Кусынæн бæзгæ боныгъæдæй рæстæгыл чи спайда кæны, уымæн кæддæриддæр йæ куысты вæййы зæрдæрухсгæнæн фæстиуджытæ. Уыцы хъуыддаг сæ зæрдыл дарынц Знауыры районы хицæн фермерон хæдзарадтæ æмæ фæтырнынц, афæдзы дæргъы сæ разы цы бакæнинаг куыстытæ вæййы, уыдон афоныл æмæ гъæдджынæй ахицæн кæныныл.
Куысты ахæм уагыл архайынц механизатортæ дæр æмæ æдзухдæр сæ фарсмæ балæууынц хæдзарадтæн. Цæвиттон, Уелиты тракторон бригадæйы бригадир Наниты Талик сæйраг хъусдард здахы йæ бæрны уæвæг техникæйы дырыс куыстмæ, цæмæй уыдон та сæхи рады æнæкъуылымпыйæ архайой зæхкусæджы æнæаргъæвгæ куыстытæ ахицæн кæныныл.
Механизатортæн уал бантыст 300 гектары фæзуатыл мæр афæлдахын æмæ уымæй фæрог кодтой зæхкусæджы ахсджиаг домæнтæ. Хуым кæныныл зæрдиагæй бакуыстой механизатортæ Кокойты Эдик, Гæззаты Андрей, Гаглойты Витик, Пицкъаты Анзор, Табуты Радик æмæ Хуыбецты Гали. Уымæй дарддæр ма хицæн хæдзарадты бацархайдтой фæззыгæнд мæнæу байтауыныл дæр. Зæгъæм, Цхинвалы районы Ирыхъæуы Сиукъаты Робертæн фæззыгæнд мæнæу тыд æрцыд 55 гектары, Бахъатыхъæуы Кокойты Димайæн байтыдтой 50 гектары, 30 гектары Иончайы хъæуы та тыд æрцыд Джиоты Лаврентæн æмæ афтæ дарддæр. Ацы куыстытæ ахицæн кæныныл сæрмагондæй куыстой механизатортæ Кокойты Эдик æмæ Пухаты Дзантемыр.
Хуыбиаты Никъала
