РХИ-йы автомобилон фæндæгты арæзтад æмæ эксплуатацийы фæдыл комитеты нын куыд хъусын кодтой, афтæмæй Гром-Цъинагары фæндаг цалцæг цæуы. Фæстаг рæстæджыты цы тæрккъæвдатæ уарыд, уыдон фæстиуæгæн фæндаг ранæй-рæтты бахъыгдард. Цъыфы лæсæнтæ фæндаджы уæлцъар бахордтой. Фæндаг бирæ рæтты цæуы хъæдгæрæтты, уымæ гæсгæ лæсæн бынæтты саразын хъуыд лæбырдуромæн къултæ. Кусджытæ ныр, фæндаг кæм фехæлд, уыцы бынæтты исынц сыджыты уæлцъар, фæндагыл лыстæг хуыр калынц æмæ йæ стæй уый фæстæ ныннæмынц. Фæндаджы фæрсты цы донлæдæрсæн къанаутæ ис, уыдоны дæр сыгъдæг кæнынц.
Гром-Цъинагары фæндаджы дæргъ у 15 километры. Фæндаг сырæзт 2019 азы Инвестпрограммæйы фæлгæтты, йæ арæзтадæн хицæн æрцыд 225 милуан сомы. Сарæзта йæ Паддзахадон унитарон куыстуат «Дорэкспострой».
Рагæй фæстæмæ дæр Цъинагары хъæуы цæрджытæ стыр зындзинæдтæ æвзæрстой рæстмæ фæндаг сæм кæй нæ уыд, уый аххосæй. Фынддæс километры дæрддзæгæн фæндагыл сæрдыгон бон дæр зынтæй цыдысты машинæтæ, зымæгон æмæ къæвдабонты рæстæджыты та бынтон хъизæмайраг уыдысты. Уымæ гæсгæ цъинагайрæгтæ цыдысты æндæр, дæрддзæфдæр чи уыд, ахæм фæндагыл. Цъинагарæй Цхинвалмæ уыцы фæндагыл хъуыд дыууæ сахаты æмæ æрдæг цæуын. Ног фæндаг æртæ хатты фæцыбырдæр, раздæр кæуылты цыдысты, уыцы фæндагæй. Уымæ гæсгæ цъинагайрæгтæн бирæ фенцондæр ацы фæндаджы сырæзтæй. Цыфæнды æрдзон катаклизмты æрцыдмæ дæр цæттæ хъуамæ уой æмбæлон службæтæ. Кæд фæндаг ныртæккæ цалцæг æрцыд, уæддæр, цалдæр боны фæндагыл транспорт кæй нæ цыд, уый бахынцинаг у.
Уазæгты Марфа
