Нæ горæты сыгъдæгдзинадыл æдзухдæр чи кусы, уый у хæрзарæзтады куыстуат. Зæгъын хъæуы, уынгты цы бырæттæ æрæмбырд вæййы, уыдон мæрзын æмæ сæ æмбæлон бынатмæ аласыныл кæй кусынц йæ кусджытæ. Ацы куыстуаты ма горæты аивдзинадыл æппынæдзух чи кусы, уый у цъæхвæлысты хайад. Уый та архайы горæты сквертæ, фæзуæттæ, парктæ æмæ æндæр æхсæнадон бынæтты саив æмæ срæсугъд кæныныл, разамынд та йын кæны йæ хъуыддагыл иузæрдион æмæ æнувыд кусæг Пæррæстаты Иринæ. Уый кæддæриддæр куысты рæстæджы вæййы йæ кусджытимæ, кусы æмæ архайы уыдон хуызæн æмæ сæ разæнгард кæны гъæдджын æмæ æнæзæрдæхудт фæллоймæ. Пæррæстаты чызг ландшафтон дизайнеры дæсныйадыл ахуыр кодта сæрмагондæй æмæ уымæ гæсгæ бæстон базыдта, алыгъуызон дидинджыты æмæ декоративон талаты хиæдтæ, стæй сæ цахæм æмгъуыдты фæхъæуы садзын. Цæмæй уыдон рæзой æнæкъуылымпыйæ, уый тыххæй йæ кусджытимæ феххæст кæнынц агротехникæйы домæнтæ æмæ æппæт уыдæтты фæрцы разыны сæ арфæйаг куыст. Ацы куыстуаты фæллой кæны 30 адæймагмæ æввахс æмæ сæ алчи дæр лæуд у æнæзæрдæхудт фæллойыл.
Горæт срæсугъд кæныныл та бакусдзысты ацы аз дæр. Уæдмæ уал банысангонд бынæтты мæр æрцæттæ кодтой дидинджытæ садзынмæ. Ласгæ та сæ æркодтой Пятигорскæй. Стыр парчы уал ныссагътой туяйы талатæ – 60 иуæджы, уыдон куы фæуой, уæд та æрæвналдзысты церцисы талатæ садзынмæ, уыдон дæр сты 60 талайы. Æрмæст уыдоныл нæ фæуыдзæн сæ куыст, ацы æввахс рæстæджы æрласдзысты алыгъуызон дидинджытæ, рæсугъд тгълатæ æмæ сæ садзын райдайдзысты æмбæлон бынæтты.
ХУЫБИАТЫ Никъала
