Уæрæсейаг мыхуыры боны цытæн, кæцы æрвылаз дæр нысан цæуы 13 январы, РЦИ-Аланийы Сæргълæууæг Сергей Меняйло раарфæ кодта дзыллон информацийы фæрæзты минæвæрттæн сæ профессионалон бæрæгбоны цытæн æмæ 2023 азы хатдзæгтæм гæсгæ хуыздæр журналистон куысты тыххæй æрвылазон премийы лауреатты схорхзæхджын кодта.
Цæгат Ирыстоны Сæргълæууæджы премийы лауреаттæ сæрмагонд номинаци «Единение»-йы систы Хуссар Ирыстонæй дыууæ журналисты – газет «Республикæ»-йы Тæболты Солтанбеджы тыххæй æрмæг «Его всегда будет не хватать»-ы автор Харебаты Батрадз æмæ ПТРК «Ир»-ы журналист Санахъоты Маринæ авторон куыст «Торжество единства»-йы тыххæй.
Цæгат Ирыстоны Сæргълæууæджы æрвылазон премийы лауреаттæ 2023 азы систы 17 адæймаджы. Конкурс арæзт æрцыд дзыллон информацийы фæрæзты рæзтæн ахъаз кæнын, публикациты, программæты актуалондзинад æмæ гъæд фæхуыздæр кæнын, сфæлдыстадон активондзинад æмæ журналистты профессионализм разæнгард кæныны нысанæн. Æдæппæтæй конкурсон къамис æркаст 150 куыстæй фылдæрмæ, кæцытæ мыхуыр æрцыдысты республикон дзыллон информацийы фæрæзты.
Хуыздæр журналистон куысты тыххæй РЦИ-Аланийы Сæргълæууæджы преми райстой:
– номинаци «Честь и слава»-йы – НТК «Осетия-Ирыстон»-ы журналист Бэлла Накусова, ПТРК «Алания»-йы радиойы службæйы шеф-редактор Черчесты Зæринæ, газет «Слово»-йы корреспондент Церекты Артур, информацион портал «15-й Регион»-ы журналист Колыты Людмилæ;
– номинаци «Траектория будущего / Фидæн» – ПТРК «Алания»-йы журналист Дзуццаты Мадинæ, ПТРК «Алания»-йы радиойы службæйы уацхæссæг Дзугаты Нелли, республикон газет «Северная Осетия»-йы уацхæссæг Залина Губурова;
– номинаци «Тема года в России – Год педагога и наставника» – НТК «Осетия-Ирыстон»-ы журналист Æлборты Алисæ, ПТРК «Алания»-йы радиойы службæйы разамонæг Хæдæрцаты Лидæ, газет «Слово»-йы журналист Сабанты Мадинæ, газет «Жизнь Правобережья»-йы журналист Азæ Аликова-Мукагова, информацион портал «15-й регион»-ы журналист Алина Хасцаева;
– номинаци «Проба пера» – информацион портал «15-й Регион»-ы оператор Давид Костанов;
– номинаци «Патриот» – газет «Слово»-йы уацхæссæг Хъайтыхъты Кристинæ ;
– номинаци «Финансовая грамотность» – республикон газет «Цæгат-Ирыстон»-ы уацхæссæг Тамара Бунтури.
Сергей Меняйло бузныг загъта медиа фадыджы специалисттæн, регионы цæрджытæн социалон æгъдауæй ахсджиаг цаутæ хъусын кæнын, регионы рæзтмæ хайадисты тыххæй æмæ банысан кодта паддзахадон хицауиуæгады органтимæ журналистты æмархайды ахсджиагдзинад.
«Информацион тыгъдады нысаниуæг кæны бæрзонддæр. Фæлæ абон ахæм рæстæг у, æмæ уыцы тыгъдад йедзаг кæны дзыллон информацийы фæрæзты традицион формæтæй нæ, фæлæ блогфадыгæй дæр. Мæ хъуыдымæ гæсгæ, мах хъуамæ нæ журналистон конкурсы хайадисты арæнтæ рауæрæх кæнæм. Бузныг уын равзаргæ хъуыддагмæ æнувыддзинады тыххæй», – банысан кодта республикæйы къухдариуæггæнæг.
Афтæ ма Сергей Меняйло сдзуапп кодта журналистты фарстатæн.
