Ивгъуыд къуырийы кæрон Республикæ Хуссар Ирыстоны Культурæйы министр Зæгъойты Радайæн «Спутник – Хуссар Ирыстон»-ы пресс-центры уыд пресс-конференци, цыран æрдзырдта, министрад дарддæр цæуыл кусдзæн æмæ сæм цы пълæнттæ ис, уыдæтты тыххæй.
Культурæйы министр фыццаджыдæр банысан кодта, Галаты Барисы номыл Хуссар Ирыстоны паддзахадон ансамбль «Симд»-ы гастролон балц Мæскуымæ кæй уыд ирон национ культурæйæн ахсджиаг æмæ нысаниуæгджын цау. «11-æм марты «Симд» горæт Мæскуыйы аивадуарзджытæн Петр Чайковскийы номыл концертон залы радта цымыдисон концерт. Нæ легендарон ансамбль ацы зындгонд сценæйыл фæстаг хатт ирон культурæимæ уæрæсейаг аивадуарзджыты зонгæ кодта дыууын азы размæ, 2004-æм азы. Уæдæй абонмæ ансамбль раивта цалдæр фæлтæр кафджыты. Ныр ирон кафты аивад адæмы рæгъмæ рахастой кафджыты ног къорд, нæ абоны фæсивæд. Мæ хъуыдымæ гæсгæ, ансамбль ацы зындгонд сценæйыл æмбæлон æмвæзадыл равдыстой национ культурæ. Банысан кæндзынæн уый дæр, æмæ ныл нæ фысымтæ тынг хорз кæй сæмбæлдысты æмæ нæ кæй суазæг кодтой. Хуссар Ирыстон æмæ нæ культурæйы минæвæрттæм уыд тынг хъарм ахаст. Мæскуыйы хореографион коллективы гастролтæ ацыдысты проект «Обменные культурные мероприятия России и Южной Осетии»-йы программæйы фæлгæтты», – банысан кодта министр.
Зæгъойты чызг ма йæ ныхасмæ бафтыдта, зæгъгæ, «Симд»-æн фæстаг азты сæ серьезон куысты руаджы ис размæцыд æмæ зынгæ фæхуыздæр æмæ активондæр сты. Ацы хъуыддагæн æвдисæн сты куыд бынæттон сценæмæкæсджытæ, афтæ республикæйæн æдтейæ дæр. Паддзахадон ансамблы концертæн стыр аргъ скодта нæ бæстæйы сæргълæууæг Гаглойты Алан дæр æмæ сын æрæджы сæрмагондæй раарфæ кодта.
Пресс-конференцийы культурæйы министр фехъусын кодта, зæгъгæ, ацы аз паддзахадон ансамбль «Симд» концерттæ равдисдзæнис Уæрæсейы Федерацийы цыппар горæты. «Фыццаджыдæр ансамбль ацы аз майы мæйы концертон программæимæ фæуазæг уыдзæн Луганскмæ. Куыд пълан кæнæм, уымæ гæсгæ сæрды райдианы концерттæ хъуамæ равдисæм Махачкала, Дербент æмæ Грознæйы», – загъта министр.
Зæгъойты Рада ма куыд банысан кодта, афтæмæй ацы концерттæ уагъд цæудзысты Уæрæсе æмæ Хуссар Ирыстоны культурæты министрадты æмгуыстады фæлгæтты, афтæ ма «Росконцерт»-ы архайды руаджы.
12-æм июны куыд æппæт Уæрæсейы Федерацийы, афтæ Хуссар Ирыстон дæр цытджын æгъдауæй банысан кæны Уæрæсейы бон. Зæгъойты Рада куыд банысан кодта, афтæмæй уыцы бæрæгбоны цытæн Хуссар Ирыстоны столицæмæ концертон программæимæ фæуазæг уыдзæн Мæскуыйы кафты паддзахадон академион театр «Гжель». Уый сырæзт 1988 азы хореограф Владимир Захаровы архайды руаджы æмæ йын ис алыгъуызон концертон репертуар. Зындгонд у куыд Уæрæсейы, афтæ фæсарæнты дæр.
«Хуссар Ирыстоны ацы концерт, сæйраджыдæр, организацигонд цæуы Уæрæсейы боны цытæн. Мах ныридæгæн цæттæ кæнæм ацы мадзал ауадзынмæ», – банысан кодта министр.
Пресс-конференцийы ма Зæгъойты Рада банысан кодта, Хетæгкаты Къостайы номыл паддзахадон драмон театрæн ивгъуыд аз кæй уыд æнтыстджын. Театр арæх цыдис гастролты æмæ та сæ ныр дæр фæхуыдтой Национ театрты æппæтуæрæсейаг фестиваль «Федерация»-мæ. Министр куыд фехъусын кодта, афтæмæй ацы фестиваль уагъд цæудзæнис Цæцæны республикæйы æмæ уым нæ артисттæ равдисдзысты Хуыгаты Георы пьесæмæ гæсгæ æвæрд спектакль «Сау нымæт».
«Ацæугæ аз махæн уыд æнтыстджын. Мах активонæй æмгуыстад кæнæм Уæрæсейы Федерацийы Культурæйы министрадимæ, иттæг хорз бастдзинæдтæ æрбиноныг кодтам Уæрæсейы хицæн регионтимæ. Мах æрæджы фестиваль «Федерация»-мæ райстам хонæн æмæ дзы стыр æхсызгонæй хайад райсдзыстæм», – загъта уый.
Культурæйы министр ма журналисттæн радзырдта, Хуссар Ирыстоны театралон аивады райрæзты проблемæ баст кæй у кадрты цухдзинадимæ, нæ фаг кæнынц режиссертæ дæр æмæ уый тыххæй министрад активонæй архайы, цæмæй бацæттæ кæной дæсны специалистты Уæрæсейы театралон уæлдæр ахуыргæнæндæтты. «Фæстаг хатт Уæрæсейы уæлдæр ахуыргæнæндæтты ирон курс рауагътой 2013-æм азы. Уыцы рауагъдонтæй нæ театры ныртæккæ кусынц Мамиты Григори, Мæргъиты Ингæ, Кокойты Иннæ æмæ Джелыты Хъазбег. Мæ хъуыдымæ гæсгæ, ныр дæр рæстæг æрдомдта, цæмæй та ногæй байгом кæнæм ирон курс Уæрæсейы.
Абоны бон нæ театры æрмæстдæр кусы цыппар режиссеры. Уыдонæй иу у нæ театры аивадон къухдариуæггæнæг Дзуццаты Тамерлан, Чилæхсаты Эдуард, Хъотайты Сæрмæт æмæ Джелыты Хъазбег. Уыдон фаг не сты. Цæмæйдæриддæр театралон аивад рæза æмæ хъæздыгдæр кæна репертуар, уый тыххæй хъæуы фылдæр режиссертæ», – банысан кодта Культурæйы министр. Уый ма куыд бамбарын кодта, афтæмæй министрады фæнды, цæмæй ирон курсытæ бакæной Барис Щукины номыл театралон институты æмæ Михаил Щепкины номыл уæлдæр театралон ахуыргæнæндоны.
Пресс-конференцийы ма культурæйы министр куыд фехъусын кодта, афтæмæй Хуссар Ирыстоны культурæйы бонтæ Хъырымы ацæудзысты августы мæйы кæрæтты кæнæ сентябры мæйы райдианты. «Ацы фарстыл ныридæгæн цæуы куыст æмæ йæ аскъуыддзаг кæндзыстæм. Хъырымы культурæйы бонтæ та Хуссар Ирыстоны ацæудзысты фидæнмæ, афтæ бафæндыд нæ коллегæты ацы регионæй», – банысан кодта Зæгъойты Рада.
Культурæйы министр ма журналисттæн радзырдта æндæр фарстаты тыххæй дæр æмæ банысан кодта Хуссар Ирыстоны культурæйы министрад æмгуыстады фæлгæтты Уæрæсейы æндæр æмæ æндæр регионтимæ кæй уадздзысты алыгъуызон мадзæлттæ, кæцыты хайад исдзысты нæ республикæйы сфæлдыстадон коллективтæ.
КОЦТЫ Еленæ