19-æм январы æппæт Чырыстон дуне бæрæг кæнынц Хуыцауы Дзуарæфтыды бæрæгбон. Ирон адæм æй хонынц Доныскъæфæн.
Уый кадæн нæ республикæйы аргъуанты ацыд бæрæгбонон бакуывдтытæ. 18-æм январы Мады Майрæмы кувæндонмæ æрбацыд бирæ адæм, уыдон куывдтой Дунесфæлдисæгмæ, цæмæй сын ссыгъдæг кæна сæ уд æмæ сæ буар фыдбылызæй. Кадджын мадзæлттæ æмæ бакуывдтытæ цыдысты Сыгъдæг Æртиуон Хуыцауы аргъуаны дæр. Ардæм дæр æрбацыд бирæ адæм. Нæ республикæйы Президент Гаглойты Алан, Парламенты спикер Æлборты Алан æмæ хицауады уæнгтæ хайад райстой Хуыцауы Дзуарæфтыды бæрæгбоны. Дыууæ кувæндоны дæр удсыгъдæггæнæн мадзæлттæ æмæ бакуывдтытæ аххæссыдысты суанг æмбисæхсæвмæ. Уый фæстæ, донаргъуыд райсын кæй бафæндыд, уыдон сæ фæндаг акодтой Дменисы хъæуы Чысыл Леуахимæ. Ам арæзт æрцыд сæрмагонд асин, цæмæй донаргъуыд чи иса, уыдонæн уавæр уа сæхи доны ныннайынæн.
Мадзалы организатор уыд Уæлвæткон уавæрты министрад. Адæмы æдасдзинад та хъахъхъæдтой Мидхъуыддæгты министрады кусджытæ, тагъд медицинон æххуысы машинæ та цæттæ уыд бахуыс бакæнынмæ.
Ам айтынг кодтой хъармгæнæн цатыртæ дæр, цæмæй донаргъуыды фæстæ адæмæн уавæр уа сæ дарæс раивынæн æмæ ма тæвд цай бацымынæн.
***
Бæрæгбонон мадзæлттæ адарддæр сты дыккаг бон дæр. Райсомæй аргъуантæм цыд тынг бирæ адæм, сæ донгарз мигæнæнтимæ. Алчидæр тырныдта аргъуыд дон йæ хæдзармæ ахæссын.
Æдасдзинад сæххæст кæныны нысанæн республикæйы аргъуантæ æмæ аргъуыды бынæттæ райсомæй басгæрстой барадхъахъхъæнæг æмæ Æдасдзинады комитеты инженерон-техникон хайады кусджытæ. Афтæ ма аргъуантæм бахизæнты сæвæрдтой контролон-уадзæн пункттæ. Уымæй уæлдай ма паддзахадон автоинспекцийы кусджытæ сæхгæдтой аргъуантæм бацæуæн уынгтæ, цæмæй шофыртæ тыхстдзинад ма æвзарын кодтаиккой аргъуанмæ цæуджытæн.
УАЗÆГТЫ Марфæ
