Афоныл мызд фидын, дисциплинæ халджытимæ тох кæнын æмæ ма цалдæр ахсджиаг фарстайы…

6-æм апрелы Президент Гаглойты Аланы сæргълæудæй уыд сноггонд Хицауады æмбырд. Уым æркастысты цалдæр фарстамæ.

Паддзахады сæргълæууæг фехъусын кодта, министрадты сæргълæуджытæй алчи  æмбæлонæй  кæй  не ‘ххæст кæны йæ комкоммæ хæстæ. Цалдæр  мæйы дæргъы районон администрациты  алыгъуызон структурæты кусджытæ нæ исынц мызд. Ам чи бады, уыдон та æвæстиатæй райсынц сæ мыздтæ. Фæлæ фæндæгтæ чи аразы, дон чи уадзы, сæ разылæууæг хæстæ чи æххæст кæны, уыдон сæ бакæнгæ куысты тыххæй мызд нæ исынц. О, фæлæ уыдон дæр цæмæйдæр хъуамæ цæрой, цæмæй сæ бинонты дарой.

Куыд банысан кодтой, афтæмæй куыстмыздтæ фæстиат кæнынц, æмбæлон документтæ рæстæгыл кæй не ‘рцыдысты цæттæ, уый аххосæй.

Президент сæ æрдомдта, цыбыр рæстæгмæ аскъуыддзаг кæнын ацы фарст æмæ адæмæн бафидын сæ куыстмызд.

Районты сæргълæуджытæн та бахæс кодта, цæмæй зæххыты ревизийы  æмгъуыды тыххæй докладтæ бацæттæ кæной райсоммæ.

«Мах ныхас кæнæм инвестортимæ. Уыдоны хъæуы зæхх, зæгъæм, сæхи фæрæзтæй сæ хъæуы фермерон хæдзарад бакæнын кæнæ дыргъдæттæ ныккалын. Махæн та сын нæ бон нæу зæхх рахицæн кæнын. Афтæмæй та  зæххыты фылдæр куыст нæ цæуынц, кæнæ та кæуылдæр фидаргонд сты. Афтæмæй сыл дзырд та рагæй цæуы. Аскъуыддзаг æй кæнут Хъæууон хæдзарады министрадимæ иумæ», – банысан кодта Президент.Чи нæ кусы, уыцы амалиуæггæнджытæ паддзахадон реестрæй рацух цæудзысты хъалонтæ æмæ æмбырдты комитеты уынаффæйæ.

Финансты министр Цæрикъаты Хъазбег уынаффæмæ рахаста «Юридикон цæсгæмттæ æмæ амалиуæггæнджыты паддзахадон регистрацийы тыххæй закъонмæ ивындзинæдтæ бахæссыны тыххæй» закъоны проект.

Ацы закъоны нæй нормæ, кæцымæ гæсгæ «индивидуалон амалиуæггæнæджы иууон паддзахадон реестрæй  рацух гæнæн уаид регистрацион органы уынаффæмæ гæсгæ.

Регистраци та сты Хъалонтæ æмæ æмбырдты комитеты. Ныры онг иу сæ рацух кодтой тæрхондоны уынаффæмæ æмæ амалиуæггæнæгæн йæхи фæндонæй. Фæлæ ацы хъуыддаг Хъалонтæ æмæ æмбырдты комитетæн æвзæрын кæны зындзинæдтæ.

Цæмæй хъуыддаг рараст уа, уый тыххæй закъоны проекты хъæуы сфидар кæнын», – загъта министр.

Уый ма банысан кодта, комитеты регистрациты хайады бæрæггæнæнтæм гæсгæ, 2022 азы 1 октябрмæ регистраци кæй æрцыдысты 3102 индивидуалон амалиуæггæнæджы, фæлæ фактон æгъдауæй экономикон архайд æххæст кæнынц æрмæст 1560 амалиуæггæнæджы.

Закъоны проект министрты кабинет сфидар кодта æмхъæлæсæй.

Дзабиты Иналы хъуыддаг

Гаглойты Алан куыд банысан кодта, афтæмæй Цхинвалы горæтон тæрхондоны уыд Дзабиты Иналы амæлæты хъуыддаджы процесс. Ныхас дзы цыд уголовон хъуыддаджы æрмæджытимæ базонгæ уæвыны график сфидар кæныны фарстыл. Цæмæй рæстæг ма ныддаргъ уыдаид, уый тыххæй график хъуамæ прокуратурæ са-рæзтаид, уый уыд хæсджын. Ацы хъуыддаг кæй ныддаргъ, уый тыххæй уыдон аххосджын кæнынц хицауиуæгады, сæхицæн та сæ бон нæу хъуыддагимæ базонгæ уæвын.

«Абоны тæрхоны рабадты рæстæджы аххосджынтæй иу дæлдзиныг кодта прокуроры, уый фæстæ раласта йæ дзабыр æмæ йыл æй фехста. Ахæм уагахастæн ныббарæн нæй. Уыцы инцидент фыст æрцыд видеойы», – загъта Президент æмæ ма банысан кодта, зæгъгæ, знон фембæлд аххосджын уæ-вынмæ зæрдæхсайгæты хæстæджытимæ, «уымæн æмæ кæддæриддæр цæуæм диалогмæ, фæлæ нæм уыдон та ахæм ахаст дарынц».

Парчы хъуамæ судзой рухсытæ

Æмбырды дзырд цыд горæты уынгты электроны рухсытыл. Сæрмагондæй уынаффæ кодтой Хуыбылты Валерийы номыл парчы рухсытæ кæй ахуыссын кæнынц, уый фæдыл. Парк нырма дæр нæ райстой Цхинвалы администрацийы балансмæ æмæ уый  аххосæй йæ дарын проблемон у.

Хъуыддаджы фæдыл Президент банысан кодта, зæгъгæ, «уырдæм улæфынмæ не ‘мбæстæгтæ цæуынц æмæ ахæм фарстатæм æмбæлон ахаст дарын хъæуы,  ацы аххосæгтæ адæммæ нæ хауынц».

Дисциплинæ халджыты ныхмæ – радикалон мадзæлттæ

Президент министрты хъусдард аздæхта, æнтыстджын куыстæн цæлхдуртæ чи æвæры, паддзахадон структурæты уыцы кусджытæм, зæгъгæ, куысты рæстæджы сæ кусæн бынæтты нæ вæййынц.

«Уый нысан кæны, ацы адæймаг кæнæ йæ куыстытæ кæронмæ бакодта, кæнæ та йæ кусын нæ фæнды. Уый хауы ведомствоты къухдариуæгадмæ дæр æмæ рæнхъон кусджытæм дæр. Алчи дæр бæрндзинад хъуамæ æнкъара. Ацы хъуыддаг зæрдыл æрлæууын кæнын кæмæн хъæуы, уый ныхмæ та ист æрцæудзысты радикалон мадзæлттæ. Коллективы хъуамæ уа хъарм ахастытæ æмæ кусæгон атмосферæ. Афтæ куы нæ уа, уæд эффективон куыстыл дзурæн дæр нæ уыдзæн», – загъта Гаглойты Алан.

Сфидар кодтой уагæвæрдты проекттæ

Министртæ сфидар кодтой «Паддзахадон таможнæйон комитеты кусджытæн окладтæ æмæ ба-фыстытæ сфидар кæныны тыххæй» уагæвæрдмæ ивындзинæдтæ бахæссыны уагæвæрды проект æмæ 2023 азы «Энергоресурс – Хуссар Ирыстон»-ы куыстуатæн паддзахадон бюджетæй субсидитæ рахицæн кæныны фæткойтæ.

Осиаты Индирæ