Дæ цæст ахæсс дунейыл

Путины визит Австримæ

УФ-йы Президент Владимир Путинæн фæсарæйнаг визит уыд Австримæ. Боны фæткы уыдысты, дыууæ бæстæйæн дæр ахсджиаг чи уыдысты, ахæм фарстатæ. Венæйы Путинмæ æнхъæлмæ кастысты стыр цымыдисимæ. Фембæлд райдыдта Владимир Путин æмæ йæ австриаг коллегæ Александр Ван дер Белены баныхæстæй. Хофбургы галуаны ма Владимир Путин фембæлд Австрийы канцлер Себастьян Курцимæ. Баныхæсты фæстæ къухтæ æрфыстой сразыдзинадыл 2040 азмæ Австрийы уæрæсейаг газæй ифтонг кæныны тыххæй. Афтæ ма Австрийы лидер æмæ канцлеримæ Путин уынаффæ кодта Сирийы, Украинæйы æмæ æндæр ахсджиаг фарстытыл.

Антиуæрæсейаг санкциты ныхмæ

Италийы ног хицауад ралæудзæн антиуæрæсейаг санкциты ныхмæ. Уый цæхгæр у ахæм мадзæлтты ныхмæ. Уый тыххæй фехъусын кодта бæстæйы премьер-министр Джузеппе Конте. Контейы хицауад Уæрæсейы нымайы куыд базарадон-экономикон партнер, афтæ. Парламентаритæ премьеры ныхæстыл сæмбæлдысты къухæмдзæгъдимæ. «Итали æхæстæй æргом уыдзæн Уæрæсейæн, кæцы фæстаг азты дунеон аренæйы сфидар кодта йæ нысаниуæг геополитикон кризистæ аскъуыддзаг кæныны. Нæ ног хицауад ралæудзæн санкцион политикæйы ныхмæ, уæлдайдæр та уыцы санкциты тыххæй, кæцытæ зиан хæссынц Уæрæсейы экономикæйæн», – фехъусын кодта Джузеппе Конте.

Нотæ – дипломатон ахастытæ фехалыны тыххæй

Гуырдзыстоны фæсарæйнаг хъуыддæгты министрад Сиримæ арвыста дипломатон ахастытæ фехалыны тыххæй нотæ. Гуырдзиаг æддагполитикон ведомствойы фехъусын кодтой, зæгъгæ, Сири Абхаз æмæ Хуссар Ирыстоны хæдбардзинад кæй банымадта, уый уыд æнæзакъонон. Уый тыххæй фехъусынчындæуыд ИНО-йы генералон секретарæн дæр.

Йæ къух æрфыста закъоныл

УФ-йы Президент Владимир Путин йæ къух æрфыста АИШ æмæ йе ‘мцæдисонты æнæхæларадон архайдтыты ныхмæ контрсанкциты тыххæй закъоныл. Документмæ гæсгæ, хицауадæн йæ бон у Вашингтоны санкциты ныхмæ мадзæлттæ бакæнын, фæлæ уыцы мадзæлттæ ма хъуамæ хауой æнæмæнгхъæуæг товартæм, кæд æмæ сын Уæрæсейы кæнæ æндæр бæстæты аналогтæ нæй, уæд. Паддзахадон Думæ документ райста 22 майы, Федерацийы Совет та йæ хорзыл банымадта иу къуырийы фæстæ.

​​                         12 азы – дзырдхæссыны тыххæй

Мæскуыйы горæтон тæрхондон украинаг журналист Роман Сущенкойы банымадта аххосджыныл æмæ йын рахаста 12 азы ахæстоны фæбадыны тæрхон Киевы пайдайæн дзырдхæссыны тыххæй.

Хайад нал исдзæн саммиты

Венесуэлæйы Президент Николас Мадуро фехъусын кодта, зæгъгæ, хайад нал исдзæн америкæйаг паддзахадты организацийы саммиты. Уый размæ ацы организацийы рабадты АИШ-ы паддзахадон секретарь Майк Помпео æрсидт Венесуэлæйы уæнгад æруромынмæ æмæ Николас Мадуройы режимыл бæстæтæ-хайадисджыты ‘рдыгæй уæлæмхас æндæвдадмæ, уыцы нымæцы санкцитæ æмæ дарддæры дипломатон изоляцимæ. «Уый у америкæйаг бæстæты организацийы фæстаг генералон ассамблея, цыран хайад исы Венесуэлæйы фæсарæйнаг хъуыддæгты министр, мах тæрхон кæнæм ацы организацийæн æмæ дзы нырæй фæстæмæ хайад нал исдзыстæм», – фехъусын кодта Мадуро. Йæ ныхæстæм гæсгæ, АИШ-ы хицауад ацы организацийы фæлгæтты райтынг кодта шантаж кæныны æмæ æртхъирæнты «фыдракæндон компани» Латинаг Америкæйы бæстæты æппæт хицауадты адресыл. «Организацийæ рахизыны тыххæй цы 24 мæйы хъæуы, уыдонæй уал рацыд 13 мæйы æмæ куы рахизæм, уæд расиддзыстæм бæрæгбон», – загъта Венесуэлæйы президент.

Фæаххосджын æй кодтой дзырдхæссыны

АИШ-ы æфсæддон развæдсгарæн управленийы раздæры кусæг, 58-адзыд Рон Рокуэлл Хансены æрцахстой æмæ йæ аххосджын кæнынц дзырдхæссынæй Китайы пайдайæн. Нæлгоймаджы баурæдтой 3 июны горæт Сиракьюзæй Китаймæ куы хъуамæ ратахтаид, уæд. Уый хайад иста алыгъуызон конференциты развæдсгарæн управленийы æфсæддонтæ æмæ кусджыты хайадистæй æмæ райсгæ зонæнтæ лæвæрдта Китайы спецслужбæтæн.

Гуманитарон æххуыс

Сирийы фидыдады уæрæсейаг центры минæвæрттæ Хомсы провинцийы цæрджытæн байуæрстой 4 тоннæйы бæрц гуманитарон æххуыс хæлцадон продуктты хуызы. Медицинон æххуыс бакодтой 107 бынæттон цæрæгæн. Заафраны администрацийы сæргълæууæг Юсеф Мендур арфæйы ныхæстæ загъта уæрæсейаг æфсæддонтæн. Сирийы хæстон конфликт райдыдта 2011 азы. ИНО-йы бæрæггæнæнтæм гæгæ уыцы рæстæджы фæмард сты 220 мин адæймагæй фылдæр.

Бардзырд радта

Ираны Уæлдæр лидер Аятолла Али Хаменеи бардзырд радта, цæмæй Ираны атомон энргийы фæдыл организаци æвæститатæй райдайа ураны схъæздыг кæнын 190 мин ЕРР æмвæзадыл. Аятолла фехъусын кодта, зæгъгæ, Иранæн йæ бон нæу уыцы иурæсæтджы санкциты æмæ «ядерон цæстдарды» бын уæвын. Ираны Уæлдæр лидер ныфс бавæвæрдта «дæсхаттон» дзуапп знаджы ныхмæ.

Фембæлд уыдзæн Сингапуры

АИШ-ы Урс хæдзары фехъусын кодтой Трамп æмæ Цæгат Кореяйы лидер Ким Чен Ыны фембæлды бынат. Фембæлд уыдзæн Сингапуры Сентосы сакъадахыл. Урс хæдзары пресс-секретарь Сара Сандерсы ныхæстæм гæсгæ баныхæстæ уагъд æрцæудзысты «Капелла»-йы отелы.

Вулканы скалд

Гватемалы вулкан Фуэгойы срæмыгъды фæстиуæгæн фæмард 69 адæймаджы, 46  райстой алыгъуызон трвмæтæ æмæ 192 адæймаджы та нымад сты æбæрæгæй сæфтыл. Эвакуаци æрцыдысты 3,26 мин адæймаджы, рæстæгмæ æмбæхсæндæтты æрбынат кодтой 1,68 мин адæймаджы. Вулкан Фуэго ис Гватемалы столицæйæ цалдæр дæс кило-метры дæрддзæгæн. Гватемалы баконд æрцыд æртæбонон фыдох фæмардуæвджыты номыл. Ныртæккæ вулкан æрса-быр.

Информацион агентадты хъусынгæнинæгтæм гæсгæ