Фæстаг азты Цæгат Ирыстоны горæттæн фылдæрæй-фылдæр кæнынц сæ «кæнгæ æфсымæртæ». Зæгъæм, Дзæуджыхъæуимæ æфсымæрон горæттæ систы амырыкаг штат Эшвилл, туркаг Ардаган, болгайраг Кырджалий, Уæрæсейаг горæттæ Нальчик, Махачкала, Владивосток, Ялта, Бердск…
Цалдæр азы размæ Беслæнимæ «æфсымæртæ загътой» хъырымаг горæт Гур-зуф, æрæджы та ахæм цæдис сарæзтой Беслæн æмæ италиаг горæт Градарæ. Уый тыххæй разыдзинадыл сæ къухтæ бафыстой Беслæны горæты сæргълæууæг Татраты Харитон æмæ Градарæйы мэр Филиппо Гаспери.
«Беслæны мадæлтæ»-йы комитеты сæрдар Дудиаты Сусаннæ куыд фехъусын кодта, афтæмæй Градарæйы цæрджытæ сты зæрдæхæлар адæм. Беслæны трагедийæ абоны онг дæр сты сæ фарсмæ æмæ сын æххуыс кæнынц канд моралон хуызы нæ, фæлæ материалон хуызы дæр. Уымæ гæсгæ фæзынд ахæм фæндон, цæмæй кæрæдзийыл сæхи æнгомдæр бабæттой.
Ныртæккæ Беслæны делегаци ис Градарæйы. Ныхас цæуы дарддæры æмгуыстады бастдзинæдтыл. Уыдонæй иу у Беслæны италиаг æвзаджы центр байгом кæнын. Уым ахуыр кæндзысты италиаг æвзаг, зонгæ кæндзысты сæ культурæимæ. Хуыздæр æнтыстытæ кæмæн уа, уыдон сæ ахуыр адарддæр кæндзысты Ита-лийы.
Горæттæ æфсымæрон скæнынæн йæ нысан у кæрæдзийы фæлтæрддзинадыл ахуыр кæнын, политикæйы, культурæйы, ахуырады, аивады, сæудæджерады æнгом бастдзинæдтæ саразын æмæ æмгуыст кæнын.
«ЛЕНТÆ» – ДЗÆУДЖЫХЪÆУЫ
Ацы аз, сæрды мæйты Дзæуджыхъæуы байгом уыдзæн уæрæсейаг стыр фæлхасадон центр «Лентæ»-йы филиал. Уый тыххæй бадзырдыл сæ къухтæ бафыстой республикæйы Сæргълæууæг Сергей Меняйло æмæ компанийы генералон директор Владимир Сорокин.
Ацы зындгонд компанийы фыццаг гипермаркет фæзынд 2003 азы Петербурджы æмæ нымад æрцыд Уæрæсейы иууыл стырдæр компанийыл. Стыр æнтыст ын кæй уыд, йæ продукцийы зилдух дардыл æмæ хъæугæ кæй у, уымæ гæсгæ уæрæхæй-уæрæхдæр кодтой йæ хызæ-джы дуканитæ. Ныртæккæ Компанийæн Уæрæсейы горæтты ис 250 гипермарке-ты. Уыдоныл ма тагъд бафтдзæн Дзæуджыхъæуы уон дæр.
Ныртæккæ рæвдз кæнынц хъæугæ документтæ. Проекты аргъ у 900 милуан сомы. Куыстæй та сифтонг кæндзæн сæдæ адæймагæй фылдæры. Йæ хорздзинад ма уый мидæг ис æмæ фылдæр уæй кæндзæн бынæттон продукци.
«Лентæ»-йæ уæлдай ма Дзæуджыхъæуы æнтыстджынæй кусынц стыр фæлхасадон центртæ «Леруа-Мерлен», «Метро», «Чибо», «Деликат», «Дюбуа», «Столица», «Вертикал», «Забава» æмæ æндæртæ.
ÆМÆ ТА КОНКУРС…
Литературон-аивадон журнал «Мах дуг» хуыздæр уацмыстæ раиртасынæн ныр дыккаг хатт расидт дунеон конкурс. Йæ нысан у ирон æвзаг æмæ литературæйы рæзтыл бацархайын, авторты разæнгард кæнын, ног нæмттæ раиртасын. Фыццаг конкурсы «Мах дуг»-ы премийы лауреаттæ систы зынгæ фысджытæ Хуыгаты Сергей, Гусалты Барис, Колыты Витали, Кокойты Эльзæ æмæ æндæртæ.
«Нæ проект царды уагъд цæуы дыккаг хатт спонсорты æххуысæй. Куыстытæ исæм 15 январæй 15 апрелмæ. Конкурсанттæм нæ сæйраг домæнтæ сты, цæмæй нæм æрбадæттой, мыхуыргонд чи никуы уыд, ахæм куыстытæ», – банысан кодта «Мах дуг»-ы сæйраг редактор Хетæгкаты Оксанæ.
Конкурс дих кæны фондз номинацийыл: прозæ, поэзи, публицистикæ, драматургия æмæ аивадон тæлмац. Архайыны бар дзы ис æртæ къордæн: 7 азæй 15 азмæ, 16 азæй 35 азмæ æмæ 35 азæй уæлæмæ.
Уæлахиздзаутæм æнхъæлмæ кæсынц дипломтæ æмæ æхцайы премитæ.
Нæ уацх.
