Къуырисæры, Тыбылты Алыксандры номыл Хуссар Ирыстоны паддзахадон университеты равдыстыты залы цытджын æгъдауæй байгом, курдиатджын нывгæнæг Æлборты Лирæйы фыццаг персоналон равдыст «Цвет». Равдыстмæ хаст æрцыдысты фæстаг авд азы кæуыл бакуыста, уыцы нывтæ. Не ’мзæххон æрыгон чызджы сфæлдыстадæн раздæр аргъгæнджытæ уыдысты Цæгат Ирыстон-Аланийы æмбæстæгтæ.

Æлборты Лирæ куыд ныв кæны, йе сфæлдыстад цæуыл дзурæг у, уымæ бацымыдис кодтой æмæ равдыстмæ æрбацыдысты хицауады бæрнон кусджытæ, нывгæнджытæ, ХИПУ-йы ахуыргæнджытæ æмæ студенттæ, аивадæн табугæнджытæ æмæ Лирæйы æввахс адæймæгтæ.

Персоналон равдысты байгом кодта РХИ-йы Культурæйы министрады хуызфыссынады аивады специалист Цхуырбаты Джульеттæ. Уый цыбыртæй æрдзырдта нывгæнæджы сфæлдыстады тыххæй æмæ банысан кодта министрады сæйраг хæстæй сæ иу кæй у æрыгон курдиæтты фарсмæ æрбалæууын æмæ сæ размæ кæнын. Уый ма арфæйы ныхæстæ загъта университеты ректор Тедеты Вадимæн, равдыст æмбæлон æмвæзадыл байгом кæнынæн сын фадæттæ кæй сарæзта. Цхуырбиан экспозици рахуыдта цымыдисон æмæ мидисджын.

Культурæйы министр Зæгъойты Рада йæ раныхасы банысан кодта, зæгъгæ, Хуссар Ирыстоны нывкæнынады аивадæн ис йæхи хъæздыг истори: «Махæн тынг æхсызгон у абон æрыгон чызг, курдиатджын нывгæнæджы куыстытимæ кæй зонгæ кæнæм, уый. Лирæйæн ис хорз сфæлдыстадон фидæн, уæндонæй къахдзæфтæ кæны равзæрст фæндагыл. Зæрдæ райы Ирыстоны бирæ æрыгон курдиатджын фæсивæд кæй ис, уымæй. Уадз æмæ Лирæйæн йе сфæлдыстадон куысты уа ноджы фылдæр æнтыстытæ, æмæ йæ равдыстыты нымæц та фылдæр кæнæд», — загъта министр.

ХИПУ-йы ректор Тедеты Вадим дæр раарфæ кодта Æлборты чызгæн, банысан кодта университеты ахæм ма-дзæлттæ уадзын кæй у ахсджиаг, уымæн æмæ дзы студенттæ дæр хайад фæисынц, базонгæ вæййынц се ’мдугон курдиатджын адæймæгты сфæлдыстадимæ. РХИ-йы Культурæйы министрадимæ æмгуыстад æнтыстджын кæй у, уый сæрмагондæй банысан кодта ректор.

Нæ бæстæйы сæргълæууæг Гаглойты Аланы номæй Лирæйæн арфæ ракодта президенты паддзахадон уынаффæгæнæг Пухаты Эрик дæр.

Уæрæх æмæ райдзаст залы парахатæй æвæрд æрцыдысты ирдхуыз ахорæнтæй конд нывтæ. Экспозици цы хъæздыг æмæ мидисджын куыстытæй конд у, уыдон — 40-æй фылдæр, æлвæстой адæймаджы цæст сæхимæ. Се ’хсæн: «Любимый город», «В объятиях лучшего мира, ведь лучший мир внутри тебя», «Федерика, вино и гитара», «А по ночам ей снились горы», «Март», «Две сестры», «Разговор», «18:30», «Национальный натюрморт», «Автопортрет», «Один день в горах», «Поселок» æмæ æндæртæ.

Нывгæнæгæн йæхи æрмдзæф ис, æнæмæнг. Лирæ ныртæккæ цы жанры æмæ стилы ныв кæны, уымæй арæх нæ пайда кæнынц Хуссар Ирыстоны æмæ уымæн æнцон базонæн уыдзысты. Курдиатджын нывгæнæг агуырдта, æввахсдæр æмæ йын цымыдисондæр чи у, уыцы стиль. Ныртæккæ абстрактон импрессионизмы жанры, хард-эйджы стилы кусы. Хард-эйджы арæх фæпайда кæнынц геометрион фигурæтæй, цæсты чи хауы, ахæм бæрæг-бæлвырд контуртимæ, кæцыйы сæйраг сты хуызтæ. Хуызфыссынады ацы фæдыздæхтыл райдыдтой кусын АИШ-ы æмæ апарахат 60-æм азты. Ацы стилы нывгæнджытæ архайдтой сæ композицитæ æнæ цæсгæмттæй æвдисыныл, приоритетондæр хъуамæ уыдаиккой формæ, хуыз, хæххытæ. Уыимæ иумæ фæкъаддæр кодтаиккой ахсджиагыл кæй нæ нымадтой, уыцы элементтæ — монондзинад æмæ эмоционалондзинад. Хуызфыссынады жанры ацы стиль у эффективон, æрцахста дзы йæхи сæрмагонд бынат.

Лирæимæ ныхасгæнгæйæ, бамбæрстам аивад йæ царды аккаг бынат кæй ахсы æмæ æнæмæнгхъæуæгыл нымайы хиуыл кусын, профессионалон æгъдауæй рæзын. Уый йæ хъус дары куыд ирон æмæ уырыссаг, афтæ зындгонд фæсарæйнаг нывгæнджыты сфæлдыстадмæ дæр. Йæ уарзон нывгæнджытæ сты: Тугъанты Махарбег, Гасситы Æхсар, Чилæхсаты Магрез, Есенты Æхсар, Кæсойты Лаврент, Бедойты Шалва, Казимир Малевич, Любовь Попова, Марк Шагал, Василий Кандинский, Пабло Пикассо, Поль Сезан, Тулуз Лотрек, Жан Баския æмæ æндæртæ.

Æлборты Лирæ кæд æрыгон нывгæнæг у, уæддæр ын ныридæгæн ис æнтыстытæ: хайад райста Кавказы регионты уагъдцæуæг равдыстыты, у æхсæнадæмон фестивалты æмæ конкурсты дипломант. Лирæ кæддæриддæр сæрыстыр у, нывкæнынады сусæгдзинæдтæ йын чи амыдта, йæ уыцы ахуыргæнджытæ — Есенты Æхсар, Чилæхсаты Магрез æмæ Бедойты Шалвайæ.

ЦХУЫРБАТЫ Ларисæ