Стыр Уæлахизы бон — 9-æм майы Мæскуыйы цы бирæ культурон мадзæлттæ уагъд цæудзæнис, уыдонæй сæ иумæ фыццаг хатт хуынд æрцыдысты хуссарирыстойнаг артисттæ дæр æмæ ныридæгæн сæхи цæттæ кæнын райдыдтой.
Патриотикон акци «Æнæмæлгæ полк»-ы Дунеон сценæйыл цалдæр зарæджы сæххæст кæндзæн Хуссар Ирыстоны сгуыхт артист, зарæггæнæг Тасойты Игорь. Уым ма сæ арæхстдзинад æвдисдзысты нæ бæстæйы национ хореографион коллектив дæр. Мадзал уагъд цæудзæнис Горькийы номыл Централон парчы Стыр Уæлахизы бæрæгбоны. Концерты Тасойты Игорь сæххæст кæндзæнис патриотикон зарджытæ куыд «Осетинка», «Отчизна, Родина моя!» æмæ «Не воюйте с русскими».
«Ацы бæрæгбонон концертон программæйы-иу уымæй размæ азты хайад райстой бирæ бæстæты артисттæ. Ныр Стыр Фыдыбæстæйон хæсты архайæг ветерантæн музыкалон арфæ ракæндзысты хуссарирыстойнаг артисттæ дæр», — загъта Тасойты Игорь. Уый ма куыд банысан кодта, афтæмæй акцийы хайадисджыты æвзæрста экспертон совет, кæцыйы сконды сты уæрæсейаг зындгонд артисттæ, куыд Лариса Долина, Александр Маршал, Александр Серов, Полина Гагарина, Александр Михайлов, Петр Шаболтай æмæ Мæскуыйы культурæйы департаменты управленийы сæргълæууæг Ака Марзаева.
Ацы проекты сæйраг организатор у культурон-патриотикон центр «Армия и культура».
Нæ уацх.
