Æрæджы паддзахадон драмон театры Республикæ Хуссар Ирыстоны Президенты цур ирон национ зарæджы паддзахадон хор æмæ сывæллæтты хорæн уыд хыгъдон концерт. Ардæм фæуазæг ис РХИ-йы Культурæйы министр Зæгъойты Рада æмæ хорзæхтæ радта артисттæн. Уый тыххæй нын фехъусын кодтой нæ республикæйы Культурæйы министрады пресс-службæйы.
«Сфæлдыстадон коллективтæ сæ хъазтизæры сценæмæкæсджытæн равдыстой уæрæх концертон программæ. Фæсивæд концертмæ сæхи зæрдиагæй кæй бацæттæ кодтой, уый æнæрахатгæ нæ фесты сæ арæхстдзинадæн аргъгæнджытæ. Æрыгон артисттæ сценæйыл сæххæст кодтой ирон адæмон, хъайтарон æмæ аргъуаны зарджытæ, кæцытæн музыкæ йæ рæстæджы ныффыста ацы паддзахадон хоры бындурæвæрæг, Республикæ Хуссар Ирыстоны адæмон артист, дзæнæттаг Дзаттиаты Анисим. Адæм зарджытыл æмбæлдысты стыр æхсызгонæй, мадæлон æвзагыл кæй зæлыдысты æмæ ирон зарæг бæрзонд æмæ аивæй кæй систой, уый тыххæй. Хоры зард адæймагмæ æвзæрын кодта патриотикон æнкъарæнтæ æмæ мадæлон æвзагмæ уарзондзинад. Концертон программæйы рафидауын кодтой уырыссаг æмæ хъазахъхъаг адæмон зарджытæ», – банысан кодтой пресс-службæйы.
Зæгъойты Рада концерты рæстæджы арфæ ракодта паддзахадон хоры къухдариуæггæнæг Къæбысты Сæрмæтæн æмæ дирижертæ – Гаглойты Варлам æмæ Мзареулишвили Лианæйæн сæ егъау куысты тыххæй. Сфæлдыстадон коллективæн министры цæст бауарзта ног æнтыстытæ: «Махæн нæ национ культурæйы райрæзты хъуыддаджы æндæр æмæ æндæр рæстæджыты егъау куыст чи бакодта æмæ абон уыцы традицитæ чи дарддæр кæны, ахæм аккаг æмæ нæм профессионалон адæймæгтæ бирæ ис. Хуссар Ирыстоны культурæйы минæвæрттæй ахæм аккаг адæймæгтæй сæ иу уыд курдиатджын композитор æмæ нацийы ирд минæвар Дзаттиаты Анисим. Уый егъау хайбавæрд бахаста нæ ирон культурæйы рæзтмæ æмæ йæ ном æнустæм фыст æрцыд национ культурæйы историйы. Йæ æнæмæлгæ уацмыстæ йын кæддæриддæр зондзысты æмæ сын аргъ кæндзысты фæлтæрæй-фæлтæрмæ. Уымæн æвдисæн абоны хоры архайд æмæ концерт дæр. Анисим йæ фæстæ цы хæрзиуæгон æмæ уарзон хъуыддаг ныууагъта, уый аккагæй дарддæр кæнынц йæ ахуыргæнинæгтæ æмбæлон æмвæзадыл æмæ сын уый тыххæй зæгъын арфæйы ныхæстæ», – загъта РХИ-йы Культурæйы министр. Уый ма йæ раныхасы банысан кодта, зæгъгæ, абон ацы сфæлдыстадон коллективы архайд кæй у ахсджиаг, афтæ ма хоры дыууæ фæлтæры кæй кусынц æмæ ирон зарды хъуыддаг кæй размæ кæнынц, уый.
Хъазтизæры кæрон Зæгъойты Рада Республикæ Хуссар Ирыстоны Президент Гаглойты Аланы номæй кады грамотæтæй схорзæхджын кодта артистты иу къорды. Грамотæтæ райстой Еналдыты Ирбег, Дзасохты Отар, Гæджиты Марат æмæ Бекъойты Яков. Республикæ Хуссар Ирыстоны Культурæйы министрады кады грамотæтæй та хорзæхджын æрцыдысты Бестауты Алан, Тохъмайты Илья æмæ Хъæцлæуты Артур.
Нæ уацх.
