Зымæг йæ æмбисæй ахызт. Ацы аз мах федтам тынг митуардтытæ, банкъардтам уазæлттæ æмæ хъарм бонтæ дæр. Фæлæ зымæг уæддæр зымæг у ацы афон уæлдай тынгдæр апарахат вæййынц грипп æмæ карз респираторон низтæ. Уæдæ куыд у нæ республикæйы ныр та эпидемиологион ситуаци. Республикæйы сæйраг инфекционист Джиоты Элеонорæ журналисттæн куыд радзырдта, афтæмæй уый ис нормæйы арæнты.
Йæ ныхæстæм гæсгæ карз респираторон низты симптомтимæ цæрджытæ арæхдæр бацæуынц дохтыртæм, фæлæ уый баст у зымæджы сезонимæ.
«Фæстаг рæстæджы карз респираторон низты сиптомимæ цæрджыты арæхдæр бахъæуы медицинон æххуыс. Фæлæ инфекцион низтæ уымæй хицæн кæнынц æмæ сын ис сезонон характер. Уазал рæстæджы мах фылдæр вæййæм, хъæрмад кæм вæййы, ахæм бынæтты æмæ ахæм уавæры та ахъаз кæны уæлдæфы уымæлад къаддæр кæнынæн. Уый та йæ рады хус кæны, уæлдæф кæуылты бацæуы, уыцы бынæтты сæтцъары æмæ вирустæ æнцондæрæй бахауынц организммæ», – загъта Джиоты чызг.
Куыд ма загъта, афтæмæй ацы азы эпидемион сезоны æнхъæлмæ кæсæн ис респираторон-вирусон инфекциты алыгъуызон цырынгæнджытæм.
«Респираторон низты симптомтимæ пациенты сгарыны комплексмæ хауынц лабораторон иртасæнтæ, этиотропон, патогенон æмæ симптоматикон терапитæ. Дарддæр рынчын вæййы дохтыры хъусдарды бын, куы бахъæуы, уæд та басгæрстыты комплекс рауæрæхдæр кæнынц», – банысан кодта сæйраг инфекционист.
Джиоты Элеонорæйы ныхæстæм гæсгæ COVID-19-ы мутацигонд штаммтæ расайынц тæфсæг, фæзынынц риниты миниуджытæ, адæймаг слæмæгъ вæййы, хъуыр фæриссы, сур хуыфт фæкæны. «А» гриппы вирусы рæстæджы гæнæн ис риссой цæстытæ дæр. Афтæ гæнæн ис ахæсса цалдæр къуырийы.
Специалист банысан кодта профилактикон мадзæлтты ахсджиагдзинад. Гæнæн уæвгæйæ нæ хъæуы цæуын, адæм кæдæм æмбырд кæнынц, ахæм бынæттæм, дарын хъæуы маскæ, хъахъхъæнын хъæуы социалон дистанци, къухты та хъæуы арæх æхсын, афтæ ма вакцинаци скæнын. Уый ма куыд фехъусын кодта, афтæмæй райстой эффективон вакцинæ «Совигрипп», кæцыйы сконды ис гриппы вирусы штаммтæ. Вакцинаци кæнынц сæхæдæг æмæ æрсидт, цæмæй сæм цæрджытæ активондæрæй цæуой.
