Ног ахуыры азы ралæудимæ фæфылдæр вæййынц барадхъахъхъæнæг органты службæйон хæстæ дæр – райдайынц сæ фембæлдтытæ ахуырдзаутимæ æмæ аныхас кæнынц семæ алы темæтыл. Ахæм профилактикон фембæлдтытæ райдыдтой горæт Цхинвалы астæуккаг скъолатæй – фыццæгæм астæуккаг скъола æмæ скъола «Альбион»-мæ фæуазæг сты милицийы æнахъомты фæдыл фарстаты инспекцийы æмæ прокуратурæйы кусджытæ.
Фембæлды рæстæджы инспектортæ ахуырдзаутæн æрдзырдтой, карз нозтытæ стыр зиан кæй хæссынц адæймагæн, скъолайы уæвгæйæ сæ дисциплинæ кæй хъуамæ уа æмбæлон æмвæзадыл, урокты рæстæджы горæты уынгты иу ахуырдзау дæр кæй ма хъуамæ уа, æхсæнадон бынæтты уæвгæйæ уагахастыл æмæ афтæ дарддæр.
«Фыццаджыдæр сымах хъуамæ хицæн кæнат æвзæр хорзæй æмæ уымæ гæсгæ иват уæ уагахаст, уæ архайд. Арæх вæййут æвдисæн, уе ‘мцахъхъæнтæ уынгты æвзæр æвзагæй кæй фæдзурынц, сæ уагахаст куы нæ фæбæззы, карз нозтытæ куы фæнуазынц. Ӕппæт ацы æв-зæрдзинæдтæй сымах уæхи хъуамæ хизат æмæ уæд махмæ дæр ницы фарстатæ уыдзæнис, бæрндзинадмæ кæнинаг нæ уыдзыстут. Сымах æй хъуамæ зонат, 16 азы онг кæуыл цæуы, уыдоны тыххæй бæрндзинад кæй хæссынц ныййарджытæ. Уый фæстæ та уæхæдæг уæ алы къахдзæфæн дæр дæтдзыстут дзуапп æмæ абоны бон иу æнæсæр ми куы саразай, уæд дын цæрæнбонтæм дæ фæндæгтыл цæлхдуртæ æвæрдзæнис. Хъæуы уæ ахæм фидæн?», – загъта ахуырдзаутæн горæт Цхинвалы милицийы управленийы æнахъомты хъуыддæгты фæдыл инспекцийы хайады сæргълæууæг Гатайты Лали.
Уымæй уæлдай ма æрдзырдтой ахæм актуалон темæтыл, куыд электронон сигареттæ æмæ энергетикон нозтытæ. Ахуырдзауты карзæй бафæдзæхстой, цæмæй сæхи хизой ацы ног фæзынгæ æвзæрдзинадæй æмæ ма фæзмыной, раст фæндагыл чи нæ ллæууы, ахæмты. Фæткхалджытæ æфхæрд цæудзысты æмæ ма дзы æнæмæнг маст æрхаудзæнис сæ ныййарджытæм дæр.
Арæх ма æнæххæст кары сывæллæттæ фескъæрынц автомашинæтæ дæр æмæ уый дæр фæткхалæн цауыл дзурæг у. Стæй ма æвдисæн вæййæм æнамонд цаутæн дæр, æнæххæст кары сывæллоны аххосæй куы æрцæуы авари æмæ дзы куы æрцæуы уды зиæнттæ. Милицийы æрдыгæй стыр хъусдард ис ацы проблемæмæ æмæ сæ дарддæр дæр карзæй æфхæрдзысты.
Профилактикон фембæлдты фæстæ барадхъахъхъæнæг органтæ ауагътой рейдон мадзæлттæ дæр, цæмæй сбæрæг кæной скъоладзауты дисциплинæйы æмвæзад. Урокты рæстæджы азылдысты пионерты парчы æмæ ма æндæр тезгъогæнæн бынæтты, кафеты æмæ компьютерон хъазæн залты. Рейдты рæстæджы фембæлдысты цалдæр скъоладзауыл – дыууæйæ дзы тезгъо кодтой парчы, иннæ дыууæйы та – баййæфтой компьютерон хъазæн залы. Ныр уал сæ бафæдзæхстой æмæ сæ арвыстой уроктæм, фæлæ сæ дарддæр та бæрндзинадмæ кæндзысты – фæдзурдзысты сын сæ ахуыргæнджытæм æмæ сæ ныййарджытæм дæр.
Ахæм профилактикон фембæлдтытæ уагъд æрцæудзысты алкæцы скъолайы дæр. Рейдон мадзæлттæ дæр уагъд цæудзысты арæхдæр. Уымæй уæлдай ма инспектортæ изæрыгæтты дæр зилдзысты уынгты, цæмæй æнафон рæстæджы ахуырдзаутæ уой сæ хæдзæртты. Ӕппæт ацы мадзæлттæ нысанмæздæхт сты, цæмæй скъоладзаутæн фадат ма уа æвзæрдзинад саразынæн, уой барадхъахъхъæнæг органты цæстдарды бын.
Джиоты Алыкандр
Comments are closed, but trackbacks and pingbacks are open.