Хореографион ансамбль «Ирон» фыццаг хатт хайад райста Мæскуыйы уагъдцæуæг фестиваль «Мир искусства»-йы æмæ дзы бацахстой призон бынæттæ. Информаци æмæ мыхуыры паддзахадон комитеты пресс-центры сæ балцы тыххæй журналисттæн радзырдтой хореографион ансамбль «Ирон»-ы аивадон къухдариуæггæнæг Хуыгаты Дианæ, нæ республикæйы сгуыхт артисткæ, балетмейстер Къæбулты Виктория æмæ ансамблы солисттæ Дудайты Ацæмæз, Сагкаты Виктория æмæ Джиоты Геннади.
«УФ-йы Культурæйы министрады хъæппæрисæй 12-15 январы уагъд æрцыдис æхсæнадæмон фестиваль «Мир искусства», кæцымæ хуынд æрцыдыстæм ивгъуыд азы сентябры мæйы. Уымæ гæсгæ нæхи цæттæ кæнын райдыдтам развæлгъау. Хайад дзы райстой Уæрæсейы 16 регионы минæвæрттæ. Мах рамбылдтам гран-при. Арæх гастролты цæуæм æмæ хайад исæм Цæгат Кавказы алыгъуызон фестивалты, фæлæ Мæскуыйы уыдыстæм фыццаг хатт. Тынг рай-гондæй баззадыстæм нæ балцæй», – радзырдта Хуыгаты Дианæ.
Фестивалы жюри хуссарирыстойнаг ансамблæн фыццаг бынæттæ саккаг кодтой кафты номыртæ «Симд» æмæ «Испайнаг»-ы тыххæй, афтæ ма гран-при та ансамблæн радтой «Хæххон кафт»-ы тыххæй.
Йæ ныхæстæм гæсгæ фестивалы программæ уыдис тынг хъæздыг. Хайад дзы цы коллективтæ райстой, уыдон дæр уыдысты хорз цæттæ æмæ сæхи равдыстой аккагæй. «Фестивалтæ уагъд фæцæуынц Уæрæсейы æмæ Кавказы алы регионты дæр. Зæгъæн ис æмæ нæ алы мæй дæр фæхонынц, фæлæ алы хатт нæ ацæуæм, уымæн æмæ нын финанскæнынад нæ вæййы», – банысан кодта Хуыгаты Дианæ.
Ансамблы кæстæр къорд ныр та сæхи цæттæ кæнынц горæт Нальцыккмæ ацæуынмæ. «Кæстæр къорды кафынц 7-9 азы онг кæуыл цæуы, уыцы сывæллæттæ. Уыдон æрæджы нæхимæ хайад истой фестивалы, цыран бацахстой фыццаг бынат. Тынг нæ фæнды, цæмæй сæхи аккагæй равдисой æндæр республикæйы дæр. Мæ хъуыдымæ гæсгæ, нæ къухты дарддæр дæр æнтыстытæ æфтдзæн», – загъта Къæбулты Виктория.
Ансамблы солист Джиоты Геннадийы ныхæстæм гæсгæ фестиваль æппæт коллективыл дæр ныууагъта стыр тæлмæнтæ, нæ зæрдæмæ тынг фæцыдис ацы фестивалы хайад кæй райстам, уый. Тынг цымыдисон æмæ зæрдæмæхъаргæ уыдис. Уыдон ма уыдысты алыгъуызон экскурситы, уыдысты Сырх фæзуаты æмæ Измаилаг парчы.
Ансамблы солистты ныхæстæм гæсгæ уыдон сæ кафтæй, фыццаджыдæр, æвдисынц сæ нацийы культурæ, традицитæ æмæ характер. Мах зæрдæ дæр сын зæгъы дарддæры сфæлдыстадон æнтыстытæ.
КОКАЙТЫ Зæринæ
