Актер, режиссер, театралон хореографийы дæсны æмæ хорз адæймаг

Æвзонг адæймагæн йæ дарддæры царды фæндаг равзарынæн бирæ хатт баххуыс кæны хъысмæт дæр. Мæ абоны уацы хъайтарæн дæр хъысмæт баххуыс кодта йæ фидæны дæсныйад равзарынæн æмæ ссис зынгæ, курдиатджын актер. Уыимæ йын актер суæвынæн уыд æппæт бæрæггæнæнтæ дæр. Стыр хуыцау ын æнæвгъау схай кодта актеры курдиат, нæ йæ фæхъыг кодта зæрдæмæдзæугæ æддаг бакаст æмæ хъæздыг миддунейæ дæр.

Цалдæр мæйы размæ йæ 50-азы юбилей банысан кодта Хуссар æмæ Цæгат Ирыстоны сгуыхт артист, нæ театры курдиатджындæр актертæй иу — Харебаты Жан-Жак. Райгуырд горæт Цхинвалы 1972 азы. Йæ мад Розалинæ царды раст фæндагыл бафтыдта йæ хъæбулы. Æвзонг лæппу 5-æм астæуккаг скъола каст фæуыны фæстæ фыццаг аз не ссис студент. Фидæны ахуыры азæн та йæ хъуыд куысты стаж. Йæ хорз зонгæ йæ бакодта театрмæ «сау» кусæгæй. Æвзонг лæппу фæцыд коллективы зæрдæмæ, уыцы иурæстæджы йын радтой къаннæг ролтæ дæр. Уæдæй фæстæмæ нал фæхицæн театрæй.

1990 азы Хуссар Ирыстонæй Мæскуыйы Михаил Щепкины номыл театралон ахуыргæнæндонмæ æрвыст æрцыдысты 10 лæппуйы æмæ 6 чызджы. 1994 азы уыдон ахуыргæнæндон каст фесты æнтыстджынæй æмæ зæгъæн ис, абон театры уæз сæ уæхсджытыл æнцайы. Уыдон сты: Бибылты Сослан, Хуыгаты Дзамболат, Пæррæстаты Димитр, Харебаты Жан-Жак, Джиоты Альмæ, Таугазты Дзерассæ æмæ æндæртæ. Жан-Жак æхсызгонæй æрæмысы Мæскуыйы ахуыргæнæндоны йæ аивадон къухдариуæггæнæг В. Монахов, Исаты Мæхæмæт æмæ йæ бинойнаджы Хорзæн мысы Ерохина Татьянæ æмæ иннæ лекторты дæр. Хуссар Ирыстонмæ æрæздæхтысты цыппар спектаклимæ: «Худæджы хабар» — К. Гольдони, Шекспиры «Ромео æмæ Джульеттæ», Софоклы «Медея» æмæ Уанеты Владимиры «Алантæ»-имæ. Цыппар спектаклы дæр егъау уыд Жан-Жакы хайбавæрд, æххæст сæ кодта ахсджиаг ролтæ. Алыварсон курдиаты хицау бирæ вазыгджын куыстытæ æххæст кæны нæ театры. Спектаклты цы кæфтытæ, музыкæ, зарджытæ ис, уыдон æвæрæг вæййы Жан-Жак. Æдзух дæр ис царды гуылфæнты.

Æнæрынцой зæрдæйы хицау у Жан-Жак, бирæ цыдæртæ йæ фæнды саразын Ирыстоны фæлтæрæн. Систа цыбырметражон кинонывтæ: «Месть и закон» (Мастисæн æмæ закъон), «Везунчик» (Йæ хъул сах бады), «Рихиджынтæ хъуыддаджы». Кинонывтæм стыр райгондæй бакастысты хуссарирыстойнаг адæм æмæ сын æрхастой æнахуыр позитивон эмоцитæ. Театры спектаклты сфæлындзыны хъуыддаджы дæр егъау у йæ хайбавæрд. Фæлындзыны хъуыддагмæ хауынц: музыкæ равзарын, кæфтытæ сæвæрын, сценæйы массон хылтæ, тохтæ æмæ афтæ дарддæр. Жан-Жакы хъæппæрисæй арæзт æрцыд киностуди «Театр-арт». Уый тыххæй йæм сæрмагонд арфæйы фыстæг æрбарвыста РХИ-йы уæды президент, ахæм фыстæг ма райста Ульяновскæй дæр. 2004 азы йын лæвæрд æрцыд РХИ-йы сгуыхт артисты ном. Ахæм æвзонгæй сгуыхт артисты ном райсын егъау æнтыст у.

Курдиатджын артист Харебаты Жан-Жакæн йæ профессионалон фæндаджы райдиан æрхаудта национ аива-дæн уæззау рæстæджытæм. Ахæм дуджы дæр театр йæ куыст не ’рурæдта æмæ цæргæйæ баззадис сценæйæн лæггадгæнджыты фæрцы, кæцытæ æууæндыдысты знагæн бирæ цæрæнбон кæй нæй, театры куыст та йæ гаччы кæй æрбаддзæн æмæ та кæй кусдзысты сæ сценæмæкæсджытæн, ууыл. Курдиатджын артистæн тынг бирæ ролты бантыст æнтыстджынæй ахъазын. Шекспиры «Ромео æмæ Джульетта»-йы Пьетро, К. Гольдонийы «Худæджы хабар»-ы Гасконь, Уанеты Владимиры «Алантæ»-йы Сафа, Гаглойты Владимиры «Сухтаг фыдсылтæ»-йы Хъазуат, Гæбæраты Фаризæты «Лæгæт»-ы Робот Винтик, Шекспиры «Юлий Цезарь»-ы Октавий, Мольеры «Бынатмæ бырæг»-ы Ковель, Т. Брантоны «Тетя Чарлея»-йы Бабс, Галуанты Людмилæйы «Дзæнæты фæндаг зындонмæ»-йы Фидар, Гаглойты Владимиры «Ныййарæджы кадæг»-ы Дади, Пушкины «Пир»-ы Моцарт. Ацы ролтæн стыр аргъ скодтой æрмæст хуссарирыстойнаг сценæмæкæсджытæ нæ, фæлæ ма алыгъуызон фестивалты хайадисджытæ дæр. Жан-Жак музы-кæ равзæрста театры спектаклтæн, куыд зæгъæм, «Бынатмæ бырæг», «Фандо и Лис», «Дзæнæты фæндаг зындонмæ» æмæ æндæртæн. Сгуыхт артист ма у цалдæр спектак-лæн кæфтытæ æвæрæг: «Дыууæ усгуры», «Он, она, окно, покойник» æмæ æндæртæн. Артисты архайды ноджы иу здæхт у æвзонг фæлтæримæ куыст. Харебайы фырт ХИПУ-йы актерон хайады амоны сценæйон змæлд æмæ фехтование. Йæ коллегæ Уалыты Георги йæ хоны йæ хъуыддаджы æцæг дæсны, студенттæн æнæвгъауæй театралон аивады сусæгдзинæдтæ амонæг.

2003 азы августы мæйы, кæд дуг змæст уыд, уæддæр нæ театр гастролон балцы уыд Ачъарайы. Семæ аластой спектаклтæ: «Блуждающие ангелы», «Юлий Цезарь», «Тетушка Чарлея» æмæ «Амран». Батумы театрдзаутæ зæрдæрайæ сæмбæлдысты хуссарирыстойнаг театры минæвæрттыл. Уæлдай тынгдæр сæ цæст æрæвæрдтой Жан-Жакыл. Иууыл арфдæр сæ зæрдæмæ айстой Т. Брантоны комеди «Тетушка Чарлея»-йы. Газет фыссы: «Нельзя без восхищения смотреть на исполнителя главной роли актера Жан-Жака Харебова. У зрителя сложилось определенное впечатление об этом актере по предыдущим спектаклям. Он одинаково хорошо представляет в разноплановых ролях, перевоплощаясь то в один, то в другой образ (будь то драматический или комический). Это говорит о его таланте, профессионализме». Сценæмæкæсджытæ йæ сæйраг ролы, мады хойы ролы хъазгæ куы федтой, уæд бынтон егъау аргъ скодтой Жан-Жакæн, сæ дисæн кæрон нал уыд. Сæ газет дæр æй банысан кодта: «Даже женщина не смогла бы так ярко сыграть женскую роль, да еще и проявить свои музыкальные способности».

Харебайы фырт абон дæр уæхскуæзæй кусы нæ театры. Остъаты Аланы пьесæ «Фæстаг æвдисæн»-ы Жан-Жак хъазы Лохты Артены ролы. Йæ аивадæй йын райгондæй баззад Остъайы фырт йæхæдæг дæр.

Йæ коллегæтæ цыма æмдзырд бакодтой, уыйау иууылдæр Жан-Жакы схуыдтой курдиатджын актер æмæ зæрдæхæлар адæймаг. «Раздæр фæнд кодта кæнæ машинæаразæн институт кæнæ медицинон академимæ бацæуын, фæлæ, æвæццæгæн, хъысмæты фæндонмæ гæсгæ æрбахауд театрмæ. Тынг курдиатджын актер у. Йæ арæзт фæлгæнцтæ баззадысты сценæмæкæсджыты зæрдæйы. Куыд коллегæ, афтæ дæр у тынг æнувыд хæлар», — загъта паддзахадон драмон театры аивадон къухдариуæггæнæг Дзуццаты Тамерлан.

«Йæ курдиат алывæрсыг у. Тынг æвзыгъд у зарынмæ, кафынмæ. Тынг хорз æмæ зондджын актер у. Жан-Жакимæ бирæ спектаклты ахъазыдыстæм æмæ йемæ у тынг æнцон кусæн. Куыд хæлар, афтæ дæр ын æмбал нæй. Сайдæй дыл никуы разилдзæн. Театралон аивад йæ ныхыфыст у», — загъта йæ коллегæ, РХИ æмæ РЦИ-Аланийы сгуыхт артист Тъехты Васили.

2017 азы дунеон фестиваль «Сцена без границ»-ы хуссарирыстойнаг театры артисттæ равдыстой спектакль «Тугæйдзаг чындзæхсæв» Гаглойты Владимиры пьесæмæ гæсгæ. Режиссер-æвæрæг уыдис Тъехты Васили. «Сценæмæкæсджытæ актертыл сæмбæлдысты хъармæй æмæ сæ сценæйæ фæндараст кодтой тыхджын къухæмдзæгъдимæ. РЦИ-Аланийы Сæргълæууæджы Барамындæй Харебаты Жан-Жакæн лæвæрд æрцыд РЦИ-йы сгуыхт артисты ном», — хъусын кодта 15 регион.

Мах дæр арфæ кæнæм Харебаты Жан-Жакæн йæ юбилейон райгуырæн боны цытæн. Нæ зæрдæ йын зæгъы бирæ азты цæрæнбон æмæ дарддæры сфæлдыстадон æнтыстытæ.

Джиоты Екатеринæ