Компани «Мегафон Хуссар Ирыстон»-ы æхсæнадимæ бастдзинады хайады минæвар Бежанты Заринæ хъусын кæны, цæмæй бынæттон абоненттæ активонæйдæр пайда кæной Мегафоны лæггæдтæй, уый тыххæй кæй бакуыстой уæлæмхас тарифтыл. «Мах дзæвгар фæхуыздæр кодтам тарифтæ «Стартон», «Максималон» æмæ «Нымæцон». Пакетон тариф «S» ныртæккæ абонентты ‘хсæн у иууыл популярондæр. Тынг дзы пайда кæнынц куыд сывæллæттæ, афтæ ацæргæ адæймæгтæ дæр. Иннæ тарифтæ дæр пайда æмæ æнцовадат кæй сты, уый тыххæй мæ фехъусын кæнын фæнды абоненттæм», – зæгъы Бежанты Заринæ.
Уый лæмбынæг æрдзырдта, 2023 азы тарифон пакеттæм цы ивындзинæдтæ бахæссынмæ хъавынц, уыдоны тыххæй, цæмæй бастдзинады гъæд æмæ дзы пайдакæнынад фæактивондæр уа.
«Стартон» линейкæйы тарифæй пайдагæнджытæн мæйы мидæг, хызæджы кæд 800 сомæй пайдагæнæн уыд 600 минуты «Остелеком»-ы номыртæ æмæ 8 Гб интернетæй, уæд ныр та уыцы абоненттæн сæ интернет пайдакæныны пакет фæфылдæр, фæлæ аргъ та баззад, нырмæ куыд уыд, афтæ. «Нымæцон»-æй ис æнæлимитон бахизæн популярон мессенджертæ æмæ социалон хызæгтæм. Афтæ ма абоненттæн лæвæрд цæудзæн 15 Гб интернет-трафик æмæ 1000 минуты хызæджы мидæг дзурынæн. Иууыл егъаудæр пакет «Максималон»-ы уыдзæн æнæлимитон бахизæн æрмæст популярон мессенджертæм нæ, фæлæ ма видеохостингтæм æмæ музыкалон фæзуæттæм. «Стартон» æмæ «Нымæцон» тарифты ма ис ног опци «Мегафон 100 минут» уæрæсейаг операторты номыртæм бадзурынæн. Абоненттæ сæхæдæг скъуыддзаг кæндзысты, баиу æй кæной, æви нæ. Аафтæ ма 2023 азы фыццаг кварталæй абоненттæн сæ интернет-трафикы бæрц фæфылдæр кодтам, фиддонтæ та куыд уыдысты, афтæ баззадысты», – бамбарын кодта йæ ныхас Бежанты Заринæ.
2023 азы ма «Мегафон Хуссар Ирыстон»-ы компани сараздзæн ног фиксацигонд хызæг. Ацы проект фадат ратдзæнис хæдзарон уæрæх фæскъауон интернетмæ бахизынæн. Ахæм бастдзинадæй ныртæккæ пайда кæнынц, куыд нæ республикæйы юридикон æмæ коммерцион организацитæ, афтæ ма паддзахадон органтæ дæр.
УАЗÆГТЫ Марфа
