Хыгъд радта хъахъхъæнынады министрад

Республикæ Хуссар Ирыстоны Хъахъхъæнынады министрад 14 марты хыгъд радта аивгъуыйгæ 2018  азы бакæнгæ куысты фæдыл. Хыгъдон æмбырды хайад райста  Президент Бибылты Анатоли. Республикæйы Хъахъхъæнынады министр Гассеты Ибрагим æрдзырдта 2018 азы боны фæткы  иууыл ахсджиагдæр фарст – нæ республикæйы национ æфсады сомбоны фæдыл.

«Ацы фарсты фæдыл бирæ алыгъуызон хъуыдытæ ис фехъусæн. Кæй зæгъын æй хъæуы, нæ республикæйы сабырад æмæ стабилондзинад хъахъхъæд цæуы, æмæ нын уæрæсейаг æфсæддон контингенты фæрцы та ис фадат, цæмæй биноныг кæнæм нæ паддзахады  социалон æмæ экономикон фадыджы сомбон. Уæрæсейы Федераци махæн у нæ сабырады  сæйраг гарант. 2017 азы 31 марты Мæскуыйы Уæрæсейы  Федераци æмæ Республикæ Хуссар Ирыстоны ‘хсæн къухтæ фыст æрцыд Æмгуыстад æмæ интеграцийы фæдыл  бадзырдыл, цыран дзырд цæуы нæ республикæйы Хъахъхъæнынады иуæй-иу  æфсæддон хæйтты бацыдыл Уæрæсейы Гарзджын тыхты скондмæ, ома, не ‘мбæстæгтæн фæзынд се ‘фсæддон службæ æххæст кæныны фадат, нæ республикæйы  цы уæрæсейаг 4-æм æфсæддон базæ уæвынад кæны, уый сконды. Æмæ ис зæгъæн, нæ министрад кæронмæ ацы фарста кæй аскъуыддзаг кодта. Нæ республикæйы æмбæстæгтæй æртæ сæдæйы бæрц æрвыст æрцыдысты нæ республикæйы уæвæг уæрæсейаг  4-æм гвардион базæйы скондмæ. Сæдæйы бæрцæй та сæ фæндондзинад равдыстой, се ‘фсæддон службæ уæрæсейаг æфсæддон базæйы сконды æххæст кæныны тыххæй», –  банысан кодта Гассеты Ибрагим. Уый ма куыд загъта, афтæмæй   нæ республикæйы Хъахъхъæнынады министрады фæнд кæнынц æхсæнадон совет саразын, кæцы кусдзæн министрады дæлбар. Æхсæнадон советы скондмæ конд æрцæудзысты нæ республикæйы æхсæ-нады, æрсиддонты ныййарджыты  æмæ хæстон архайдтыты ветеранты минæвæрттæ. Советы сæйраг куыстмæ хаудзысты æфсæддон- патриотон хъомылад, æфсæддон службæ куыд æххæст цæуы, уымæ хъус дарын æмæ афтæ дарддæр. Афтæ ма Гассеты Ибрагим бахæс кодта министрады Генералон штабæн, цæмæй  бакусой æмæ  кæронмæ бакæной Æфсæддон доктринæйы проект,  национ æфсæддон тыхты райрæзты Концепци саразыны фæдыл куыст. «Æз нымайын афтæ, æмæ ацы документы хъуамæ каст æрцæуа ахæм фарстатæм, куыд национ æфсæддон тыхты хæстхъом арæзт, кæцытæ цæттæ уыдзысты сæхимæ фыццаг цæф райсынмæ», – банысан кодта министр.

Республикæ Хуссар Ирыстоны Хъахъхъæнынады министрады Генералон штабы хистæр Виктор Федоров æрдзырдта нæ республикæйы алыварс сæвзæргæ уавæры тыххæй. «Гуырдзыстоны хицауады политикæ комкоммæ дæр баст у йæ территориалон  æнæхъæндзинад сæндидзын кæнын æмæ Ныгуылæн бæстæтимæ æнгом куыст кæнынимæ. Сæ рады Ныгуылæн бæстæты лидертæ, уæлдайдæр та – Америкæ, алыварсонæй æххуыс кæнынц Гуырдзыстонæн ацы фарстатæ аскъуыддзаг кæныны хъуыддаджы. Гуырдзыстоны Æфсæддон политикон курс здæхт у йе ‘фсæддон потенциал фæбæрзонддæр кæнын æмæ йе ‘фсæддон тыхтæ НАТО-йы скондмæ бакæныны ‘рдæм. Мах уынæм, Гуырдзыстоны æфсæддон тыхтæ сæхи интенсивонæй кæй цæттæ кæнынц НАТО-йы стандарттæм гæсгæ», – банысан кодта Виктор Федоров. Уый ма куыд загъта, афтæмæй Гуырдзыстоны къухдариуæгад  къух нæ фыссы Хуссар Ирыстоны ныхмæ тыхæй ма спайда кæныны фæдыл меморандумыл, æмæ уый та ууыл дзурæг у, æмæ Гуырдзыстон кæй разы кæны тыхæй спайда кæныныл Хуссар  Ирыстоны ныхмæ. «НАТО-йы бæстæтæ æмæ Америкæ стыр æххуыс кæнынц æмæ йæ фарс хæцынц Гуырдзыстонæн йæ агрессивон плæнтты, Гуырдзыстоны къухдариуæгад активон æгъдауæй фылдæр æмæ хъæздыгдæр кæнынц се ‘фсæддон потенциал ацы бæстæты руаджы, уыдон æппæт документтыл дæр къухтæ фыссынц, цæмæй  се ‘фсæддон тыхтæ  æрцæуой нырыккон æфсæддон хæцæнгæрзтæй ифтонггонд. Мах æвдисæн стæм, Гуырдзыстоны æфсæддон хæйттæ хайад кæй фæисынц алыгъуызон фидауынгæнæг операциты Европæйы бæстæты Америкæйы æфсæддон тыхтимæ иумæ»,  –  загъта Виктор Федоров.

Виктор Федоров ма хъусдард аздæхта Хуссар Ирыстоны арæнмæ æввахс  Гуырдзыстон кæй сæвæрдта биолаборотори Ричарда Лугары номыл. Кæй зæгъын æй хъæуы, уый алы хатт дæр  «биологон  тасдзинад» æвзарын кæндзæн Хуссар Ирыстонæн. «Ацы лаборатори Гуырдзыстоны конд æрцыд Америкæйы егъау æххуысы руаджы 2011 азы. Гуырдзыстоны æнæниздзинад хъахъхъæныны министрад фехъусын кодта, зæгъгæ ацы лаборатори 2013 азæй фæстæмæ ис Гуырдзыстоны национ центры дæлбар» – фехъусын кодта Генералон штабы хистæр. Уый ма куыд загъта, афтæмæй ацы лаборатори тасдзинад æвзæрын кæны канд хуссарирыстойнæгтæн нæ, фæлæ Гуырдзыстонæн йæхицæн дæр. 2018 азы кæрон Гуырдзыстоны кæй апарахат сты алыгъуызон вирусон гриппы хуызтæ, уымæ гæсгæ Хуссар Ирыстоны къухдариуæгад сыхаг паддзахадимæ сæхгæдта арæнтæ.

Ныхасы рацыд РХИ-йы Президент Бибылты Анатоли дæр æмæ  банысан кодта, зæгъгæ министрады дæлхæйттæ кæддæриддæр хъуамæ уой мобилон æмæ егъауэффективон. «Æфсæддон рæнхъыты службæгæнджытимæ кусын хъæуы æфсæддон цæттæдзинады фæдыл индивидуалон æгъдауæй. Егъау бынат æфсæддон рæнхъыты ис æфсæддонты уагахастæн,  афтæ ма егъау хъус дарын хъæуы  сæрмагонд дæлхæйттæн сæ  моралон æмæ психологон уавæрмæ», – банысан кодта бæстæйы сæргълæууæг. Йæ раныхасы Бибылты Анатоли æрдзырдта, æфсæддонтæн куыстмызд æмæ социалон ифтонгдзинад фæфылдæр кæныны фарстатыл. «Æнæмæнг дæр æркæсын хъæуы æфсæддон рæнхъыты службæгæнджытæн сæ куыстмызд фæфылдæр кæныны фарстмæ. Цæмæй ацы фарст скъуыддзаг æрцæуа, уый тыххæй цавæр фæрæзтæ ис паддзахадон бюджетæй райсын æмæ нæ нæ уæрæсейаг коллегæтæ цы фæрæзтæй сифтонг кæндзысты», – банысан кодта Бибылты Анатоли. Бæстæйы сæргълæууæг куыд загъта, афтæмæй æфсæддонæн йæ куыстмызд куы фæфылдæр уа, уæд йе ‘фсæддон хæстæ хуыздæр æххæст кæндзæн æмæ йæ æндæр цардуагон проблемæтæ дæр нал тыхсын кæндзысты.

Йæ рады Гассеты Ибрагим фехъусын кодта, зæгъгæ, æфсæддон службæйы рæнхъыты службæгæнджытæн сæ куыстмызд фылдæр кæндзæн фæлтæргай ацы азы мартъийы мæйæ.

Танделаты Вилена