Республикæ Хуссар Ирыстоны Культурæйы пресс-службæйы нын куыд фехъусын кодтой, афтæмæй 11-æм майы Санкт-Петербурджы Чехойты Асланы Ног музейы байгом хуссарирыстойнаг æвзонг нывгæнджыты равдыст «Цхинвал 5», кæцы аххæсдзæнис 25-æм июнмæ. Ацы равдысты сæрмагондæй хайад исынц фондз курдиатджын нывгæнæджы: Саулохты Георги, Кокойты Мария, Æлборты Лирæ, Дзи-гойты Каринæ æмæ Дыгъуызты Мария. Уыдон уы-рыссаг аивадуарзджыты тæрхонмæ рахастой 60 куысты бæрц æндæр æмæ æндæр темæтыл хуызфыссынад, графикæйы æмæ æндæр жанрты. Экс-позици у цымыдисон, нывгæнджытæ йæм бахастой сæ равзаргæ куыстытæ.

Хуссарирыстойнаг нывгæнджыты фарсмæ балæууыны тыххæй æмæ равдыст байгом кæныны цытджын церемонийы хайад райсыны сæраппонд равдыстмæ фæуазæг Культурæйы министр Зæгъойты Рада дæр. «Санкт-Петербурджы ирон диаспорæйы минæвæрттæ саккаг кодтой æмæ æрбацыдысты мадзалмæ. Уыдон нымæцы уыдысты не ‘мзæххон, зындгонд нывгæнæг Къадзты Вадим, Бæззаты Скиф. Нырыккон аивæдты Ног музейы директор Коцты Иринæ æмæ йæ коллегæ Коцты Фатимæйæн РХИ-йы Культурæйы министрады номæй Зæгъойты Радæ радта арфæйы фыстæджытæ, афтæ ма сын балæвар кодта РХИ-йы Национ банчы уагъд æвзист монетæтæ», – фехъусын кодта Культурæйы министрады пресс-нымæрдар Хуыгаты Аланæ. Уый ма нын куыд радзырдта, афтæмæй Зæгъойты Радæ равдысты адæмæн сæргом кодта ацы æрыгон курдиатджын нывгæнджытæ аивады уæндон къахдзæфтæ кæй аразынц æмæ æдзух сæхиуыл кæй кусынц, уыцы тырнындзинад сæм ис.

«Цхинвал 5» – Санкт-Петербурджы уазджытæ

Республикæ Хуссар Ирыстоны адæмон нывгæнæг Бæззаты Андрей (Скиф) арфæ ракодта йæ коллегæтæн æмæ стыр бузныджы ныхæстæ загъта равдысты организатортæ æмæ нæ бæстæйы сæргълæууæг Гаглойты Аланæн æрыгон нывгæнджыты фарсмæ кæй балæууыдысты æмæ сын фадат кæй радтой, цæмæй сын се сфæлдыстадæн саргъ кæной Санкт-Петербурджы аивадуарзджытæ дæр. «Ацы культурон цау у ахсджиаг, фыццаджыдæр, уымæй æмæ хуссарирыстойнаг нывгæнджытæн Уæрæсейы цæгаттаг столицæйы ахæм культурон артдзæсты фæзуаты сæ куыстытæн равдисыны фадат кæй фæцис, уый», – загъта Бæззаты Скиф.

Равдыст уадзынц Хуссар Ирыстоны Культурæйы министрад æмæ Чехойты Асланы Ног музей, Республикæ Хуссар Ирыстоны Президент Гаглойты Аланы æххуысæй.

ЦХУЫРБАТЫ Ларисæ

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.