Æппæтуæрæсейон конкурс «Учитель года России»-йы регионалон этапы уæлахиздзау ссис ахуырады центр «Эрудит»-ы историйы ахуыргæнæг Багаты Ибрагим. Сæйраг хорзæх райста РЦИ-Аланийы Сæргълæууæг Сергей Меняйлойы къухæй – уæлахиздзауы диплом, статуэткæ æмæ сертификат иу милуан сомæн. Уый тыххæй хъусын кæны Цæгат Ирыстоны ахуырады министрады пресс-службæ.
Уымæй дарддæр ма Багаты Ибрагим Цæгат Ирыстоны номæй хайад исдзæн æппæтуæрæсейон конкурсы кæройнаг этапы æмæ тох кæндзæн бæстæйы хуыздæр ахуыргæнæджы ном райсыны тыххæй. Æцæг ахуыргæнæг уæвын професси нæу, фæлæ, растдæр зæгъгæйæ, ныхыфыст. Ахсджиаг у æрмæст зонындзинæдтæ радтын нæ, фæлæ алы сывæллонæн дæр хæлар, хъомылгæнæг суæвын. Багаты Ибрагим уроктыл пайда кæны æрмæстдæр ахуырады нырыккон методтæй. Цалдæр мæйы размæ уый фыццаг бынат бацахста Æппæтуæрæсейон конкурс «Педагогический дебют-2022»-йы. Алы этапы дæр йæ фарсмæ вæййынц йæ уарзон ахуыргæнинæгтæ æмæ коллегæтæ.
Ирон æвзаг æмæ литературæйы хуыздæр ахуыргæнæг та ссис Дзæуджыхъæуы 7-æм астæуккаг скъолайы ахуыргæнæг Габуты Маринæ.
