Æрвылаз дæр июны мæйы æртыккаг хуыцаубоны Уæрæсейы банысан кæнынц медицинон кусæджы бон. Ацы бон у хуссарирыстойнаг медикты профессионалон бæрæгбон дæр.
Сомбоны дохтыр уæлдæр медицинон ахуырадон уагдон каст фæуыны фæстæ бакæсы Гиппократы ардбахæрд. Рагон грекъаг дохтыр Гиппократ йæ цард снывонд кодта медицинæ æмæ этикæйæн. Уымæн уыд ахæм принцип, зæгъгæ, алкæцы пациентмæ дæр хъæуы индивидуалон ахаст дарын. Гиппократ йæ куысты домдта пациенттæм аудгæ ахаст дарын æмæ этикон нормæтæ хъахъхъæнын. Уый бакуыста йæхи сæрмагонд кодекс рагон грекъаг дохтыртæн, кæцы фæстæдæр зындгонд ссис, куыд «Клятва Гиппократа», афтæ. Ацы нормæтæ афтæ ахсджиаг уыдысты, æмæ апарахат сты æнæхъæн дунейыл. Хуссарирыстойнаг медицинон къабазы кусджытæ Гиппократы ардбахæрдыл æнувыд кæй сты, уый ирдæй фæбæрæг 2008 азы августы тугуарæн хæсты рæстæджы.
Абон, уыцы трагикон цаутæй 15 азы фæстæ республикон соматикон рынчындоны дохтыртæ сæхæдæг дæр дис кæнынц, уыйбæрц тыхтæ æмæ сæм энерги кæцæй цыд, зæгъгæ. Æнæ æрулæфгæйæ æмæ нæ фынæйæ, æнæ хæринагæй, операцион стъолтæй æнæ ахизгæйæ, уыдон уæззау уавæрты ныккæнды сарæзтой 229 операцийы! «Нæ дохтыртæ цы сарæзтой, уый у стыр диссаг. Мæ коллегæты куыстмæ куы кастæн, уæд мæ дисæн кæрон нал уыд. Хирургтæ Бестауты Айвар, Остъаты Александр, Григорий Кулиджанов æмæ Зæгъойты Николай, уролог Джиоты Витали, медицинон хотæ æмæ санитаркæтæ фондз боны уыдысты ныккæнды æмæ æхстыты бын уæззау уавæрты арæзтой операцитæ, адæмы цард ирвæзын кæнгæйæ. Уый æцæг хъайтардзинад у», – дзуры дохтыр-реаниматолог Харебаты Жаннæ.
«Тагъдыл ныккæндмæ æрхастам операцион стъолтæ, инструменттæ æмæ æндæр медицинон æрмæджытæ. Æнæхъæн хæсты бафынæй кодтон æрмæст цалдæр сахаты. Æрбаиу нæм сты Медойты Вадим, Цыбырты Константин, Тыджыты Алик, Джыккайты Томас, Гæджиты Костя. Уыдон нын цыма Хуыцауæй æрвыст уыдысты, афтæ рауад. Хицæнæй мæ фæнды Бестауты Айвары тыххæй зæгъын. Нымайын æй хирургийы иттæг хорз дæсныйыл. Уый арæзта иууыл вазыгджындæр операцитæ. Хæсты фыццаг æхсæв рынчындонмæ æрбаластой 140 цæф адæймаджы», – йæ зæрдыл æрлæууыдысты тæссаг цаутæ уролог Джиоты Виталийæн.
Рынчындонмæ удæгасæй кæй баластой, уыдоны се ‘ппæты дæр дохтыртæ аирвæзын кодтой. Нæ сын бантыст æрмæст цæгатирыстойнаг бархион лæппу Æгъуызарты æвзонг лæппуйы аирвæзын кæнын. Хъыгагæн, æхстыты аххосæй æрæгмæ йæ æрбаластой рынчындонмæ æмæ фесæфта бирæ туг.
«Ахæм операцитæ сарæзтам, æмæ, бауырнæд уæ, сабыр рæстæджы æмæ нормалон уавæрты ахæмтæ никуы сарæзтам. Фæстæдæр мæскуыйаг дохтыртæ стыр дис кодтой, уæззау уавæрты ахæм æнтыстджын операцитæ куыд сарæзтой, зæгъгæ», – загъта Константин Серветник.
Уыцы тугуарæн хæсты рæстæджы сæхи цардæн тæссаг уавæрты, цæфты цард чи ирвæзын кодта, уыдонæй алкæйы кой ракæнынæн чингуытæ фыссын хъæуы. Бирæ сты уыцы хъæбатыр медиктæ.
Хуссар Ирыстоны медицинон къабазы зынаргъ кусджытæ, 18-æм июны нысан кæнут уæ профессионалон бæрæгбон æмæ уын газет «Хурзæрин»-ы коллектив дæр арфæ кæны уæ бæрæгбоны цытæн.
Нæ уацх.
