. Махӕн та бантысæд нын тагъд рæстæджы ацы дзырдты ӕмбарынад банкъарын.

Абайты Васо рагон ирайнаг лекциты курсы, дзырд фарныл дзургӕйӕ, ӕрхаста ахӕм легендӕ. Уыдис, зӕгъгӕ, адӕймагады царды «сыгъзӕрин дуг». Уыцы дуджы тыххӕй, дам, Овидий йӕ «Метаморфозӕтӕ»-йы фыссы: «фесӕфтис иузӕрдыгдзинад, рӕстдзинад, фӕзындис мӕнгарддзинад», ома, ӕрлӕууыдис адӕймагады ӕгъдаусӕфты райдиан. Уыцы заманы, дам, рагон индиаг мифон паддзахады паддзах Чатья загъта мӕнг ныхас, кӕйдӕр фӕсайдта, ӕмӕ, дам, йӕ фарн алыгъд. Уӕд адӕм кӕрӕдзимӕ фесты: стигъынц, марынц, нал ӕууӕндынц, нал ауӕрдынц кӕрӕдзийыл бинонтӕ дӕр. Васо ма йӕ ныхасмӕ бафтыдта: «Овидий абоны онг куы фӕцардаид, уӕд ма йӕм «атомон ӕнус» дӕр бафтыдтаид, ома, иууыл ӕбуалгъдӕр дуг у «атомон дуг», уымӕн ӕмӕ «атомон ӕнус» адӕймагады скуынӕг кӕндзӕн. (В.И. Абаев. Авеста… Цхинвал, 2016., 55 ф.) Уӕдӕ дзырд фарн ӕрмӕст хорздзинӕдтӕ ӕмӕ амонд, бӕркад нӕ нысан кӕны, фӕлӕ ма: намыс, цыт, уӕздандзинад, рӕстдзинад, хӕлардзинад, иудзырдӕй – ирон адӕмы удварн цахӕм хъуамӕ уа, уый. Ранымайгӕ миниуджытӕ уыдысты Васойы царды принциптӕ. Васойы зонадон архайд дӕр уыдис рӕстдзинадмӕ кувӕгау рӕстдзинадӕй йедзаг, арф хъуыдыджын ӕмӕ диссаджы алӕмӕты ӕвзагӕй фӕлыст. Дунейы ахуыртӕй стӕмтӕн бантыстис зонады бӕрзӕндтӕм схизын, уыцы стӕмтӕй иу – НӔХИ Васо.

Ацы хъуыды та мӕ фӕнды бафидар кӕнын Васойӕн нӕ куырыхон Нафийы цыты арфӕйӕ Васойӕн: «При имени Васо каждому сознательному осетину невольно хочется подняться выше собственного роста, чтобы это имя произносить без смущения.

… В порыве, вызываемое в нас всенародным авторитетом Васо, я вижу его общенациональное нравственное значение, которое трудно переоценить. У нас нет мерила для оценки этого благородного, нравственного влияния на весь народ, особенно на поколения осетин, только вступивших в жизнь и в науку, но создавать и ценить мы обязаны».

Ӕмӕ уымӕн та ӕвдисӕн сты Васойы зонадон фӕллой: Этимологийы («Ирон ӕвзаджы историон-этимологион дзырдуат (4 томӕй)», Ирзонады, Литзонады, Фонетикӕйы, Лексикографи ӕмӕ Лексикологийы, Диалектологийы, Рагисторийы, Нартзонады, Теоретикон ӕвзаг-зонынады ӕмӕ ма дзӕвгар ӕндӕр фадгуыты арф, бындурон иртасӕг. Уӕрӕсейы ӕвзагзонынады теоретиктӕн сӕ зынгӕдӕртӕй Васо цы теоретикон проблемӕтыл бакуыста, уыдон сӕхи фидар бынат ссардтой уырыссаг ӕвзагзонынады. Фӕлӕ йын ӕнӕхъӕн дунейы ахуыртӕ йӕ «Ирон ӕвзаджы историон-эти-мологион дзырдуат»-ӕн цы аргъ скодтой, уы-мӕн та абарӕн ницӕимӕ ис. Банысан кӕн-дзыстӕм уый дӕр, ӕмӕ Васо нымад кӕй цӕуы дунейы Иранзонынады дӕснытӕй сӕ зынгӕ-дӕрыл. Ӕмӕ уымӕн та ӕвдисӕн сты йӕ зона-дон куыстытӕ рагон ирайнаг Авеста ӕмӕ рагон персайнаг ӕвзӕгтӕй.

Ӕрхӕсдзыстӕм дзы иу цалдӕры: «Надпись Дария I о сооружении дворца в Сузе» и «Пятый столбец Бехистунской надписи и антидэвовская надпись Ксеркса»; «Антидэвовская над-пись»; «Древнеперсидские элементы в осе-тинском языке»; «О древнеперсидских личных именах»; «Из иранской ономастики»; «Миф и история в гатах Зороастра»; «Осетинское иливд (диг.), персидское алуфта».

Ӕрхӕсгӕ зонадон куыстытӕ сӕ гуырахстмӕ гӕсгӕ стыртӕ не сты, фӕлӕ сӕ ӕрмӕг иртӕст куыд ӕрцыд, уымӕн та иранистикӕйы иттӕг стыр аргъ скодтой. Стыр, иттӕг стыр зонадон зонӕнтӕ сӕ рабӕрӕг ис. Уыдон рагон сты, суанг нӕ эрӕйы агъоммӕ VII-IV ӕн. ӕрмӕг. Зӕгъын хъӕуы уый дӕр, ӕмӕ сын кӕй ис параллелон тексттӕ эламаг ӕмӕ вавилойнаг ӕвзӕгты.

Сӕрысуангӕй ацы текстты фыстытӕ бӕл-вырд ӕрцыдысты XVII ӕн., фӕлӕ сӕ ахуыртӕ райдыдтой иртасын сӕдӕ азы фӕстӕ, уыдо-нӕй иууыл стырдӕр нысаниуӕг ис Дарий I-джы (нӕ эр.агъ. 522-486 азты) къахтфыстыты ӕр-мӕгӕн. Уый раиртӕста Абайты Васо. «Антидэвовская надпись» бӕлвырд ӕрцыд 1935 азы, ӕмӕ иу афӕдзы фӕстӕ уыцы текст тӕлмац ӕрцыд Абайты Васойы фӕрцы.

Абайты Васо куыд зӕгъы, афтӕмӕй ацы къахтфыст ӕрмӕг у иунӕг, ома йын параллелон тексттӕ нӕ разынд иннӕтау. Дзырд та дам дзы цӕуы ахсджиаг ӕрмӕгыл, зӕгъгӕ, ахеменидтӕ цавӕр мадзӕлттӕ арӕзтой, цӕмӕй зороастриаг дин персаг паддзӕхты ‘рдыгӕй хъахъхъӕд цыдаид ӕмӕ ма йӕ ӕххӕст дӕр кодтаиккой.

Ранымайгӕ куыстытӕ лӕмбынӕг анализ ӕрцӕудзысты, Васойы 120 азы юбилейы цытӕн цы дыууӕтомон чиныг цӕттӕ цӕуы, уый мидӕг. Дыууӕ томы уымӕн зӕгъын, ӕмӕ 1982-1983-1984 азты стажировкӕ цыдтӕн г.Мӕскуыйы ӕвзагзонынады институты. Уым хъуыстон Абайты Васойы лекцитӕм рагон ирайнаг ӕмӕ рагон персаг ӕвзӕгтӕй. Финансон фӕрӕзтӕй мын кӕд зын уыдис, уӕддӕр балхӕдтон магнитофон, фелхӕдтон кассетӕтӕ сусӕг ӕлхӕдӕй (уӕд уыдонӕн сӕрибарӕй ссарӕн нӕ уыд). Васойӕн йӕхицӕй бар райсгӕйӕ, фӕфыстон йӕ лекциты курс. «Авеста»-йы лекциты курс рауагътон мыхуыры (йӕ раздӕры аспиранткӕ, авестолог Виноградова С.П-имӕ) 1915 азы юбилейы цытӕн. Ныр та гӕххӕтмӕ (Авестайы лекцитау) рахастон рагон персаг ӕвзӕгты лекцитӕ ӕмӕ сыл кусӕм, цӕттӕ сӕ кӕнӕм мыхуыры рауадзынмӕ йӕ райгуырдыл 120 азы сӕххӕсты цытӕн. Ӕвӕццӕгӕн, баххӕстгондӕй рауадзинаг уыдзӕн «Авеста» дӕр ӕмӕ ма йӕм ӕфтыд ӕрцӕудзӕн дзӕвгар уӕлӕмхас ӕрмӕг. Ацы дыууӕтомон куыст мыхуыры куы рацӕуа, уӕд зӕгъдзынӕн мӕхицӕн, «уӕгъды нӕ фӕцис мӕ фыдӕбон». Уымӕн ӕмӕ йӕ зонын, лекциты егъау цымыдисон ӕрмӕг кӕй ис ӕмӕ стыр ӕххуыс кӕй бакӕндзысты ӕппӕт дунейы ирайнаг филологийы иртасджытӕн. Абайты Васойы ацы лекциты курсыл иу ӕмӕ дыууӕ ирайнаг филолог не схъомыл ис. Ӕмӕ бӕллын, Иры зӕххыл куы рахъомыл уаид Васойы хуызӕн, фарн, ӕгъдау, ӕфсарм ӕнкъарӕг фӕсивӕд.

Васойы фарнӕй хайджын у, Ирыстон!

БИТАРТИ Зойæ,

филологон зонæдты кандидат, профессор