Хицауады æнæрадон рабадты, кæцы ауагъдæуыд Пухаты Эрикы къухдариуæгадæй,  уынаффæ цыд паддзахадон куыстуæттæн субсидитæ дæттын æмæ чысыл бизнесы рæзты фарстатыл.

Экономикон рæзты министр Кокойты Геннади Хицауады уæнгты размæ уынаффæ кæнынмæ рахаста «Республикæ Хуссар Ирыстоны чысыл амалиуæгады субъекттæн хатырон кредиттæ дæттыны тыххæй» закъоны проект.

«Закъоны сæйраг нысан у республикæйы чысыл амалиуæгады фадыджы фидар рæзт сифтонг кæнын, æнæ уый республикæйæн йæ бон нæ бауыдзæн размæ цæуын, – банысан кодта министр.  Амалиуæггæнджытæн хатырон кредиттæ радтын сифтонг кæныны тыххæй закъоны райст фæахъаз уыдзæн уæлæмхас кусæн бынæттæ саразынæн, цæрджыты куыстæй хиифтонгады æмвæзад фæбæрзонддæр кæнынæн, цæрджыты реалон æфтиæгты рæзтæн, хъалонтæ цæмæй истæуы, уыдоны базæ рауæрæх кæнынæн».

Пухаты Эрик банысан кодта ацы закъоны райсты ахсджиагдзинад.

«Иннæ преференциты æмрæнхъ, хатырон кредиттæ дæттыны тыххæй закъон ифтонг кæны чысыл бизнесы субъекттæн баххуыс кæныны уæлæмхас фæрæзтæ. Республикæйы чысыл амалиуæгады рæзт фæахъаз уыдзæн бирæнымæц социалон-экономикон проблемæты аскъуыддзаг кæнынæн», – загъта Хицауады Сæрдар æмæ ма йæ ныхасмæ бафтыдта, зæгъгæ, Президент Бибылты Анатолийы домæнмæ гæсгæ документыл куыстæ-уыд стыр темптæй.

Хицауад хорзыл банымадта закъоны проекты æмæ йæ арвыста Парламентмæ æруынаф-фæ йыл кæнынмæ.

Дарддæр Хицауады уæнгтæ хъæлæс æппæрстæй паддзахадон бюджетæй паддзахадон унитарон куыстуат «Энергоресурс  Хуссар Ирыстон»-æн, «Электробастдзинады телекоммуникацион компани», «Постон-телеграфон службæ», «Водоканал», «Горæт Цхинвалы цæрæнуатон-эксплуатацион канторæ»-йæн субсидитæ радтыны фæдыл, 2018 азы цы æфтиæгтæ нæ райстой, уыдон баххæст кæныны тыххæй. Дзырд цæуы цæрджытæн лæггæдты реализацийы хæрдзтæ баххæст кæныныл.

«Энергоресурс  Хуссар Ирыстон»-мæ цы æфтиæгтæ æрхауд, уыдон сырæзтысты, электроэнерги æмæ газы тарифтæ   базары æргътæй къаддæр æргътыл реализаци кæй æрцыдысты, уый тыххæй. Сæрмагондæй, æрдзон газ кæм нæй, ахæм хæдзæртты чи цæры, уыцы æмбæстæгтæн баххуыс кæныны тыххæй æрныллæг чындæуыд, цы электро-энерги хардз кодтой, уый аргъ 2.64 сомæй 2 сомы онг.

Рæстæгыл цæрæнуатон-коммуналон лæггæдты тарифтæ кæй не сфидар чындæуыд, уый фæстиуæгæн бафæстиат иуæй-иу паддзахадон уагдæтты кусджытæн куыстмызд бафидын.

Президент Бибылты Анатолийы бахæсмæ гæсгæ Хицауады уæнгтæ æруынаффæ кодтой ацы фарсты фæдыл æмæ сæхимæ хæс райстой, цыбыр æмгъуыдмæ уыцы проблемæ аскъуыддзаг кæныны тыххæй.

Президенты Администрацийы сæргълæууæг Козаты Игорь æрсидт бæрнон адæймæгтæм, цæмæй архайой, куыд гæнæн ис, афтæ оперативондæрæй.

«Нæ хæс у æмбæстæгты закъонон бартæ хъахъхъæнын. Саразын хъæуы æппæтдæр, цæмæй адæм сæ мызд райсой Куадзæнмæ», – банысан кодта уый.

Пухаты Эрик куыд банысан кодта, афтæмæй куыстмызд фидын кæй бафæстиат, уый уыд куыстуæтты къухдариуæггæнджыты æнæфердæхтдзинады аххос.

«Адæмæн уæлдай у, чи у аххосджын. Кæйфæнды аххос ма уа, уæддæр аххосджын кæнынц республикæйы къухдариуæгады. Уый тыххæй алчи дæр йæ бынаты хъуамæ æмбара, цы бæрндзинад ыл ис, уый, æмæ цæсгомджынæй æххæст кæна йæ комкоммæ хæстæ. Мах ам уый тыххæй стæм», – йæ ныхасы кæрон загъта уый.

Республикæ Хуссар Ирыстоны

Хицауады пресс-службæ

Comments are closed, but trackbacks and pingbacks are open.