СКОНФИСКАЦИ КОДТОЙ ЭНЕРГЕТИКОН НОЗТЫТÆ
Нæ дуканиты тæрхæджытыл рагæй фæстæмæ энергетикон нозтытæ кæй нал ис, уый бирæтæ хатгæ дæр нал ракæнынц. Фæлæ уыдис рæстæг, æмæ ацы тæссаг химикон нозтытыл нæ фæсивæд тынг фæцайдагъ сты, æгæрыстæмæй ма скъоладзаутæ дæр ныххæцыдысты ацы æвзæрдзинадыл. Ӕмæ хуымæтæг нозтæй бирæ фылдæр зиан кæй хæссы адæймаджы организмæн, уый та сбæлвырд кодтой сæ иртасæн куыстыты дохтыртæ.
2012 азы нæ республикæйы Парламент закон рахаста, цæмæй Хуссар Ирыстоны территоримæ энергетикон нозтытæ ласыны æмæ уæй кæныны бар мауал уа. Уæдæй фæсæтæмæ фæткхалджыты закъоны фæлгæтты ивар кæнын райдыдтой, сæ товар та-иу конфискаци æрцыдис. Ацы къахдзæф саразыны фæстиуæгæн нæ фæсивæды бахызтам фыдбылызæй æмæ ныридæгæн энергетикон нозтытæн сæ кой дæр нал ис, кæд æмæ дзы Уæрæсейы та абоны бон дæр фæсивæд сæфты къахыл лæуд сты, уæддæр.
Милицийы экономикон фыдракæндтæ ма æруадзыны управленийы(УБЭП) кусджытæ арæх азилынц базарадон объекттыл, цæмæй амалиуæггæнджытæ ма халой фæтк. Ахæм рейдты рæстæджы фæстаг азты энергетикон нозтытæ никуыуал байстой, – æдæппæт цалдæр хатты æмæ сæ бæрц та – хæрзцъус.
Ӕрæджы та ахæм рейдон мадзæлттæ ауадзыны рæстæджы УБЭП-ы кусджытæ Цхинвалы мидхъуыддæгты управленийы кусджытимæ иумæ иу дуканийы ссардтой энергетикон нозтытæ. Ӕдæппæт уыдысты цалдæр тыхтоны 150 иуæджы бæрц æмæ конфискаци æрцыдысты. Куыд рабæрæг, афтæмæй ацы нозтытæ сусæгæй уæй кодта дуканийы уæйгæнæг. Фæткхалæгыл баконд æрцыдис административон суагъæ, кæцы æрвыст æрцæудзæнис горæт Цхинвалы тæрхондонмæ. Йæ ивар у 2 минæй 5 мин соммæ.
Ацы цауы фæдыл мæ бахатын фæнды нæ республикæйы амалиуæггæнджытæм, цæмæй Хуссар Ирыстонмæ реализаци кæнынмæ ма ласой ацы тæссаг нозтытæ. Ам дзырд иварыл нæ цæуы, нæдæр фæтæрсын кæныныл, фæлæ – нæ сомбоныл.
ДЖИОТЫ Александр
Comments are closed, but trackbacks and pingbacks are open.