Азæй-азмæ нæ чысыл хъайтар горæт рæсугъдæй-рæсугъддæр кæй кæны, уый махæй алчидæр уыны. Ацы хъуыддагмæ се стыр хайбавæрд хæссынц горæт Цхин-валы администрацийы цур хæрзарæзтады комбинаты кусджытæ. Хуыцаубонæй дарддæр сын улæфтбон дæр нæй. Уыдон æрвылбон дæр райсом раджы ног чындзау горæты уынгтæ афтæ хорз афснайынц æмæ сæ фæстæ иу брон дæр нал фæуадзынц. Фæлæ сын сæ куыстæн иуæй-иу цæрджытæ нæ аргъ кæнынц æмæ та уайтагъд сæ брон ныккалынц кæм не ‘мбæлы, ахæм рæтты æмæ дыккаг бонмæ уым фæлæзæрынц æмæ сæ дзæгъæл куыйтæ ныскъуыдтæ, ныппырх кæнынц. Фæлæ ацы ахс-джиаг проблемæйы тыххæй æндæр хатт æркой кæндзыстæм.
Ныр та радон хатт мæ дзырды сæр у хæрзарæзтады комбинаты цъæхвæлыстгæнæн хайады кусджытæ нæ горæты рæсугъддзинады тыххæй цы удуæлдай куыст кæнынц, ууыл. Цъæхвæлыстгæнæн хайады кусджытæн, æгæрыстæмæй улæфтбонтæ дæр нæй. 22 æмæ 23-æм ноябры нæ рес-публикæйы кæд улæфтбонтæ уыдысты, уæддæр уыдонæн уыдысты кусгæ бонтæ. Уыдон фæнды къæвда уæд, фæнды хур, уæддæр æгуыст никуы вæййынц. Цалдæр боны размæ нæ горæты Джиоты Аланы проспектыл райдыдтой декоративон къутæртæ – бирючинатæ садзын æмæ ныридæгæн 4700 къутæры ныссагътой 2-æм астæуккаг скъолайы онг фæндаг дихгæнæн уадздзагыл. Ландшафтон дизайнер Пæрæстаты Иринæ куыд банысан кодта, афтæмæй Джиоты Аланы проспекты кæронмæ цъæхвæлыстгæнæн куыстытæ адарддæр кæндзысты иннæ аз.
Уый размæ ацы проспекты дихгæнæн уадздзагыл (разделительная полоса) сагъд уыдысты алыгъуызон дидинджытæ, уыцы нымæцы уардитæ дæр. Æмæ дзы ныр къутæртæ кæй садзынц, уый æнæразыдзинад сæвзæрын кодта иуæй-иу цæр-джытæм. Ацы проспекты цæрæг сылгоймаг мын катайгæнгæ загъта, зæгъгæ, уардитæ æмæ æндæр дидинджытæ рæсугъддæр фидыдтой æмæ, зæгъ, сæ афтæ куы ныууагътаиккой, уæд бирæ хуыздæр уыдаид. Фæлæ æрвылаз иуæй дидинджытæ садзын тынг зынаргъ лæууы, иннæмæй та сæ цæрджытæй бирæтæ давгæ дæр акæнынц æмæ сæ сæхи кæртыты ныссадзынц, нæ хæстæфхæрд горæты рæсугъддзинадыл хъуыды дæр нæ акæнынц, афтæмæй, иуæй-иу æнæрхъуыды адæймæгтæ та сæ сæ къæхты бын фæкæнынц уынджы иу фарсæй иннæмæ хизгæйæ. Декоративон къутæртæ та иу хатт ныссадздзысты æмæ лæудзысты бирæ азты дæргъы. «Декоративон къутæртæ-бирючинатæ дæр рæсугъд фидаудзысты. Рафтауынц июлы мæйы æмæ чысыл урс дидинæг калынц суанг фæззæджы онг. Къутæртæ садзыныл куыстой 15 адæймаджы», – загъта Пæрæстаты Иринæ.
Уый ма куыд банысан кодта, афтæмæй уардитæ фæрынчын сты. Хъуамæ сæ скъахтаиккой æмæ сæ ныссагътаиккой æндæр рæтты, фæлæ сæ адавдтой цæрджытæ. Сæ къухты ма дзы цы бафтыд, уыдон ныссагътой Вогзалгæрон фæзуаты æмæ сын хос кæнынц. Нæ горæты машинæты хицæуттæй дæр иуæй-иутæ социалон хызæгты равдыстой сæ катайдзинад, ома, къутæртæ куы сырæзой, уæд æвзæрын кæндзысты аварион уавæртæ. Уый фæдыл та Пæрæстаты Иринæ загъта, зæгъгæ, къутæртæм нæ хъус дардзыстæм, афоныл æлвыд цæудзысты æмæ бынтондæр никæй хъыгдардзысты. Удæгас æмбонды тыххæй, зæгъ, хъыгдард ничи баййафдзæн. Ахæм декоративон къутæртæ ма цалдæр азы размæ цъæхвæлыстгæнæн хайады кусджытæ ныссагътой Хъайтарты уынджы æмæ тынг рæсугъд фидауынц. Уыимæ кусджыты ‘рдыгæй зылдцух дæр никуы вæййынц. Афоныл сæ сæлвынынц, сæрды тæвд бонты сæ æфсадынц донæй дæр. Кусджытæ сæ куыстмæ райсом раджы кæй æрæвналынц, уымæ гæсгæ сын бирæ бантысы саразын, сæ куысты фæстиуæг вæййы зæрдæйы фæндиаг.
Ноябры мæйы ма ацы кусджытæ 50 æрвгъуыз цъæх нæзыйы (гималайский кедр) ныссагътой нæ горæты Хуыбылты Валерийы номыл улæфæн стыр парчы. «Ацы нæзытæ бынтон æнæнхъæлæджы ссардтам завод «Эмальпровод»-ы кæрты. Сæ уидæгтæ дзæбæх кæй уыдысты, уымæ гæсгæ сæ скъахатам æмæ сæ ныссагътам парчы. Ахæм нæзытæ ма хъомыл кæнæм нæхæдæг цы чысыл зæххы фадыг нын ис, уым æмæ сæ ныссадздзыстæм нæ горæты уынгты, уыцы нымæцы Владимир Путины уынгыл дæр», – загъта Пæрæстаты Иринæ.
23-æм ноябры та хæрзарæзтады комбинаты кусджытæ ацыдысты хъæдмæ æмæ æрхастой 43 нæзы æмæ мохъо талайы, кæцыты ныссадздзысты нæ горæты Ногдзауты парчы. Пæрæстаты Иринæ куыд банысан кодта, уымæ гæсгæ талатæ сты тынг рæсугъд æмæ ноджыдæр рафидауын кæндзысты нæ горæты цæрджыты уарзон парчы.
Банысан кæнын хъæуы уый дæр, æмæ горæт Цхинвалы администрацийы цур хæрзарæзтадон комбинаты кусджытæ, уыцы нымæцы цъæхвæлыстгæнæн хайады кусджытæ дæр сæ куысты, сæ хæстæ цæсгомджынæй куыд æххæст кæнынц, афтæ алчидæр куы кæнит, уæд нæ хъуыддæгтæ бирæ хуыздæр уаиккой. Ноджы ма йæ зæгъон, хæрзарæзтады комбинаты цъæхвæлыстгæнæн хайады кусджыты фæрцы рафидыта нæ горæт, сæ къухты æрмдзæф ирдæй зыны нæ горæты уынгты æмæ сын сæ куыстæн аргъ кæнын махæй алкæйы хæс дæр бæргæ у, фæлæ… Хорз уаид æмæ уынгты видеокамерæтæ æвæрд куы æрцæуиккой, уæд чизоны фыда-удæн нал кæниккой ахæм æдзæсгом адæймæгтæ.
ДЖИОТЫ Екатеринæ
Comments are closed, but trackbacks and pingbacks are open.