Æрæджы нæ республикæйы культурæйы министр Зæгъойты Рада нæ горæты Тугъанты Махарбеджы номыл нывгæнæн ахуыргæнæндоны хуыздæр студенттæй дыууæйæн цытджын æгъдауæй радта РХИ-йы Культурæйы номыл стипендитæ.
Министры къухтæй ацы аз стипендитæ райстой нывгæнæн ахуыргæнæндоны 3-аг æмæ 4-æм курсыты студенткæтæ Цоциты Миланæ æмæ Тараты Ирэнæ. Уый тыххæй нын фехъусын кодта министрады пресс-секретарь Хуыгаты Аланæ. Уый куыд банысан кодта, уымæ гæсгæ Республикæ Хуссар Ирыстоны культурæйы министрады стипенди фидар æрцыд 2022 азы нывгæнæн ахуыргæнæндоныл 85 азы сæххæсты цытæн, цæмæй аивады бæрзæндтæм чи тырны, уыцы студенттæн уа уæлæмхас разæнгардгæнæн фæрæз сæ ахуыры хъуыддагмæ.
Ацы ахуыры азы министрады стипенди хуыздæр студенттæн лæвæрд æрцыд дыккаг хатт. Снысангонд æрвылмæйон стипенди у 3 мин сомы бæрц æмæ йæ министр радты дæс мæйы иу хатт.
«Нæ ведомство тынг цымыдис кæны æрыгон кадртæ бацæттæ кæныны хъуыддагмæ. Ныфс мæ ис, сымах цы фæдыздæхт равзæрстат, уымæй фидæны кæй фæхъæздыгдæр уыдзæн ног профессионалон кадрты нымæц æмæ мах æвдисæн уыдзыстæм æмæ хъусдзыстæм уе стыр æнтыстыты тыххæй, – загъта РХИ-йы Культурæйы министр.
Зæгъойты Рада ма арфæ ракодта нывгæнæн ахуыргæнæндоны директор Зассеты Сæрмæт æмæ æппæт педагогон коллективæн сæ иузæрдион куыст æмæ архайды тыххæй, сфæлдыстадон фæсивæды хъомыладмæ уæзгæ хайбавæрд кæй хæссынц æмæ нывкæнынады аивад кæй размæ кæнынц, уый тыххæй.
Нæ республикæйы культурæйы министрады пресс-службæйы ма нын куыд фехъусын кодтой, уымæ гæсгæ ма ацы аз министрады стипендитæй схорзæхджын кæндзысты Цхинвалы Æлборты Феликсы номыл музыкалон ахуыргæнæндоны дыууæ хуыздæр студенты.
ЦХУЫРБАТЫ Ларисæ
