Ацы адæймагимæ иу чысыл дæр куы аныхас кæнай, уæд уайтагъддæр фæхатдзынæ, дохтыры хъæуæг миниуджытæй кæй у хайджын, стæй йæ профессийыл иузæрдион кæй у, уый. Хъуылымбегты Эмзар йæ сомбоны дæсныйад равзарыныл бирæ нæ фæхъуыды кодта æмæ куыддæр астæуккаг ахуырад райста, афтæ ссис Цæгат Ирыстоны мединституты студент. Ахуыр каст фæуыны фæстæ кусын райдыдта горæт Тамбовы æмæ æвзонг кадр йæ тыхтæ не ‘вгъау кодта æмбæстæгты æнæниздзинад фидар кæнынæн. Фæстæдæр, 1990 азы, æрыздæхт йæ райгуырæн Хуссар Ирыстонмæ æмæ кусын райдыдта «Тагъд æххуыс»-ы станцы хистæрæй. Уый фæстæ та рахызт нæ горæты сывæллæтты поликлиникæмæ æмæ ахуыры рæстæджы цы зонындзинæдтæ райста, уыдонæй пайда кодта нæ рæзинаг кæстæрты æнæниздзинадæн. Уым та бафæллой кодта 2006 азмæ, уыцы аз та ногæй рахызт «Тагъд æххуыс»-ы коллективмæ æмæ абоны онг дæр кусы ацы бынаты. Хъуылымбеджы фыртæн йæ арфæйаг куысты тыххæй саккаг кодтой республикæйы сгуыхт дохтыры кадджын ном, у сывæллæтты хъуырты уæрæх профилы дохтыр.
Эмзарæн коллективмæ ис хорз ахаст, æмбарынц сæ кæрæдзи æмæ иумæ скъуыддзаг кæнынц сæ æнæаргъæвгæ хæстæ. Ныртæккæ ацы уагдоны алы бон дæр кусы 4 бригадæйы, уыдонæй сæ иу у сывæллæтты дохтыры бригадæ. Æдæппæт, рынчынты æнæниздзинадыл аудынц 14 дохтыр æмæ 30 медицинон хойы. Цух не сты хостæй, фыццаг рады æххуысæн сæ цы фæхъæуы, уыдонæй вæййынц ифтонг. Кæд ын бынаты йæ низ не рсабыр кæнынц, уæд та йæ æвæстиатæй фæхæццæ кæнынц рынчындонмæ. Горæтæй сæм æххуысмæ тынг арæх фæсидынц, æрмæст боны дæргъы сæ нымæц схизы фæндзаймæ. Тагъд æххуысмæ æвæстиатæй ацæуынц дохтыр æмæ медицинон хо, фыццаг рады рынчынæн цæмæй баххуыс кæной, уыцы хостæ æмæ ифтонггæрзтимæ. Зæгъын хъæуы, сæ куыст æххæст кæнгæйæ сæхæдæг дæр кæй бахауынц зындзинæдты. Цæвиттон, æрæджы райсомы 7 сахатыл сæм фæдзырдæуыд Уæллаг Рустауы хъæуæй æххуысмæ, фæлæ фæндаг мæгуырау кæй уыдис, уымæ гæсгæ бынатмæ нæ бахæццæ сты. Фæдзырдтой Уæлвæткон уавæрты фæдыл министрадмæ æмæ сын уыдон баххуыс кодтой. Рынчыны рынчындонмæ фæхæццæ кодтой 4 сахаты фæстæ. Иннæ хабар та уыд стыр митуарды рæстæджы. Монастъеры хъæуы къаннæг сывæллон уыд уæззау уавæры. Фæндаг митæй уыд æхгæд æмæ йæ трактор хафта, йæ фæдыл та цыд «Тагъд æххуыс»-ы машинæ æмæ афтæмæй дзæвгар къуылымпыты фæстæ рынчыны æрластой рынчындонмæ. Фæлæ коллектив уыцы зындзинæдтæ мурмæ дæр нæ дары, æрмæст сын сæ уавæр хъуамæ æмбарой иуæй-иу æмбæстæгтæ дæр.
Дзау, Знауыр æмæ Ленингоры районты цæрджыты æнæниздзинадыл та фæкусынц сæхи «Тагъд æххуыс»-ы дохтыртæ. Афтæ ма цæвиттойнаг у Дменисы хъæууон амбулаторийы куыст дæр. Уыдон сæхи рады аудынц рынчынтыл, фæлæ кæд сæ бон нæ бавæййы хъæрзгæ адæймаджы æнæниздзинад фæхуыздæр кæнын, уæд фæсидынц Цхинвалы «Тагъд æххуыс»-мæ. Медицинон персоналы сæ квалификаци фæбæрзонддæр кæныны тыххæй не ‘рвитынц æндæр горæттæм, фæлæ рацæуынц онлайн курсытæ. Цæвиттон, ахæм хуызы ивгъуыд аз курсытæ рацыдысты медицинон хоты иу къорд æмæ ацы аз та 8 дохтыры. Рацæуынц сæ 5 азы иу хатт. Хъуылымбегты Эмзар куыд загъта, афтæмæй сæм уæлдæр категорийы дохтыртæ сты Æрсойты Дианæ, Тедеты Альбинæ, Пухаты Заирæ æмæ æндæртæ.
Рынчын адæймагæн тыхст рæстæджы йе скаст вæййы дохтырмæ æмæ йын уый куы фæсуры йæ низ, уæд йæ арфæтæн кæрон дæр нæ вæййы.
Ноджыдæр уæ ныфс бирæ уæд æмæ кæддæриддæр ныфсы хос ут хъæрзгæ адæймагæн.
ХУЫБИАТЫ Никъала
