Джиоты Алан: Бюджетон дисциплинæ нæ куы нæ уа, уæд аззайдзыстæм æнæ финанстæй

Хицауады Сæрдары фыццаг хæдивæг Джиоты Аланы сæргълæудæй уагъд æрцыд æмбырд. Рæгъмæ дзы рахастой бюджетон процесстæ фæхуыздæр кæныны фарстатæ. Æрдзырдтой ма ноджы 2021-2022 азты уæрæсейаг финансон æххуысимæ баст  фæткхалæн цаутыл, кæцытæ рабæрæг сты басгæрстыты рæстæджы.

Æмбырды хайад райстой Культурæйы министр Зæгъойты Радæ, Ахуырад æмæ зонады министр Джиоты Арянæ, Финансты министры хæстæ æххæстгæнæг Тыбылты Фатимæ, Æнæниздзинад æмæ социалон райрæзты министры хæдивæг Сиукъаты Наирæ æмæ ма комитетты сæрдæрттæ.

Джиоты Алан бахæс кодта, цæмæй бюджетон фæрæзтæм здахой уæлдай хъусдард, алцыдæр арæзт цæуа фæткмæ гæсгæ æмæ хъæндзинæдтæ та куысты процессæй иуварс æрцæуой цыбыр рæстæгмæ.

Зæгъойты Радæ йæ раныхасы банысан кодта, зæгъгæ, йæ министрады ис ахæм профилы кусджытæ, кæцыты объективон аххосæгтæм гæсгæ нæй ссæрибар кæнæн сæ куысты бынæттæй. Ахæм кусджытæ разындис иннæ министрадты æмæ ведомствоты дæр æмæ æмбырды хайадисджытæ аскъуыддзаг кодтой, цæмæй проблемæ аиуварс кæныны тыххæй саразой эффективон контрактты механизм, куыд æнгæс ка-тегориты кусджытимæ, афтæ ма хицæн гоймæгтимæ дæр. Джиоты Аланы хъуыдымæ гæсгæ ахæм системæйы фæрцы хæлд нал цæудзысты закъоны нормæтæ.

Æмбырдæн хатдзæгтæ саразгæйæ, Джиоты Алан Ахуырад æмæ зонады министрад æмæ Адæймаджы фæрныгад æмæ фæлхасгæнджыты бартæ хъахъхъæныны фæдыл комитетæн бахæс кодта, цæмæй 2023 азы 15 мартмæ сæ хъуыдытæ бавдисой Хицауадмæ сæ дæлбаруæвæг кусджыты эффективондзинады критеритæ иртасыны системæ саразыны тыххæй.

Уымæй уæлдай ма хæсгонд æрцыд æмбæлон службæтæн, цæмæй паддзахадон уагдæтты оптимизаци саразыны фæстиуæгæн цы æхцайы фæрæзтæ ссæрибар вæййынц, уыдоныл кæной æмбæлон контроль. Дарддæр уыцы æхцайы фæрæзтæ хъуамæ хардз æрцæуой куыстмыздтæ фæфылдæр кæнынæн.

Министрадтæй æмæ ведомствотæй кæмæн ис бар РХИ æмæ УФ-йы ‘хсæн социалон-экономикон райрæзты фæдыл Бадзырды фæлгæтты сæ кусджыты куыстмыздтæ фæфылдæр кæнынæн, уыдоны къухдариуæггæнджытæн бахæсгонд æрцыд, цæмæй 2023 азы 15 февралмæ бацæттæ кæной сæ фæндиæгтæ.

«Ацы фарст ахсджиаг у – бюджетон дисциплинæ нæм куы нæ уа, уæд аззайдзыстæм æнæ финанстæй», – банысан кодта Джиоты Алан.