Президент Гаглойты Алан йæхимæ райста дзуттæгты культурæ, традицитæ, ахуырад æмæ зонадæн æххуысы æмæ рæзты фæдыл Фонды бындурæвæрæг Михаил Черновы, Республикæ Беларусы европæйаг интеграцийы проблемæты фæдыл центры директор, политолог Юрий Шевцовы æмæ Национ иртасæн университет-Экономикæйы уæлдæр скъолайы профессор, философон зонæдты доктор Юрий Плюснины.
Уазджытæ Цхинвалмæ æрцыдысты киноныв «Ценность мира. Юлиус и Этель Розенберги»-йы презентацимæ. Киноныв æрæджы æвдыст æрцыд ХИПУ-йы.
Паддзахады Сæргълæууæг раарфæ кодта уазджытæн.
«Мах абон радон хатт хъæуы нæ истори, нæ абоны бон, нæ фидæн бахъахъхъæнын. Уæрæсейы Федерацийы алыварс æрбангом сты уæрæсейаг дунейæ йæхи чи хоны, ахæм бæстæтæ. Йæ цæрджытæ сæ фидæн уынынц ахæм конструкцийы, кæцы сарæзта абон УФ-йы Президент Владимир Путин.
Æз æй зонын, сымах фыццаг хатт кæй не стут ам, бузныг уын ахæм зын рæстæджы нæм кæй æрцыдыстут. Махæн тынг æхсызгон у уæ уынд» – загъта Гаглойты Алан.
Михаил Чернов Президентæн зæрдæбын бузныг загъта:
«Мæнæн æхсызгон у Хуссар Ирыстонмæ æрцæуын. Куыд Республикæ Хуссар Ирыстоны æмбæстаг, куыд хæлар, афтæ æз мæхи нæ хицæн кæнын нæ республикæйæ. Хуссар Ирыстоны адæм дæр слæууыдысты Райгуырæн зæхх хъахъхъæнынмæ сæрмагонд æфсæддон операцийы фæлгæтты æмæ цæттæ сты æххуысмæ. Уымæн, кæй зæгъын æй хъæуы, Мæскуыйы аргъ кæнынц», – загъта уый.
Михаил Чернов Президентæн радзырдта фильмы тыххæй, æмæ ба-нысан кодта, уый ахсджиаг кæй у дунейы ныры уавæры.
«Мах æрхастам киноныв, кæцы систа Дзуттæгты культурæйы æххуысы фонд. Киноныв у сабырад æмæ Розенбергты тыххæй, стæй нæ цы хъæуы куыд Хуссар Ирыстоны, афтæ Уæрæсейы, æмæ æппæт дунейы ацы конфликты эскалаци аиуварс кæныны тыххæй, кæцытæ тас сты æппæт æхсæнадæн. Киноныв равдыстам ХИПУф-йы. Тынг хорз студенттæ уын ис. Уыдон æм стыр цымыдисимæ кастысты», – загъта Михаил Чернов.
Йæ рады Юри Щевцов банысан кодта, Хуссар Ирыстоны паддзахад аразыны фæлтæрддзинад, йæ зын географион уавæр хынцгæйæ. Уый ма загъта, зæгъгæ, цæттæ кæй у куыд эксперт афтæ æххуыс бакæнын Республикæ Беларусиимæ ахастытæ рауæрæх кæнынмæ.
Уазджытæ ма банысан кодтой, республикæйы цы позитивон ивындзинæдтæ æрцыд уый æмæ адæмы уазæгуарзондзинад.
Юрий Плюснин радзырдта Цæгат Ирыстоны йæ иртасæн куысты тыххæй.
Фембæлды кæрон Гаглойты Алан банысан кодта, лæмбынæг йæ хъус кæй дары Уæрæсейы æмæ Беларусы цы цаутæ цæуы, уыдонмæ æмæ загъта, зæгъгæ, ахсджиаг хъуыддаг у ахæм зын рæстæджы нæ кæрæдзийы фарсмæ æрбалæууын.
Дыууæ ныхасы зæгъдзыстæм Михаил Черновы тыххæй. Райгуырд 1979 азы. Каст фæцис Адæмты хæларады уæрæсейаг университет социологийы дæсныйады фæдыл. У проект «Россия-Евразия»: культурная политика в деле укрепления межнационального мира и межрелигиозного согласия»-йы проекты къухдариуæггæнæг. Цымыдис кæны Уæрæсейы æмæ Æввахс Скæсæны экономикæ æмæ политикæмæ.
Михаил Чернов арæх æрцæуы Хуссар Ирыстонмæ. Уый тынг уарзы нæ бæстæ æмæ йæ адæмы. У нæ республикæйы æмбæстаг.
