Республикæ Хуссар Ирыстоны Президент Бибылты Анатоли бабæрæг кодта Мæскуыйы хæлцадон равдыст «Продэкспо-2019», цыран æвдыст æрцыд Хуссар Ирыстоны уагъд продукци.
Уæлдай хъусдард хуссарирыстойнаг паддзахады сæргълæууæг аздæхта арæнгонд бæрндзинады æхсæнад «Сæнуадзæн «Ирон сæн»-ы стендмæ. Ацы продукци уадзын райдыдтой ивгъуыд азы кæрон Цхинвалы.
Куыстуаты хицæуттæй сæ иу Таймураз Гогинов куыд радзырдта, афтæмæй «Сæнуадзæн «Ирон сæн» фыццаг хатт хайад исы равдысты æмæ Уæрæсейы, æндæр бæстæты бизнесментæм ныридæгæн равзæрын кодта стыр цымыдис.
«Сæны продукци æвдыст цæуы фыццаг хатт. Уымæй уæлдай ма не стенд æвдисы экспозици национ атрибутикæ Хуссар Ирыстоны тырысаимæ. Стыр цымыдисдзинад ис нæ продукцимæ. Мах дистрибьютортимæ ауагътам 30 фембæлдæй фылдæр. Æрбацыдысты нæм Казахстанæй, Донецкы Адæмон Республикæ, Луганскы Адæмон Республикæ, Беларусийæ», – загъта Таймураз Гогинов.
Президент бузныджы ныхæстæ загъта «Ирон сæн» уадзджытæн сæ бакæнгæ куысты тыххæй.
«Сымах проект сæххæст кодтат цыбыр æмгъуыдмæ. Уымæй уæлдай ма, сорганизаци кодтат продукцийы рауагъд. Уый у стыр æнтыст. Сымах ныфс хъуамæ уа паддзахады къухдариуæгады æххуысæй сæн аразыны фадыг райрæзын кæныны хъуыддаджы. Æхсызгон у, сымах фыццаг хатт кæй равдыстат продукци ахæм серьезон фæзуаты æмæ кæй размæ кæнут Хуссар Ирыстоны бренд», – загъта Бибылты Анатоли.
Амалиуæггæнджытæ радзырдтой, кæй план кæнынц æввахс рæстæджы Хуссар Ирыстоны Цхинвалы районы ныссадзын 20 гектарæй фылдæр сæндæттæ.
Республикæ Хуссар Ирыстоны стендыл ма æвдыст цæуынц минералон дон «Бæгъиатæ», минералон хосгæнæн дон «Ossetian» æмæ минералон дон «Санай».
Хæлцадон продукттæ, нозты æмæ уыдон уадзынæн хомысы тыххæй кондад 26-æм дунеон равдыст «Продэкспо-2019»-ы уагъд цæуы Мæскуыйы 11 февралæй 15 февралмæ. Æвдыст дзы æрцыдысты 30 национ экспозицитæй фылдæр.
Comments are closed, but trackbacks and pingbacks are open.