Февралы мӕйы фынддӕсӕм бон Советон Хицауад йе ′фсад ракодта Афганистаны зӕххæй. Хъыгагæн 14 мин æвзонг удæн нал бантыст сӕрӕгасӕй сӕ райгуырӕн зӕхмӕ сыздæхын. Нæ чысыл Хуссар Ирыстонæй уыцы тугуарæн хæстмæ фæцыд дыууӕ сӕдӕ лæппуйæ фылдæр, уыдонæй авдæй сæрæгасæй нал сæмбæлдысты сæ бинонтæ, сæ райгуырæн уæзæгыл – Куымæридтаты Мераб, Чысиаты Нодар, Миндиашвили Заза, Николаишвили Александр, Тыджыты Гуливер æмæ Сиукъаты Мераб. Гæбæраты Къоста та абоны онг дæр у æбæрæг сæфт.
Куымӕридтаты Мерабӕн йӕ службӕйы рӕстӕг кӕронмӕ бахӕццӕ ӕмӕ иунӕг фырт хъуамӕ ӕрӕздӕхтаид йӕ уӕзӕгмӕ. Фӕлӕ бӕрӕг аххосӕгтӕм гӕсгӕ баззад ӕмӕ йӕ хӕстӕ ӕххӕст кӕнгӕйӕ хъӕбатырӕй фӕмард йæ хæстон æмбæлтты ирвӕзынгӕнгӕйӕ.
Куымæридтаты Мерабы мысгӕйӕ
Ӕртхъирӕны мӕй фынддӕсӕм бон,
Ӕрбалӕууыд, йӕ рад ӕрцыд.
Кӕмӕндӕрты уый у бӕрӕгбон,
Махӕн та нӕ бон ӕрхуым.
У номарынæн, цин кӕнынӕн.
Нӕ зӕрдӕтӕн та масты хос,
Нӕ иунӕг ӕфсымӕр мысынӕн,
Уӕззау, зӕрдӕрысты аххос.
Нӕ уыд хуыздӕр амонд Мерабы,
Бæрцӕй ссӕдз азы – йӕ цард.
Зӕрдӕскъуыд нӕ фӕкодта раджы,
Нӕ фыд ын не ′схаста йӕ мард.
Нӕ мӕгуыр мад-иу каст йӕ кьаммӕ.
Кӕугӕ, дзыназгӕ йӕм дзырдта
Æппынæдзух æм каст æнхъæлмæ.
Йӕ цардцух хъӕбулыл куыдта…
Сыгъд зӕххӕй исчи кӕд сӕхимӕ,
Йæ бинонтæм фӕстӕмӕ рцыд –
Цæрæт æнæниз, амондимæ
Сӕрӕгас уӕд ӕмӕ ӕвыд.
Сæ бæрæгбон сæ рох нæ уыдзæн
Хæстон æмгар æмæ хӕлар.
Кæдмæ цӕрой хæстон хæлæрттæ,
Мераб уыдзӕн уӕдмӕ æгас.
Нӕхӕдӕг та æнустæм ‘намонд
Цæгат, æфсымæры бæсты
«Ӕхсар фыды зӕххы сæраппонд»
Хъайтары – цырт уæлмæрды лæууы.
Хъайтар Куымæридтатæй басгуыхт
Йæ мад, йӕ фыды иунæг ныфс!
Дæуæн æппын цæрын нæ бантыст!
Дæ тæригъæдæй уæзæг сыгъд!
