Цхинвалы уагъд æрцыд блицæй РХИ-йы чемпионат шахматтæй. Ерыстæ уагъд цыдысты шахматон скъола «Белая ладья»-йы. Уырдæм хуынд æрцыдысты республикæйы иууыл тыхджындæр шахматисттæ, афтæ ма дзы сæ тыхтæ бафæлвæрдтой цалдæр скъоладзауы дæр.
Уыдон ‘хсæн уыд æвзæнгты ‘хсæн республикæйы иууыл цæттæдæр шахматисттæй иу – Джыгкайты Артур дæр.
Ерысты хайадисджыты ‘хсæн уыд иунæг чызг – Уанеты Валерия, кæцы ныр дыккаг хатт ерыс кæны хистæр кары спортсментимæ.
Транскамы фæндаг æхгæд кæй уыд, уый аххосæй йæ бон не ссис Цхинвалмæ æрцæуын республикæйы ивгъуыд азы чемпион Сиукъаты Аланæн. Фæлæ уымæ нæ кæсгæйæ йæ бон ссис ерысты хайад райсын. Йемæ хъазыдысты интернеты фæрцы.
Чемпионаты уагæвæрдмæ гæсгæ алы хъазæг дæр иннæтимæ акодта фæйнæ иу хъазты. Партитæ иууылдæр акæнгæйæ РХИ-йы чемпион ссис Саулохты Георги, дыккаг бынат бацахста Сиукъаты Алан. Æмхуызон очкотæ æрæмбырд кодтой æмæ æртыккаг бынат адих кодтой Гæбæраты Ацæмæз æмæ Къодоты Андрей.
АРМСПОРТ
Горæт Орелы уагъд æрцыд фæси-вæд æмæ æвзæнгты ‘хсæн Уæрæсейы чемпионат армспортæй. Ерысты тынг хорз бæрæггæнæнтæ равдыстой хуссарирыстойнаг спортсментæ. Уый тыххæй хъусын кæны тренер Джиоты Валери. Фæсивæды ‘хсæн ерысты 80 кг уæзы категорийы аккаг ныхмæлæууæг нæ разынд Хæбæлаты Арсенæн. Уый рахиз къухæй финалы рамбылдта Свердловскы областы минæвары, галиу къухæй та фæуæлахиз дагъыстайнаг спортсменыл.
Æвзæнгты ‘хсæн та сыгъзæрин майданы хицау ссис Джиоты Родион. Уый йæ ныхмæлæуджытæй тыхджындæр уыд куыд рахиз, афтæ галиу къухæй дæр.
Иууыл уæззаудæр уæзы категорийы (+80 кг) та рахис къухæй иууыл цæттæдæр разынд Кокойты Давид.
ХАЙАД РАЙСТОЙ ЕРЫСТЫ
Хорз та сæхи равдыстой хуссарирыстойнаг ленкгæнджытæ. Бантыст сын Æппæтуæрæсейон ерыстæ «Mad Wave Challenge» дыккаг этапы æртæ майданы рамбулын. Турнир уагъд цыд Мæскуыйы областы горæт Рузайы. Хайад дзы райстой Уæрæсейы 21 субъектæй 662 спортсмены. Хуссар Ирыстоны командæйы уæнгтæй ерысты æвзист призер ссис Тыджыты Дианæ. Уымæн ахæм æнтыст йæ къухты бафтыд баттерфляйæ 100 метрмæ ленк кæнгæйæ. Дыууæ бронзæ майдан та рамбылдта Уалыты Даянæ баттерфляйæ 100 метрмæ æмæ фæсонтыл 100 метры дæрццæгмæ ленк кæнгæйæ. Спортсменты тренер у Евгения Терлеева.
Хуриты Батрадз
Comments are closed, but trackbacks and pingbacks are open.