Республикæ Хуссар Ирыстоны Президент Бибылты Анатоли РЦИ-Аланийы Сæргълæууæг Битарты Вячеславимæ хайад райста УФ-йы Федералон æмбырды Федерацийы Советы уæнгтимæ фембæлды. Фембæлды хайадисджытæ æруынаффæ кодтой Цæгат æмæ Хуссар Ирыстоны социалон æмæ экономикон фадгуыты рæзты фарстытыл.
Федерацийы Советы аграрон-хæлцадон политикæ æмæ æрдзæй пайдакæнынады фæдыл комитеты сæрдар Алексей Майоров стыр аргъ скодта Цæгат Ирыстоны архайдæн хъæууон хæдзарады фадыджы, Федерацийы Советы социалон политикæйы фæдыл комитеты сæрдары хæдивæг Елена Бибикова та рæгъмæ рахаста РЦИ-Алани æмæ РХИ-йы социалон проектты фарстатæ.
Битарты Вячеслав бузныджы ныхæстæ загъта, Федерацийы Советы уæнгтæн закъондæттæн органы ‘рдыгæй Цæгат Ирыстонмæ цы хъусдард æмæ æххуыс цæуы, уый тыххæй.
Бибылты Анатоли бахатыд, цæмæй бузныджы ныхæстæ зæгъой Федерацийы Советы Сæрдар Валентина Матвиенкойæн, кæцы, йæ ныхæстæм гæсгæ, бирæ азты дæргъы кусы республикæйы фарстыты фæдыл æмæ алыварсонæй зонгæ у Хуссар Ирыстоны уавæримæ.
«Абон цы проекттыл цæуы уынаффæ Федерацийы Советы хайадисджытæй, уыдон сты куыстмыздтæ фæфылдæр кæнын æмæ Инвестпрограммæйы фæдыл социалон проектты арæзтад. Ис ма ноджы бирæ проекттæ, кæцытыл мах уынаффæ кæнæм, абон нæ ныхас у зæрдæ-дадзинты фадыджы бæрзонд-технологон медицион æххуыс бакæныны фадæттыл», – банысан кодта Бибылты Анатоли.
Уый ма бахатыд сенатортæм, цæмæй сæ хъус æрдарой, Хуссар Ирыстонæй Уæрæсемæ цы автомашинæтæ цæуынц, уыдоны ввозы проблемæ аскъуыддзаг кæныны фарстмæ.
«Уыцы фарстыл уынаффæ цæуы æппæт æмвæзадтыл, фæлæ æз афтæ хъуыды кæнын, æмæ мах æнгомæй куы бацæуæм ацы фарст аскъуыддзаг кæнынмæ, уæд скъуыддзаг æрцæудзæн. Абон Уæрæсе æмæ Хуссар Ирыстоны ‘хсæн ис Æмцæдисад æмæ интеграцийы фæдыл сразыдзинад. Ацы Сразыдзинад хынцгæйæ, æз афтæ хъуыды кæнын, æмæ Федерацийы Советы æмвæзадыл хорз уаид Хуссар Ирыстоны уыцы æмбæстæгты транспорт уадзыныл æруынаффæ кæнын, кæцытæ æдзух цæрынц Уæрæсейы Федрацийы, сæйраджыдæр, Цæгат Ирыстоны», – банысан кодта Президент.
Сенатортæ ныфс бавæрдтой, ацы фарстыл кæй æруынаффæ кæндзысты Федерацийы Советы.
Федерацийы Советы уæнг Фадзайты Арсен фæндон бахаста, цæмæй ауадзой Хуссар Ирыстоны бонтæ Уæрæсейы Федерацийы Федерацийы Советы.
Comments are closed, but trackbacks and pingbacks are open.