Президент Бибылты Анатоли йæхимæ райста Зары фæндагаразджытæ æмæ проектгæнджыты.
Фембæлды рæстæджы паддзахады сæргълæууæг банысан кодта республикæйы цæрджытæн ацы фæндаджы ахсджиагдзинад æмæ бузныджы ныхæстæ загъта æрæмбырдуæвджытæн бакæнгæ куысты тыххæй.
«Гуырдзиаг агрессийы рæстæджы Хуссар Ирыстоны æмбæстæгтæн сæ бон нæ уыд сæрибарæй цæуын республикæйæн æдтæмæ. Гуырдзиаг агрессортæ æхгæдтой фæндæгтæ, давдтой, хъизæмар кодтой æмæ мардтой адæмы. 30 азы размæ арæзт æрцыд Зары фæндаг, кæцыйы схонæн ис «царды фæндаг». Растдæр ацы фæндаджы фæрцы мингай адæймæгтæ аирвæрзтысты сæрæгасæй æмæ иуварс æрцыд республикæйы æххæст хæлцадон блокадæ. Бузныг уын уæ бакæнгæ куыст, удуæлдайдзинад æмæ æхсардзинады тыххæй. Сымах куысты фæрцы фервæзтысты сæдæгай адæймæгтæ, сифтонг кодтат адæмы æдасдзинад, æнæ специалон техникæ, транспортон артерийы æнæ бæлвырд проектæй», – загъта Президент.
Уый фæстæ Бибылты Антоли паддзахадон хорзæхтæ радта 1990-1991 азты Гуфта-Зар-Тбеты автомобилон фæндаджы арæзтадмæ сæрмагонд хайбавæрд æмæ æхсарджын фæллойадон архайды тыххæй.
Зары фæндаг у IV категорийы фæндаг, йæ фæтæн у 10 метры, цæуæн хайы фæтæн – 7 метры, фæндаджы дæргъ – 32 километры.
Зары фæндаджы арæзтады проектаразæг, аразæг æмæ идейон разæнгардгæнæг у Харебаты Леонид.
Прораб Гæбæраты Мураты ныхæстæм гæсгæ, фæндаджы арæзтадмæ аразджытæ æрæвнæлдтой 1989 азы 4 декабры. Архайдтой дзы техникæйы 12 иуæджы æмæ 15 адæймаджы.
Æхсæв æмæ бонæй, уазал æмæ æхцайы цухдзинæдтæм нæ кæсгæйæ, хатт сæ цард тасы бын æвæргæйæ, аразджытæ æнувыдæй куыстой Райгуырæн зæхх фервæзын кæныны сæраппонд.
Фæндаг арæзт фæцис 1991 азы 21 декабры
Фæндаджы арæзтад фæуыны фæстæ горæтмæ райдыдтой æхсæнгарз, хæстон техникæ, гуманитарон æххуыс, хъарм дарæс, хæл-цад, хостæ, æртаг æмæ бирæ æндæр цыдæртæ ласын.
Comments are closed, but trackbacks and pingbacks are open.