Хъуыддагон ныхас – цæрæнуатон кооперативты уæнгтимæ

Республикæ Хуссар Ирыстоны Президент Бибылты Анатоли №29 æмæ №31-æм цæрæнуатон кооперативты уæнгтæн фæндон бахаста, цæмæй рады слæууой социалон цæрæнуат райсынмæ. Æмбæстæгтæ, кæцытæн сæ хæдзæрттæ кæронмæ арæзт не ‘рцыдысты 90-æм азты æмæ сын хъæуы сæ цæрæнуатон уавæртæ фæхуыздæр кæнын, сæ бон суыдзæн фатертæ райсын хицæн категоримæ гæсгæ.

Банысангонд кооперативты уæнгтæ цалдæр азы дæргъы паддзахадæй домынц компенсаци, фæлæ Президент фембæлды рæстæджы банысан кодта, зæгъгæ, адæм Советон Цæдисы фехæлдæй цыдæриддæр фесæфтой, уыдонæн баххæстгæнæн нæй. Бибылты Анатоли банысан кодта, зæгъгæ, æххуысхъуаг æмбæстæгты цæрæнуатæй сифтонг кæнын у Хуссар Ирыстоны къухдариуæгады приоритетон хæс.

«Уæ барадон ахастытæ сты кооперативты уæнгты æмæ паддзахады барадон ахастытæ ахæм номимæ – Советон Социалистон Республикæты Цæдис. Республикæ Хуссар Ирыстон нæу уыцы барадон ахастыты хайадисæг. Советон Цæдис нын кооперативы уæнгты проблемæ скъуыддзаг кæнынæн æхцайы фæрæзтæ нæ ныууагъта, куыд нæ ныууагъта бангон бавæрдтыты бафыстытæн æхцайы фæрæзтæ. Уыимæ иумæ мах иууылдæр стæм Хуссар Ирыстоны æмбæстæгтæ, æмæ уæ проблемæтæ сты республикæйы проблемæтæ», – банысан кодта Президент.

«Фыццаг къахдзæф, кæцы мæ фæнды, сымах саразат, у рады слæууын хицæн категорийы æмæ æввахс рæстæджы цæрæнуат райсын. Æз уын ахæм фæндон загътон раздæр дæр, фæлæ сымах ныры онг уымæй не спайда кодтад. Социалон цæрæнуат райсын сæ бон у, ног цæрæнуат райсын кæнæ та цæрæнуат рауæрæх-дæр кæнын кæй фæнды, уыдонæн. Махмæ ис 1700 бинонтæй фылдæр, кæцытæ лæууынц рады, уымæ гæсгæ, хæдзæрттæ кæмæн ис, уыдон уæлæмхас фатертæй сифтонг кæнын махæн нæ бон нæу. Фæнды мæ ноджы иу хатт банысан кæнын, приоритеты кæй сты, цæрæнуат кæмæн нæй, ахæм адæм», – загъта Бибылты Анатоли.

Хицæн рады слæууын кооперативты уæнгтæн Президент загъта раздæр дæр, фæлæ уыдон ныры онг нæ разы кодтой уыцы фадатæй спайда кæныныл. Уымæ гæсгæ, кооперативы уæнгтæн, хицæн категорийы уæвгæйæ,  фадат ис рад фæтагъддæр кæнынæн. Фембæлды рæстæджы бирæтæ сразы сты Президенты фæндоныл æмæ план кæнынц æввахс рæстæджы куырдиат бадæттын цæрæнуатон къамисмæ.

РХИ-йы Президенты æмæ Хицауады пресс-службæ