Цхинвалы районы администрацийы Культурæйы управлени ацы бонты йæ аивад æвдисын райдыдта хъæууон фæллойгæнджытæн. Æрæджы та адæмон театры коллектив уыд Къостайыхъæуы æмæ йæ зæрдæмæдзæугæ аивадæй барухс кодта бынæттон цæрджыты зæрдæтæ. Уыдон сын равдыстой Нартыхты Григолы музыкалон комеди «Файнустытæ». Хæдахуыр артисттимæ зæрдиаг куыст кæны æвæрæг-режиссер æмæ аивадон къухдариуæггæнæг, Цæгат æмæ Хуссар Ирыстоны, Хъæрæсе-Черкескы сгуыхт артист Уанеты Æхсар. Спектаклы хъазыдысты æмæ сценæмæкæсджыты размæ зæрдæмæдзæугæ фæлгæнцтæ рахастой Джыккайты Эльбрус, Козаты Сæлимæт, Джыгкайты Тузар, Хаситы Инарæ, Цоциты Къола æмæ Остъаты Алан. Театрдзаутæм цы-мыдис сæвзæрын кодта артистты хъазт æмæ сын сæ алы ралæудыл дæр æмбæлдысты цины æнкъарæнтимæ.

Культурæйы управленийы сæргълæууæг Гаглойты Ростик куыд банысан кодта, афтæмæй сæ аивадимæ базонгæ кæндзысты канд сæхи районы цæрджыты нæ, фæлæ ма сæ зæрды ис, цæмæй сын сæ аивадмæ бакæсой республикæйы районты æппæт фæллойгæнджытæ дæр. Уый тыххæй культурæйы сæргълæуджытимæ развæлгъау  бакæндзæн цæттæгæнæн куыст.

                                                       Хуыбиаты Никъала

Comments are closed, but trackbacks and pingbacks are open.