Ӕрæджы, Уæрæсейы карз нозт сидрæй фæхъæстæ æмæ амардысты 31 адæймаджы, 100 фылдæр та дзы бахаудтой рынчындонмæ. Уыцы тæссаг карз нозты нæмттæ хуыйнынц «Мистер Сидр» æмæ «Мистер лис». Арæх уыдысты нæ дуканиты тæрхджытыл дæр. Цæмæй нæ цæрджытæ хызт уой фыдбылызæй, уый тыххæй милицийы экономикон фыдракæндтæ ма æруадзыны управленийы кусджытæ азылдысты республикæйы базарадон объекттыл. Рейдон мадзæлтты рæстæджы бæлвырд кодтой, ацы карз нозтытæ ис уæййаг æви нæ. Базарадон объектты хицæуттимæ та кодтой профилактикон ныхас, æмбарын сын кодтой ацы карз нозты тæссагдзинад æмæ сæ фæдзæхстой, цæмæй дзы ма æлхæной.
Горæт Цхинвалы дæр рейдон мадзæлттæ уадзынц фадыгон инспектортæ патрулон-постон службæйы кусджытимæ иумæ. Рейдты рæстæджы бæрæг кæнынц дуканиты æмæ агурынц æрмæст тæссаг карз нозтытæ нæ, фæлæ ма энергетикон нозтытæ æмæ электрон сигареттæ. Иу дуканийы баййæфтой уæййаг фондз банкæйы энергетикон нозтытæ æмæ сæ сконфискаци кодтой. Фæткхалæгыл баконд æрцыд административон суагъæ.
Уæрæсейы уыцы тæссаг нозт уадзынц самарæйаг компани ООО «Анди»-йы хисæрмагонд бæгæныфыцæн заводы æмæ дзы 5-æм июны фæхъæстæ сты адæм. Экспертизæйы руаджы рабæрæг ис, сидры сконды кæй уыдис марг буарадтæ «этилбутират» æмæ «метанол». Куыстуаты хицауы æрцахстой.
Мидхъуыддæгты министрад сиды цæрджытæм, цæмæй сæхи хизой æрмæст ацы нозтытæй нæ, фæлæ ма кæцыфæнды зæрдæхсайгæ товарæй дæр. Контрафактон продукци арæх у, уæлдайдæр та алыгъуызон нозтытæ, æмæ хи хъахъхъæнын хъæуы. Ныридæгæн æгас Уæрæсейы территорийыл барадхъахъхъæнæг органтæ уадзынц рейдон мадзæлттæ æмæ конфискаци кæнынц æппæт зæрдæхсайгæ нозтытæ. Кæд æмæ уæ зæрдæ æхсайы искæцы дуканимæ кæнæ æндæр базарадон объектмæ, цыран уæййаг ис тæссаг товар, уæд фæдзурын хъæуы мæнæ ахæм номыртæм:
8 929 808 02 01, 45-21-02.
ДЖИОТЫ Алыксандр
