27-æм февралы 99 азы сæххæст уыдаид, йæ Райгуырæн бæстæ æгæрон уарзтæй чи уарзта, уыцы зынгæ ахуыргонд, ирон литературæйы æрттиваг стъалы поэт, прозаик, æхсæнадон архайæг, академик Джусойты Нафийыл.
Уыцы бон паддзахадон пантеонмæ, Нафийы цырты размæ æрбацыдысты Хуссар Ирыстоны Президент Гаглойты Алан, Хицауады Сæрдар Джуссойты Константин, Ирыстоны фысджыты æмсæрдар Хъазиты Мелитон, Уанеты Захары номыл зонад-иртасæн институты директор Гаглойты Роберт, ахуыргæндтæ, студенттæ, æхсæнады минæвæрттæ. Дидинджытæ сæвæрыны фæстæ фыссæг æмæ хуыргонды цард æмæ сфæлдыстады тыххæй раныхас кодта Хъазиты Мелитон. Уый банысан кодта, зæгъгæ, «Нафи кæмæн уыдис æмæ кæмæн нал ис, уыцы адæм тæригъæд сты, фæлæ Нафийы хуызæн цы адæмтæн нæ уыдис, уыдон та ноджы тæригъæддæр. Уымæн æмæ, зæгъгæ, Нафи йæ адæмæн, махæн цас сарæзта уыцы хорздзинæдтæ бирæ æндæр адæмтæн ничи сарæзта.
Дарддæр Мелитон банысан кодта, зæгъгæ, абон ам кæй стæм, уый дзурæг у ууыл æмæ йын стыр аргъ кæй кæнæм куыд йæхицæн, афтæ йæ куыстытæн дæр. Раныхасгæнæг бузныг загъта, Нафийы цырты размæ чи æрбацыд æмæ йын йæ райгуырды 99 азы боны цытæн йæ цырты раз дидинтæ чи сывæрдта, уыдонæн се ‘ппæтæн дæр. Бузныджы ныхæстæ ма сæрмагондæй загъта Президент Гаглойты Аланæн дæр, Нафийы цырты размæ æрбацæуын æмæ йын йæ рухс ном ссарыны инициативæ уымæй кæй рацыд, уый тыххæй.
Мелитон ма загъта, зæгъгæ, Октябры революцийы размæ æмæ уый фæстæ Советон Цæдисы сырæзты фæстæ дæр, ирон литературæйæн уæхскуæзæй чи лæггад кодтой уыдон цъус не сты æмæ уыдон рухс нæмттæ дæр мысын кæй хъæуы рæстæгæй-рæстæгмæ. «Уымæй æрмæст уыдон кад нæ бæрзонддæр кæнæм, фæлæ ма – нæхи кад дæр. Нæ кæстæртæн та зонын кæнæм цы кадджын æмæ сын хорз фыдæлтæ уыдис».
ГÆЗЗАТЫ Иван
