Ленингоры районы Цъинагары хъæуы Культурæйы хæдзары хореографион ансамбль «Арвырон» горæт Черкесскы ссис дунеон конкурс «Сказочный Домбай»-йы Гран-прийы хицау æмæ фыццаг къæпхæны дипломы лауреат.
Ансамблы аивадон къухдариуæггæнæг у Гуссойты Ласко. «Народно-сценический» номинацийы ансамбль профессионалон жюрийы рæгъмæ рахаста дыууæ номыры – «Ирон сылгоймаджы фæлгонц» æмæ «Хонгæ кафт». Коллективæн бантыст ирон кафты рæсугъддзинад æххæстæй равдисын.
«Дунеон конкурсмæ хонæн гæххæтт райстам не ‘мфыдыбæстæйон – Хъæрæсе-Черкеси æмæ Республикæ Хуссар Ирыстоны ‘хсæн гуманитарон æмгуыстады фæдыл уынаффæгæнæг Хуыгаты Эдуардæй. Фестивалмæ ацæуынæн нын баххуыс кодтой Ленингоры районы администрацийы сæргълæууæг æмæ культурæйы хайад», – радзырдта Гуссойты Ласко.
Уæлдай бузныджы ныхæстæ загъта Хуыгаты Эдуардæн, тынг хорз сыл кæй сæмбæлд, уый тыххæй. Сарæзта сын экскурси Лабæмæ дæр. Ансамбль «Арвырон» алыгъуызон фестивалты æмæ конкурсты бирæ хæттыты райста æмæ исы хайад. Æмæ алыхатт дæр æрцæуынц уæлахиздзаутæй.
ДЖИОТЫ Екатеринæ