Республикæ Хуссар Ирыстоны районты хъæуты сæ тæмæны сты хуым кæнын – тауыны куыстытæ.
Паддзахадон куыстуат «Ирагропром-сервис»-ы тыхтæй республикæйы æдæппæт хуымгонд æрцыд 2 мин гектары хъæууонхæдзарадон зæххытæ, – зæгъы хъæууон хæдзарады министрады зайæгойтæ æмæ механизацийы управленийы сæйраг специалист Дыгъуызты Таймураз.
Абоны бонмæ уал 140 гектары фæззыгæнд мæнæу байтыд æрцыд Ленингоры, 75 – Цхинвалы районы æмæ Знауыры районы та 79 гектары.
Уалдзыгæнд мæнæу Ленингоры районы байтыд æрцыд 710 гектары фæзуатыл, Цхинвалы районы 80 гектары æмæ Знауыры районы та 150 гектары фæзуатыл.
Дыгъуызты Таймураз куыд загъта, афтæмæй арендатортæ сæхæдæг самал кодтой тауинæгтæ.
Банысан кæнын хъæуы уый, æмæ хъæууон лæг æнæ техникæйæ æнæ базыр маргъæй уæлдай кæй нæу. Йæ куыстытæ рæстæгыл куынæ бакæна, уæд уый, æвзæрдæрдæм бандавдзæн тыллæгæрзадыл. Æмæ сын ацы хъуыддаджы та сæ къух фæрог кæны «Ирагропром-сервис». Æцæг, уыдонæн дæр сæ техникæ базæронд æмæ арæх фехæлынц, фæлæ уæддæр, архайынц зын уавæрæй рахизыныл. Архайынц зæронд техникæ сцалцæг æмæ сæ куыстæввонг дарыныл. Ныр дæр та ивæн хæйттæ балхæндзысты, таугæ æмæ культиваци чи кæны, уыцы трактортæн.
Хъæу кæддæриддæр фидыдта йæ хуымзæххытæ æмæ угæрдæнтæй, уымæ гæсгæ нæ паддзахад агуры уавæртæ æмæ амæлттæ, цæмæй ногæй хъæууон хæдзарад йæ къахыл слæууа æмæ уый нысанæн хъæууон цæрджытæй йæ хъуыддаг райтынг кæнын кæй фæнды, уыдонæн лæвæрд цæуы кредиты хуызы æххуыстæ.
БЕСТАУТЫ Валя
Comments are closed, but trackbacks and pingbacks are open.