Композитор, пианист æмæ дирижер, Уæрæсейы Федерацийы аивæдты сгуыхт архайæг Махъоты Ацæмæз ссис Дмитрий Шостаковичы номыл премийы лауреат. Махъоты Ацæмæзы ныхæстæм гæсгæ, йын преми кæй саккаг кодтой, уый уыд æнæнхъæлæджы хабар. «Æз рагæй бæллыдтæн Дмитрий Шостаковичы къласмæ бацæуынмæ. Фæлæ ахуыргæнæндон каст куы фæдæн æмæ Ленинграды консерваторимæ куы бацыдтæн, уæд Дмитрий Шостакович сæрæгас нал уыд. Уымæ гæсгæ Санкт-Петербурджы композицийыл никуы куыстон. Сдæн пианист æмæ уый фæстæ Ереваны ахуыр кодтон композици.
Дмиртий Шостаковичы преми мæнæн у егъау цау. Уый æрмæст ме сгуыхтдзинад нæу, уый у æппæт ирон музыкантты сгуыхтдзинад. Уымæн æмæ фестивалты æз æххæст кæнын æрмæст мæхи уацмыстæ нæ, фæлæ мæ коллегæты уацмыстæ дæр. Мæ хæс у ирон музыкæ пропагандæ кæнын», — загъта Махъоты Ацæмæз.
Дмитрий Шостаковичы номыл премийы 1994 азы сфидар кодта Юрий Башметы дунеон хæрзаудæн фонд æмæ уæдæй фæстæмæ лæвæрд цæуы аивады архайджытæн дунеон культурон исадмæ сæ хайбавæрды тыххæй. Уæрæсейы композиторты цæдисы радон рабадты бæрæг æрцыдысты 2022 азы лауреаттæ.
Махъоты Ацæмæз у РЦИ-Аланийы композиторты цæдисы правленийы сæрдар, Цæгат Ирыстоны филармонийы аивадон къухдариуæггæнæг æмæ директор, УФ æмæ РЦИ-Аланийы аивæдты сгуыхт архайæг. Уый у бирæнымæц вокалон, хорон, камерон æмæ программон музыкæйы, афтæ ма кинофильмты æмæ 50 фылдæр спектаклы музыкæйы автор.
Музыкæ у йæ ныхы фыст. Уый у æвидигæ сфæлдыстадон энерги æмæ удцырындзинады гуырæн. Махъойы фырты уникалон курдиат фадат дæтты музыкæ фæлдисынæн, кæцы фыццаг нотæтæй фæстæмæ цæрæнбонтæм баззайы адæймаджы зæрдæйы. Йæ алы уацмыс дæр у æнæхъæн дуне.
Симфонитæ, мюзиклтæ, балеттæ, инструменталон концерттæ. Композиторы сфæлдисгæ дæсгай уацмысты зонынц æмæ сын кад кæнынц æнæхъæн дунейы. Цæгат Ирыстоны гимны музыкæ дæр у йæ бакуыстгонд. Йæ музыкæ æвæлмасæй никæйы ныууадзы. Йæ вирт-уалон музыкæйы алыхатт дæр æнкъардæуы райгуырæн Ирыстонмæ æгæрон уарзондзинад, кæцыйы уый рæдауæй дих кæны йæ хъусджытимæ.
Махъоты Ацæмæз у «Дзæуджыхъæуы театралон фæззæг-99»-ы конкурсы «За лучшую музыку к спектаклю»-йы премийы лауреат, 1989 азæй УФ-йы композиторты цæдисы уæнг. 2006 азы æвзæрст æрцыд Уæрæсейы Федерацийы композиторты цæдисы секретарæй. 2008 азы ссис аивады къабазы национ преми «Нарты фæткъуы»-йы премийы лауреат. Уый ма у ноджы æндæр хорзæхты хицау дæр. Махъойы фырты регалитæ æмæ кадджын нæмттæ гæнæн ис бирæ рæстæджы нымайын, фæлæ уымæ æнæкæсгæйæ маэстро баззад æнахуыр хæдæфсарм адæймагæй. Уый æгæрон æнувыд у йæ хъуыддагыл.
Мах дæр арфæ кæнæм нæ курдиатджын æмзæххонæн Шостаковичы премийы лауреат кæй ссис, уый фæдыл. Бантысæд дын ноджыдæр фылдæр сфæлдисын дæ радтæг Ирыстоны фæрныгадæн!
Нæ уацх.
