Республикæйы районты цæрджытимæ Президенты æрвылазон фембæлдтыты фæлгæтты та, ацы аз дæр Бибылты Анатолийæн фембæлд уыд Знауыры районы цæрджытимæ. Хайад дзы райстой районы сæргълæууæг Хуыбиаты Сослан, хъæууон администрацийы сæргълæуджытæ, Знауыры районæй Параламенты депутаттæ æмæ æхсæнады минæвæрттæ. Уынаффæ цыдис районы рæзтимæ баст проблемон фарстатыл.
Паддзахады сæргълæууæг бацымыдис кодта, æвзæрстыты агъоммæ йæ программæйы пункттæ куыд æххæст цæуынц, уымæ, кæцытæн йæ иу хайы бахастой республикæйы æмбæстæгты домæнтæм гæсгæ.
Райцентры цæрджыты проблемæты фылдæр хай баст у фæндагон инфраструктурæимæ, нуазыны дон æмæ сæ электроэнергийæ ифтонг кæнынимæ. Ацы фарстатæн сæ иу хай скуыддзаг æрцыд уартæ 2017 азы, иннæ хайыл та куыст цæуы.
«Куыд зонут, афтæмæй азæн фæстиуджытæ аразгæйæ, æз фембæлын цæрджытимæ, цæмæй æргомæй семæ ныхас кæнон. Фæнды мæ банысан кæнын, Знауыры районы бирæ арæзт кæй æрцыд.
Абон Знауыры районы иууыл стырдæр проблемæ у нуазыны дон. Ацы проблемæ ис республикæйы æппæт районты дæр. Цæрджыты домæнтæм гæсгæ хъæутæм уагъд цæуынц доны ног хæххытæ, фæлæ бирæ суадæттæ сур кæнынц климатон ивындзинæдты аххосæгтæм гæсгæ. Мах ныртæккæ скъуыддзаг кæнæм доны дебет куыд фæфылдæр кæнæм, уый.
Азы размæ районы цæрджытимæ фембæлды рæстæджы уыдон дзырдтой, цæрæнуат кæй нæ фаг кæны, уыцы проблемæйыл дæр. Инвестпрограммæмæйы фæлгæтты районæн арæзт æрцыд 18 фатерон цæрæн хæдзар, ноджы ма иу корпусы арæзтад фæуыдзæнис æрбалæугæ азы», – загъта Бибылты Анатоли.
Уый банысан кодта, зæгъгæ, рады лæууынц 200 бинонтæйы бæрц. Фæлæ, уыдон иууылдæр райцентры нæ цæрынц.
«Кæд æмæ радылæуджыты æхсæн ис ахæм бинонтæ, кæцыты сæ цæрæнуатон уавæртæ фæхуыздæр кæнын фæнды, хъуамæ архайæм уæд цæмæй алкæмæн райцентры хæдзар лæвæрд ма цæуа, фæлæ æркастæуа, кæм цæрынц, уыцы хъæуты сын хæдзæрттæ саразыны фарстмæ», – загъта уый. Районы цæрджыты ма афтæ тыхсын кæны паддзахадон телеканал Ир» кæй не ‘вдисы хицæн хъæуты. Зæгъæм, Балтайы хъæуы афæдзы бæрц не ‘вдисы бынæттон телеканал.
Проблемæимæ базонгæ уæвгæйæ паддзахады сæргълæууæг банысан кодта, зæгъгæ, ацы фарста аскъуыддзаг кæнын исы йæхимæ. Уый ма фехъусын кодта, зæгъгæ, санатори Нагутнимæ сезон байгом кæныны агъоммæ уагъд æрцæудзæн электроны хахх.
Хъæууонхæдзарадон техникæ кæй нæ фаг кæны, уыцы фарсты фæдыл та Президент радзырдта, зæгъгæ, баныхæстæ цыдысты Уæрæсейы хъæууон хæдзарады министрадимæ æмæ уый фæстæ Хуссар Ирыстонæн рахицæн æрцыдысты техникæйы цыппар иуæджы. Йæ ныхæстæм гæсгæ уый у, республикæ æввахс рæстæджы цы хъæууонхæдзарадон техникæ райсдзæн, уымæн йæ чысыл хай æмæ дзы æрмæст фермерон хæдзарадтæ æмæ хи-цæн цæрджытæ нæ пайда кæндзысты.
Дарддæр поселочы цæрджытæ паддзахады сæргълæууæгмæ бахатыдысты иууыл ахсджиагдæр проблемæты фæдыл. Поселокы цæрæг Гатыгкоты Зураб бахатыд фермерон хæдзарадты рæзын кæнынæн æххуысы тыххæй куырдиатимæ. Уый радзырдта, зæгъгæ, план кæны йæ фосы нымæц фæфылдæр кæнын, сарæзта фермæ, фæлæ проблемæтæ фæзынд хæдзарады дарддæры рæзтæн кредит райсыны фæдыл. Президент ныфс бавæрдта, кæй йын баххуыс кæндзæнис.
Хъæууон цæрджытæй цалдæр бахаудысты уæззау финансон уавæры. Уыдоныл зиæнттæ æрцыдис мæнæуы гибридон сорттæ байтаугæйæ. Сæ ныхæстæм гæсгæ сын хъæууон хæдзарады министрад цы мæгуыраугъæдджын тауинаг радта, уый фæстиуæгæн ныр хъуамæ бафидой фæйнæ 37 мин сомы. Проценттæ æмæ пенитæ хынцгæйæ, абоны бонмæ уыдонæн фидинаг ис 80 мин сомы.
Президент банысан кодта, зæгъгæ, проблемæ æнгæс у хъалмыхъхъаг ставдкъах фосы тыххæй товарон кредиттæ дæттыны проблемæимæ æмæ йыл хъæуы æруынаффæ кæнын хъæууон хæдзарады министрадимæ.
РХИ-йы Парламенты депутат та загъта Хъорнисы хъæуы фельдшерон-акушерон пунктмæ баст проблемæйы тыххæй. Йæ ныхæстæм гæсгæ, уый дзуапп нæ дæтты санитарон домæнтæн æмæ хъæуы аиуварс кæнын йæ арæзтады рæстæджы цы рæдыдтытæ æруагъдæуыд, уыдон.
Президент банысан кодта, зæгъгæ, ис домæнтæ, кæцытæм гæсгæ хъуамæ арæзт цæуой фельдшерон-акушерон пункттæ æмæ загъта, зæгъгæ, хъæуы сахуыр кæнын проектон-сметæйон документаци æмæ уый фæстæ райсын хъæуы хъæуæг уынаффæ.
Сæ активон позицийы, стæй цæрджыты проблемæтыл кæй тыхсынц, бæрндзинад æмæ лæмбынæг хъусдард поселочы проблемæтæм кæй æвдисынц, уый тыххæй Бибылты Анатоли бузныг загъта Знауыры районæй Парламенты депутаттæн.
Кæронбæттæны паддзахады сæргълæууæг радзырдта республикæйы сæвзæргæ æхсæнадон-политикон ситуацийы тыххæй дæр. Уый ноджыдæр банысан кодта, иууыл ахсджиагдæрыл кæй нымайы закъон æмæ уыимæ баст процедурæтæ хъахъхъæнын.
Нæ уацх.
Comments are closed, but trackbacks and pingbacks are open.